༄༅། །འདི་གར་སྡེ་ར་སྡུན་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ལྡུན་ནང་པའི་ལྷན་ཚོགས་ནི་མི་ཁ་ཤས་ཤིག་གིས་མ་བསྐུལ་དང་བླངས་ཐོག་འབྲེལ་ཡོད་ལ་སྙན་གསེང་ཞུས་ཏེ་ཕྱི་ལོ་ ༢༠༡༥ ལོར་གསར་བཙུགས་དང་། ཕྱི་ལོ་ ༢༠༡༨ ལོར་ཁྲིམས་མཐུན་དེབ་བསྐྱེལ་གནང་ཡོད། ཆོས་ཕྱོགས་ལས་ཆབ་སྲིད་ཀྱི་འབྲེལ་བ་ནམ་ཡང་ཞུ་གི་མེད། ཚོགས་པའི་དམིགས་ཡུལ་གཙོ་བོ་ནི་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་སློབ་རིམ་ཕེབས་ལ་གཞི་བཅོལ་ཏེ་ལས་དོན་བསྒྲུབ་མུས་ཡིན། འགན་འཛིན་རྣམས་ནས་ལོ་ངོ་བཞི་ཙམ་རིང་ངལ་བ་དང་ལེན་གྱིས་ས་གནས་ལས་ཁུངས་ཁག་དང་ཡུལ་མི་བཅས་ལ་ཡིག་ངག་གཉིས་ཐོག་ནས་འབད་བརྩོན་ནན་ཞུས་ཀྱིས་ཕྱི་ལོ་ ༢༠༢༢ ཟླ  ༡༡  ཚེས་ ༨ ཉིན་སྟོན་པའི་སྐུ་བརྙན་དངོས་སུ་ཁིར་ས་ལི་ཅོག་ཏུ་བཞུགས་སུ་གསོལ་བའི་དབུ་འབྱེད་མཛད་སྒོ་བསྐྱངས་པ་བཅས་ནི་ལྷག་བསམ་གྱི་གྲུབ་འབྲས་དང་གཟི་བརྗིད་ཀྱི་ཉི་མ་ཞིག་ལ་ངོས་འཛིན་བྱེད་ཆོག་པ་ཡིན།འཛམ་གླིང་ཞི་བདེའི་སྐུ་བརྙན་འདི་ནི་ཕྱི་ལོ་ ༢༠༢༠ ལོར་འཕགས་བོད་ས་མཚམས་གྷལ་ཝན་ལུང་གཤོངས་སུ་རང་སྲོག་ཤོར་བའི་དམག་མི་རྣམས་དང་། དེ་དག་གི་ནང་མི་རྣམས་ཀྱི་ཆེད་དྲན་རྟེན་དུ་དམིགས་ཏེ་ཨུཏྟརཱ་ཁནྜ་མངའ་སྡེ་དབུ་བརྙེས་པའི་དུས་ཚེས་ཕྱི་ལོ་ ༢༠༢༢ ཟླ་ ༡༡  ཚེས་ ༩ ཉིན་ཡིན་སྟབས། གསོལ་འདེབས་སྨོན་ལམ་དང་བཅས་རྩ་ཆེའི་ཕྱག་རྟགས་འདི་གཞུང་དང་མི་མང་བཅས་ལ་འབུལ་གི་ཡོད། མཛད་སྒོར་མཉམ་ཞུགས་གནང་མཁན་སྐུ་མགྲོན་ཆེ་བ་ཁག་ནི་གྲོང་སྡེའི་སྤྱི་ཁྱབ་པ་སུ་ནིལ་ཨུ་ནི་ཡལ་གཱ་མཱ་ (Sunil Uniyal Gama) ལགས་ཀྱིས་གཙོས་རྒྱ་གར་གྱི་དཔོན་རིགས་ཁག་དང་། སྡེ་ར་སྡུན་ས་གནས་འགོ་འཛིན། རཱཇ་སྤུར་ས་གནས་འཐུས་མི། བླ་སྤྲུལ་དགེ་འདུན་དང་བཙུན་མ། ཚོགས་སྐྱིད་དང་མི་མང་བཅས་ཕེབས་ཡོད།    

