༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༢༩ ཉིན་གྱི་སྔ་དྲོ་ཧི་མཱ་ཅལ་མངའ་སྡེ་གཞུང་གི་ཁྲལ་འབབ་དང་ཤིང་ནགས་ལས་ཁུངས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཨོན་ཀར་ཅནྟ་ཤར་མ་ (Onkar Chand Sharma) ལགས་དང་ཁོང་གི་ནང་མི་ལྷན་རྒྱས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཕེབས་འབྱོར་སྐབས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཕེབས་བསུའི་སྣེ་ལེན་ཞུས་གནང་ཡོད།
དེ་རྗེས་སྐུ་ཞབས་ཨོན་ཀར་ཅནྟ་ཤར་མ་ལགས་དང་། ཁོང་གི་ནང་མི་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་གྲུབ་རྗེས་སྐུ་ཞབས་ཨོན་ཀར་ཅནྟ་ཤར་མ་ལགས་ཀྱིས་གམ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་ལས་ཁུངས་སུ་ནང་སྲིད་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་དང་ཐུག་འཕྲད་གནང་སྟེ་ཧི་མཱ་ཅལ་མངའ་སྡེའི་ནང་བོད་མི་ཚོར་དཀའ་ངལ་འཕྲད་བཞིན་པའི་ས་ཆ་བོགས་གཏོང་དང་བསྐྱར་གསོ་ཡིག་ཆའི་སྐོར་གྲོས་བསྡུར་གནང་ཡོད་པ་དང་། སྐབས་དེར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སྐུ་ཞབས་ཨོན་ཀར་ཅནྟ་ཤར་མ་ལགས་ལ་ཞུ་ཡིག་ཅིག་ཕུལ་ཏེ་རྒྱ་གར་དབུས་ནང་སྲིད་ལས་ཁུངས་ནས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ གཏན་འབེབས་གནང་བའི་ཆ་རྐྱེན་འོག་ཧི་མཱ་ཅན་མངའ་སྡེ་གཞུང་ནས་བོད་མི་ཚོར་འཕྲད་བཞིན་པའི་ས་ཆ་བོགས་གཏོང་དང་བསྐྱར་གསོ་ཡིག་ཆའི་དཀའ་ངལ་སེལ་ཐབས་གནང་དགོས་པའི་རེ་སྐུལ་ཞུས་གནང་ཡོད།
ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་ལྷན་དུ་དྲུང་གཞོན་དངོས་གྲུབ་འོད་ཟེར་ལགས་དང་། རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས། གམ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་འཛིན་སྐྱོང་འགན་འཛིན་རྣམ་པ་བཅས་ལྷན་བཅར་གནང་ཡོད་པ་བཅས།།
