༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།   བློ་གསལ་སྐྱེད་ཚལ་བོད་ཀྱི་སྐད་ཡིག་དང་རིག་གཞུང་སློབ་གྲྭ་ནི།  ཨ་རིའི་ནང་ཡོད་པའི་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཁྱབ་ཁོངས་ཀྱི་གཟའ་མཇུག་སློབ་གྲྭ་ཡིན་ཞིང་།  བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཁ་སྔོན་སློབ་གྲྭ་དེར་གཟིགས་སྐོར་གནང་བའི་གནས་ཚུལ་དང་འབྲེལ་ནས་བློ་གསལ་སྐྱེད་ཚལ་སློབ་གྲྭའི་སྤྱིའི་གནས་སྟངས་སྐོར་འདི་ཚེས་བདུན་ཉིན་ངོ་སྤྲོད་མདོར་བསྡུས་ཞུས་ཟིན།    

སློབ་གྲྭ་དེར་སློབ་ཕྲུག་ ༤༠༠ ལྷག་ཙམ་དང་།  འཛིན་ཁག་ ༢༨ ཙམ་ཡོད་པ་དེ།  བྱང་ཨ་རིའི་ནང་གཟའ་མཇུག་སློབ་གྲྭ་ ༢༠ ལྷག་ཙམ་ཡོད་པའི་ཁྲོད་ནས་གཞི་རྒྱ་ཆེ་ཤོས་དེ་ཡིན་ཞིང་།  སློབ་ཕྲུག་གྲངས་འབོར་ཤིན་ཏུ་མང་བར་བརྟེན་གཟའ་སྤེན་པ་དང་ཉི་མ་གཉིས་ཀར་འཛིན་གྲྭ་ཚོགས་དགོས་ཀྱི་ཡོད།  ཉེ་ཆར་རེས་གཟའ་ཉི་མའི་ཉིན་བོད་རིགས་འབྲེལ་མཐུད་པས།  སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་ཀྱི་ཕྱག་རོགས་གནང་འོག་གཟའ་ཉི་མའི་འཛིན་གྲྭར་གཟིགས་སྐོར་གནང་། ཞོགས་པའི་ཞལ་འདོན་སྐབས་སློབ་སྤྱི་རྒན་པ་ཚེ་རིང་སྟོབས་ལྡན་ལགས་ཀྱིས་སློབ་ཕྲུག་རྣམས་ལ་སྐུ་ཚབ་དོན་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་དང་།  སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་ངོ་སྤྲོད་གནང་རྗེས།  བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་སློབ་ཕྲུག་རྣམས་ལ་འཚམས་འདྲི་དང་འབྲེལ་བཀའ་མོལ་ཚིག་རེ་གཉིས་གསུང་པའི་སྐབས།  གཟའ་མཇུག་སློབ་གྲྭ་བཙུགས་དགོས་པའི་ཐོག་མའི་དམིགས་ཡུལ་དང་དེའི་ཕན་ཡོན་གང་ཡིན་པ།  རྒན་ལགས་དང་པཱ་ལགས་ཨ་མ་ལགས།  དེ་བཞིན་ཕ་མའི་ཚོགས་ཆུང་གི་ཚོགས་མི་བཅས་ཚང་མས་རེས་གཟའ་སྤེན་པ་དང་ཉི་མ་གུང་གསེང་ནམ་ཡིན་ལ་དུས་ཚོད་གཏོང་དགོས་དོན་ཡང་སློབ་ཕྲུག་ཚོའི་ཆེད་དུ་ཡིན་པ་ངོས་ཟིན་དགོས་པ།  