༄༅།།འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༩ རེས་གཟའ་སྤེན་པའི་ཉིན་མེས་དབོན་གཙུག་ལག་དཔེ་སྟོན་སློབ་གྲྭར་བཟང་སྤྱོད་ཉིན་མོ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༤༠ ཐོག་མེས་དབོན་གཙུག་ལག་དཔེ་སྟོན་སློབ་གྲྭའི་དགེ་ལས་སློབ་ཕྲུག་རྣམ་པ་ཚང་འཛོམས་ཀྱིས་ཐོག་མར། སློབ་དགེ་བློ་བཟང་ཚེ་རིང་ལགས་ཀྱིས་སློབ་མ་ཚོར་ཀུན་སྤྱོད་ལེགས་པའི་སློབ་མ་ཞེས་པའི་བརྗོད་གཞིའི་ཐོག་གཏམ་བཤད་གནང་གྲུབ་བསྟུན། སློབ་གྲྭའི་བཟང་སྤྱོད་ཚོགས་ཆུང་གི་ལམ་སྟོན་འོག་སློབ་ཕྲུག་ཁག་གཅིག་གིས་༼བཀའ་དྲིན་དྲན་ཤེས།༽ ཞེས་པའི་གཏམ་བརྗོད་ཐུང་ཐུང་ཞིག་གཟིགས་འབུལ་ཞུས་པ་དང་ཆབས་ཅིག དགེ་སློབ་ཟུང་འབྲེལ་ནས་བཀའ་དྲིན་དྲན་ཤེས་དང་འབྲེལ་བའི་བྱེད་སྒོ་ཞིག་སྤེལ་བས་ཚང་མས་མཉམ་ཞུགས་གང་ལེགས་གནང་།
བཟང་སྤྱོད་ཉིན་མོ་དང་སྟབས་བསྟུན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་བགྲེས་ཡོལ་བ་ཟླ་བ་བསམ་གཏན་ལགས་དང་། བགྲེས་ཡོལ་བ་བློ་ཡོན་ལགས་རྣམ་གཉིས་ཆེད་ཕེབས་ཀྱིས། བོད་མིའི་ཡུལ་སྲོལ་གོམས་གཤིས་བཟང་པོ་མི་ཉམས་རྒྱུན་འཛིན་དང་ཉམས་པ་སོར་ཆུད་སླད། པར་རིས་འགྲེམས་སྟོན་གྱི་ལམ་ནས་དགེ་ལས་སློབ་གསུམ་ལ་གོ་རྟོགས་སྤེལ་གནང་བ་མ་ཟད། ཐུགས་རེར་སློབ་གླིང་འདི་བརྒྱུད་ནས་མ་འོངས་སློབ་ཁག་གཞན་དང་སྤྱི་ཚོགས་ཁྱོན་ཡོངས་ལ་བོད་མིའི་སྲོལ་རྒྱུན་གོམས་གཤིས་བཟང་པོ་རྣམས་དར་སྤེལ་གྱིས་རང་རྒྱུད་ལ་འཇགས་ཐབས་དགོས་པའི་བསྐུལ་མ་ཡང་གནང་ཡོད།
མཛད་རིམ་མཐའ་མར་སློབ་གྲྭའི་སློབ་སྤྱི་ལེགས་བཤད་ཉི་མ་ལགས་ཀྱིས་བཟང་སྤྱོད་ཀྱི་གལ་གནད་དང་། དེ་ཡང་ལས་སླ་པོར་བསྒྲུབས་ཐུབ་པ་ཞིག་ཡིན་སྐོར་གསུངས་པ་དང་བཅས་ཉིན་མོ་དེ་དོན་སྙིང་ལྡན་པའི་ངང་སྲུང་བརྩི་ཞུས་ཡོད་པ་བཅས།།
