༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་བསྟན་པ་ཡར་འཕེལ་ལགས་ཀྱིས་སྣེ་ཁྲིད་འོག སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་དབང་འདུས་རྡོ་རྗེ་ལགས་བཅས་ལས་གྲུབ་པའི་སྤྱི་འཐུས་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༢ ཟླ་ ༡༡ ཚེས་ ༢༡ ཉིན་ཡུ་རོབ་རྒྱལ་ཁབ་ལི་ཐུ་ཝེ་ནི་ཡའི་ (Lithuania) རྒྱལ་ས་ཝིལ་ནི་ཡེ་སེ་ (Vilnius) རུ་ལི་ཐུ་ཝེ་ནི་ཡའི་གྲོས་ཚོགས་ཀྱི་ཚོགས་གཙོ་གཞོན་པ་སྐུ་ཞབས་ཝི་ཊའོ་ཊ་སེ་ མི་ཊ་ལ་སེ་ (Vytautas Mitalas, Deputy speaker of the Seimas and member of the Committee on Budget and Finance) མཆོག་དང་། ལི་ཐུ་ཝེ་ནི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨན་ཌིར་ཡ་སེ་ན་ཝིག་ཀ་སེ་ (Andrius Navickas, Chair of the Tibet support group of the Parliament) ལགས། ལི་ཐུ་ཝེ་ནི་ཡའི་གྲོས་ཚོགས་འཐུས་མི་སྐུ་ཞབས་ (Arunas Valinskas) ལགས། ལི་ཐུ་ཝེ་ནི་ཡའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ཛི་གྷི་མན་ཊ་སེ་པེ་ཝི་ལོན་སེ་ (Žygimantas Pavilionis, Chair of the Seimas Committee on Foreign Affairs) ལགས་བཅས་དང་ལྷན་མཇལ་འཕྲད་ཀྱིས་རྒྱ་ནག་དམར་གཞུང་འོག་བོད་ནང་གི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། ཁོར་ཡུག་བཅས་ཀྱི་གནས་སྟངས་ཧ་ཅང་ཛ་དྲག་ཆགས་ཡོད་པའི་སྐོར་སྙན་སེང་ཞུས་པ་དང་སྦྲགས།བོད་དོན་ཐོག་སྔར་ལྷག་རྒྱབ་སྐྱོར་ཡོང་བའི་འབོད་སྐུལ་ཞུས་གནང་ཡོད་པ་མ་ཟད། ལྷག་པར་དུ་ལི་ཐུ་ཝེ་ནི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨན་ཌིར་ཡ་སེ་ན་ཝིག་ཀ་སེ་ (Mr. Andrius Navickas, Chair of the Tibet support group of the Parliament) ལགས་དང་ལྷན་གྲོས་ཚོགས་སུ་བོད་ནང་གི་ད་ལྟའི་ཛ་དྲག་གནས་སྟངས་ཐོག་གསར་འགོད་གསལ་བསྒྲགས་ཤིག་ཀྱང་སྤེལ་གནང་ཡོད་པ་བཅས། །