བོད་མི་རིགས་ཀྱི་གཤིས་ཀ་བཟང་པོ་རང་རྒྱུད་ལ་འཇགས་པ་བྱེད་དགོས་པ་བཅས་ཀྱི་སྐོར་འགྲེལ་བརྗོད་དང་སྦྲགས།  སློབ་ཕྲུག་ཚོས་གོ་སྐབས་བཟང་པོ་འཕྲོ་བརླག་མི་གཏོང་བར།  བོད་སྐད་བོད་ཡིག་ལ་དམིགས་བསལ་གྱིས་དོ་སྣང་དགོས་པ་དང་།  བཀའ་དྲིན་ཅན་གྱི་ཕ་མའི་ཁ་ལ་ཉན་དགོས་པ།   ག་དུས་ཡིན་རུང་རོགས་ངན་པ་དང་མ་འཕྲད་པ་བྱེད་དགོས་པའི་འབོད་སྐུལ་གནང་།  དེ་རྗེས་གཟིགས་སྐོར་གནང་བཞིན་དུ།  སློབ་སྤྱི་རྒན་པས་འཛིན་གྲྭ་ཚང་མའི་གནས་སྟངས་དང་རྒན་ལགས་ཚོའི་རྒྱབ་ལྗོངས་ངོ་སྤྲོད་གནང་བར་གཞིགས་ན།  འཛིན་གྲྭ་ཇི་ཙམ་མཐོ་ན་འཛིན་གྲྭ་དེའི་སློབ་ཕྲུག་རྣམས་དེ་ཙམ་གྱིས་དོ་སྣང་དང་བརྩོན་པ་ཆེ་བ་ཡོད་པ་ནི།  བློ་གསལ་སྐྱེད་ཚལ་སློབ་གྲྭར་རྒྱུན་བསྲིངས་ནས་སློབ་སྦྱོང་བྱེད་ཐུབ་ན།  ཡར་རྒྱས་ཡོང་གི་ཡོད་པའི་རྟགས་མཚན་རེད་བསམ། དགེ་རྒན་གྱི་ཁྲོད་དགུང་ལོ་བགྲེས་གཞོན་སྣ་ཚོགས་ཡོད་པ་དང་།   དེ་སྔ་རྒྱ་གར་ནང་དགེ་རྒན་གནང་མྱོང་མཁན་འདུག་ལ།  གདན་ས་དང་བཤད་གྲྭ་ཁག་ཏུ་ལོ་མང་ཕྱག་དཔེ་གཟིགས་མྱོང་མཁན་ཡང་འདུག་པ་མ་ཟད།  གཞུང་ཞབས་གནང་མྱོང་མཁན་ཡང་འདུག་པ་ནི་བློ་གསལ་སྐྱེད་ཚལ་སློབ་གྲྭའི་ཁྱད་ཆོས་ཤིག་ཏུའང་མཐོང་།  བོད་རིགས་འབྲེལ་མཐུད་པས་དགེ་རྒན་ཚོས་དམིགས་བསལ་དུས་ཚོད་བཏང་སྟེ།  མ་འོངས་བོད་ཀྱི་སོན་རྩ་རྣམས་ཀྱི་ཆེད་དུ་རང་ནུས་གང་ལྕོག་ལེགས་སྐྱེས་འབུལ་བཞིན་པར་སྐུ་ཚབ་དོན་གཅོད་ལས་ཁུངས་ཀྱི་ཚབ་གནང་སྟེ་ཐུགས་རྗེ་ཆེ་ཞུས།  

བློ་གསལ་སྐྱེད་ཚལ་གཟའ་མཇུག་སློབ་གྲྭའི་སློབ་ཕྲུག་རྒན་པ་རྣམས་ཀྱི་འཛིན་གྲྭ་ཚུགས་སྟངས་དང་།  དགེ་རྒན་རྣམ་པས་སློབ་ཁྲིད་གནང་སྟངས་སོགས་སྐབས་དེའི་འདྲ་པར་དང་བརྙན་པར་མང་པོ་ཞིག་ཡོད་པ་ཚང་མ་དྲྭ་རྒྱར་གཤོངས་ཐབས་མེད་པས་ཡུ་ཁྲུབ་དྲྭ་ཐག་འདི་གཟིགས་ན་མ་འཐུས་པ་མེད་པ་བཅས། །