དུས་ནམ་ཡང་བརྗེད་ཐབས་མེད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་ནང་དོན་གསུམ་པོ་འདི་རྣམས་ཡིན། དང་པོར་སྐྱབས་འོག་པ་ཚོའི་ལས་འཆར་དོན་གསོན་ལ་ལེགས་སོ་བསྔགས་བརྗོད། གཉིས་པར་མཐོང་ཐོས་དྲན་རེག་གི་སྐྱེ་བོའི་རྒྱུད་ལ་ཐར་པའི་ས་བོན་ཐེབས་པའི་ཐུགས་སྨོན། གསུམ་པར་མ་འོངས་བྱེད་སྒོའི་བཀའ་སློབ་ལ་ཆོས་ཤེས་ནས་དད་པ་ཐོབ་དགོས་པས་མང་ཚོགས་ལ་ནང་ཆོས་ངོ་སྤྲོད་དང་། བགྲོ་གླེང་། སྤྱི་ཚོགས་ཕན་བདེའི་བྱ་གཞག་རྒྱུན་འཁྱོངས་བཅས་བྱེད་གལ་ཕེབས་པ་བཅས་ལ་དགའ་སྤོབས་རབ་ཏུ་ཐོབ་ཅིང་གང་ཕེབས་ལག་བསྟར་ཞུ་རྒྱུའི་ཆོད་སེམས་བརྟན་པོ་ཡོད། ལག་གཉིས་ཐལ་མོ་སྦྱར་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙིང་དབུས་ནས་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན། 

ད་དུང་གསུང་འཕྲིན་གཞན་ཁག་ནི་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་། རྒྱ་གར་དབུས་གཞུང་གི་བློན་ཆེན། དེ་བཞིན་ལ་དྭགས་དང་འབྲས་ལྗོངས། ཨ་རུ་ན་ཅལ། ཚོགས་སྐྱིད་བཅས་ནས་གནང་ཐོབ་བྱུང་ཡོད། ད་རེས་གོ་སྐབས་འདི་བརྒྱུད་ནས་ས་གནས་གཞུང་གི་ལས་ཁུངས་དང་ཡུལ་མི། བོད་མིའི་སྒྲིག་འཛུགས་ཀྱི་འབྲེལ་ཡོད་ལས་ཁུངས་བཅས་ནས་རྒྱབ་སྐྱོར་ཚད་མཐོ་པོ་གནང་བར་བཀའ་དྲིན་བླ་མེད་དུ་ཆེ་ཞུ་རྒྱུ་དང་། དེ་བཞིན་གཏོང་ཕོད་ཅན་གྱི་སྦྱིན་བདག་རྣམས་ནས་མཐུན་འགྱུར་རོགས་རམ་གནང་བའི་མཐུ་ལས་དེ་རིང་ཀུན་གྱི་མིག་ལམ་དུ་མངོན་པའི་རྩ་ཆེའི་སྐུ་བརྙན་འདི་རྣམས་བསྟན་འགྲོའི་དོན་དུ་ཞུགས་སུ་གསོལ་ཐུབ་པར་སོང་ཐུགས་རྗེ་བཀའ་དྲིན་བླ་མེད་དུ་ཆེ་ཞུ་བ་དང་། ཁྱེད་རྣམས་སྐུ་ཚེ་མཛད་འཕྲིན་རྒྱས་པའི་གསོལ་འདེབས་སྨོན་ལམ་ཞུ་རྒྱུ་ཡིན། མཐའ་དོན་སྨོན་ཚིག་ཞུ་རྒྱུར། རྣམ་དཀར་དགེ་བའི་རྩ་བ་འདིའི་མཐུ་ལ་རྟེན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་མཛད་འཕྲིན་རྒྱས་པ་དང་། འཇིག་རྟེན་རྒུད་ཚོགས་མཐའ་དག་ཞི་ནས་བདེ་དགའ་རྒྱ་མཚོའི་དཔལ་ལ་ལོངས་སྤྱོད་ཐུབ་པའི་བཀྲ་ཤིས་སྨོན་ཚིག་ལན་བརྒྱར་ཞུ། །