༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  ཨ་རིའི་གྲོང་ཁྱེར་ནིའུ་ཡོག་ནང་གི་བཀའ་བརྒྱུད་སྨོན་ལམ་ཐེངས་བཞི་པ་དེ།  ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༨ ནས་ ༢༠ བར་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིར་འདུ་ཚོགས་གནང་ཞིང་།  སྨོན་ལམ་གྲ་སྒྲིག་གི་གཙོ་འགན་བཞེས་མཁན་ནི་ཟླ་སྣང་ཐེབས་རྩ་ཁང་གི་སྤྱི་ཁྱབ་འགན་འཛིན་གནས་ནང་བླ་མ་ཚེ་དབང་ལགས་རེད།  བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་སྐུ་མགྲོན་གཙོ་བོ་དང་།  དཔལ་རྒྱལ་བ་ཀརྨ་པའི་སྐུ་མཆེད་སྲིང་མོ་ལགས་དམིགས་བསལ་སྐུ་མགྲོན་དུ་གདན་ཞུ་གནང་ཡོད་ཅིང་། དེ་མིན་བཀའ་ཟུར་དང་།  དོན་ཟུར།  གཞུང་ཁོངས་མ་ཡིན་པའི་ཚོགས་པ་ཆེ་ཁག་གི་ཚོགས་གཙོ་སོགས་སྐུ་མགྲོན་དུ་གདན་ཞུ་གནང་ཡོད།  སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཝ་ཤིང་ཀྲོན་དུ་སྔོན་ཚུད་ནས་བསྒྲིགས་འཁེལ་ཟིན་པའི་མཛད་རིམ་གཞན་ཡོད་པའི་དབང་གིས་ཕེབས་ཁོམ་མ་བྱུང་སྟབས། སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་དྲུང་ཟུར་ཀུན་དགའ་བཀྲ་ཤིས་ལགས་ཀྱིས་སྐུ་ཚབ་དོན་གཅོད་ཀྱི་ཚབ་གནང་སྟེ།  སྨོན་ལམ་དབུ་འཛུགས་ཀྱི་མཛད་སྒོར་མཉམ་ཞུགས་གནང་ཡོད། སྨོན་ལམ་གྲ་སྒྲིག་ཚོགས་ཆུང་གི་ཚོགས་གཙོ་གཞོན་པ་སྨན་པ་ཀུན་དགའ་ལགས་ཀྱིས་སྨོན་ལམ་དངོས་སུ་དབུ་ཚུགས་པའི་གསལ་བསྒྲགས་དང་འབྲེལ་ངོ་སྤྲོད་གསུང་བཤད་མདོར་བསྡུས་ཤིག་གནང་སྐབས་གསུང་དོན་ལ།   དེ་རིང་ནི་བཀའ་བརྒྱུད་སྨོན་ལམ་ཐེངས་བཞི་པ་ཡིན་པ་དང་།  ད་ལྟའི་དུས་འདིར་བཀའ་བརྒྱུད་སྨོན་ལམ་འདུས་དགོས་དོན་གཙོ་བོ་ནི།  བོད་ཕྱི་ནང་གཉིས་ཀར་བྱུང་དང་འབྱུང་བཞིན་པའི་ཏོག་དབྱིབས་ནད་ཡམས་ཀྱི་དཀའ་ངལ་མྱུར་དུ་ཞི་བ་དང་།  འཛམ་གླིང་ཞི་བདེ་ཡོང་བ།  ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་རིས་མེད་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པ་བསྟན་འགྲོའི་དོན་དུ་སྐུ་ཚེ་ཡུན་རིང་བརྟན་ཅིང་།  ཐུགས་བཞེད་ལྷུན་གྱིས་འགྲུབ་པའི་ཐུགས་སྨོན་གནང་རྒྱུ་དེ་རེད།  ཅེས་གསུངས།སྨོན་ལམ་གྲ་སྒྲིག་ཚོགས་ཆུང་བརྒྱུད་ཤེས་རྟོགས་བྱུང་བར་གཞིགས་ན།  སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་ཁོར་ཡུག་འབག་བཙོག་མི་སོང་བར།  སྲུང་སྐྱོབ་བྱེད་དགོས་པའི་བཀའ་སློབ་ཡང་ཡང་ཕེབས་པའི་དགོངས་གཞི་ལྟར།  ཐེངས་འདིའི་སྨོན་ལམ་སྐབས་གསོལ་ཇ་ཞལ་འབྲས་དང་།  ཞལ་ལག ཆབ་སོགས་བཞེས་རྒྱུའི་ཡོ་བྱད་ཡོངས་རྫོགས་ཁོར་ཡུག་ལ་གནོད་པའི་འགྱིག་སྣོད་བེད་སྤྱོད་མི་དགོས་པ་གཙོ་འདོན་གནང་ཡོད་པ་མ་ཟད།   སྨོན་ལམ་གྱི་མཛད་རིམ་དང་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་།  དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་སྐུ་དཔར་བཞུགས་ཁྲིར་གདན་ཞུ་དང་།  སྐུ་མགྲོན་གཙོ་བོ་དང་།  དམིགས་བསལ་སྐུ་མགྲོན།  སྐུ་མགྲོན་རྣམ་པ་བཅས་ནས་མཎྚལ་རྟེན་གསུམ་འདེགས་འབུལ་གྲུབ་རྗེས།  མཛེས་སྡུག་ཡིད་དུ་འོང་བའི་ཁོར་ཡུག་ཅིག་སྐྲུན་རྒྱུའི་རྟེན་འབྲེལ་མཚོན་སླད་ཕུན་ཚོགས་སྡེ་བཞི་ཚོགས་ཁང་གི་གཟིམ་སྒོའི་མདུན་དུ་ཤུག་པ་འདེབས་འཛུགས་གནང་ཞིང་།  སྨོན་ལམ་ལེགས་པར་གྲུབ་རྗེས་ཟླ་སྣང་ཐེབས་རྩ་ཁང་གིས་ཐུགས་འགན་རྐང་བཞེས་གནང་སྟེ་སྤྱི་ཁང་ཕུན་ཚོགས་སྡེ་བཞིའི་མཐའ་སྐོར་དུ་ཤིང་སྣ་འཛུགས་གནང་འཆར་ཡོད་པ་རེད་འདུག  སྨོན་ལམ་ཉིན་མཐའ་མ་སྟེ་རེས་གཟའ་ཉི་མ་ཉིན་རྒྱབ་ཆུ་ཚོད་བཞི་པའི་ཐོག་མར་མེའི་སྨོན་ལམ་གསུང་འདོན་དང་།  དེ་རྗེས་གླུ་ཡི་མཆོད་པ་འབུལ་བའི་ལམ་ནས་བཀའ་བརྒྱུད་སྨོན་ལམ་ཐེངས་བཞི་པ་མཇུག་སྡོམ་གནང་རྒྱུ་ཡིན་པ་བཅས།  །