༄༅། །ཨི་ཊ་ལཱིའི་གྲོང་ཁྱེར་མི་ལན་དུ་ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་ཚོགས་པའི་བོད་དོན་ཚོགས་འདུའི་ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་བོད་མི་རྣམས་བཙན་བྱོལ་དུ་འབྱོར་ཚུལ་དང་བཙན་བྱོལ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་མང་གཙོའི་སྒྲིག་འཛུགས་དང་གཞིས་ཆགས་གསར་འཛུགས་གནང་བའི་བརྒྱུད་རིམ་ངོ་སྤྲོད་གནང་ཡོད།
ཉིན་གྲངས་གཉིས་རིང་གི་ཚོགས་འདུ་དེ་བཞིན་ཨི་ཊ་ལཱི་ནང་ཆོས་མཐུན་ཚོགས་དང་ཨི་ཊ་ལཱི་བོད་ཚོགས། དགའ་ལྡན་ཕོ་བྲང་ཐེབས་རྩ། རྒྱལ་སྤྱིའི་བོད་དོན་ལས་འགུལ་ཁང་། ཨི་ཊ་ལཱིའི་བོད་མི་ཐུན་མོང་གིས་གོ་སྒྲིག་གནང་ཡོད་པ་རེད། ཚོགས་འདུའི་ཐོག་བཀའ་ཟུར་རྗེ་བཙུན་པདྨ་མཆོག་གཙོས་པའི་གནད་ཡོད་མི་སྣ་མང་དག་མཉམ་ཞུགས་གནང་ཡོད་ཅིང་། སྐབས་དེར་བཀའ་ཟུར་རྗེ་བཙུན་པདྨ་མཆོག་གིས་ཐོག་མར་བཙན་བྱོལ་བོད་ཕྲུག་རྣམས་ལ་གཟིགས་རྟོགས་གནང་ཚུལ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ཤེས་ཡོན་སྤྲོད་མཁོ་སྤྲོད་གནང་བའི་བརྒྱུད་རིམ་དྲན་གསོ་གནང་བ་མ་ཟད། ཁོང་མོ་ཕྱི་ལོ་ ༡༩༨༠ ཙམ་ལ་བོད་ནང་དངོས་དོན་རྟོགས་ཞིབ་གནང་བར་ཕེབས་སྐབས་བོད་ནང་གི་བོད་མིའི་གནས་སྟངས་གཟིགས་དུས་ཐུགས་འཚབ་ཆེན་པོ་བྱུང་སྐོར་གསུངས།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བཙན་བྱོལ་ནང་དུ་མང་གཙོའི་སྒྲིག་འཛུགས་ཚད་ལྡན་ཞིག་འཕེལ་བའི་རིམ་པ་ངོ་སྤྲོད་ཞིབ་རྒྱས་གནང་བའི་ཁར། བོད་ནང་རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་ལ་བོད་མི་རྣམས་ཀྱི་ངོ་རྒོལ་དང་། ལྷག་པར་བོད་མི་གྲངས་ ༡༥༧ ནས་རང་ལུས་མེར་སྲེག་གིས་ཞི་རྒོལ་གནང་ཡོད་པ་སོགས་ངོ་སྤྲོད་གནང་ཡོད་པ་རེད།
ཚོགས་འདུའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་རྣམ་ཐར་ལ་གཞི་བཅོལ་ཏེ་ཇེན་པོལ་ལགས་ཀྱིས་བཟོ་སྐྲུན་གནང་བའི་དངོས་བྱུང་གློག་བརྙན་ ༼ བོད་ནམ་ཡང་མ་བརྗེད། ཏཱ་ལའི་བླ་མའི་བརྗོད་ཀྱིས་མི་ལངས་པའི་གཏམ་རྒྱུད། ༽ ཅེས་པ་གཟིགས་འབུལ་ཞུས་ཡོད།
ཐེངས་འདིའི་ཚོགས་འདུའི་ཐོག་དེང་གི་བོད་ཀྱི་ཤེས་ཡོན་དང་། ཁོར་ཡུག ཆབ་སྲིད་ཀྱི་གནས་སྟངས་སྐོར་བགྲོ་གླེང་ལྗགས་བཤད་གནང་ཡོད་པ་བཅས།། 
