༄༅། །ཕྱི་ལོ་ ༢༠༢༢ ཟླ་བ་ ༡༡ ཚེས་ ༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བསྟན་འཛིན་སྒང་བོད་མིའི་གཞིས་ཆགས་སུ་གཞིས་མི་རྣམས་ལ་གསུང་བཤད་དང་། དེ་བཞིན་མང་ཚོགས་ཀྱི་དྲི་བ་ཁག་ལ་ལན་འདེབས་གནང་ཡོད།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན།  ངས་འོས་བསྡུའི་སྐབས་བོད་མི་མང་ཚོགས་ནས་ང་ལ་འགན་བསྐུར་བ་ཡིན་ན། ལོ་ལྔའི་ནང་བཙན་བྱོལ་བོད་མིའི་འདུས་སྡོད་ས་གནས་ཁག་ཏུ་ཉུང་མཐར་ཐེངས་གཉིས་བཅར་ཐུབ་པ་བྱེད་རྒྱུ་ཡིན་ཞེས་ཁས་ལེན་བྱས་ཡོད་པ་བཞིན་ད་ཐེངས་ས་གནས་འདིར་བཅར་རྒྱུ་བྱུང་། མ་འོངས་པར་བསྐྱར་དུ་བཅར་རྒྱུའི་གོ་སྐབས་ཏན་ཏན་ཡོང་གི་རེད། དེང་སང་སྤྱི་ཚོགས་དྲ་རྒྱའི་ནང་རྒྱ་ནག་གཞུང་གིས་གཙོས་བོད་མི་ཁག་གཅིག་གིས་ཆེད་དུ་དཀྲོག་གཏམ་རིགས་བཟོས་ནས་བཙན་བྱོལ་བོད་མིའི་སྤྱི་ཚོགས་ཁྲོད་དཀྲུག་ཤིང་རྒྱག་གི་ཡོད་པས། དེའི་རིགས་ལ་མགོ་འཁོར་ནས་སྡོད་རྒྱུ་མེད། བོད་མིའི་སྒྲིག་འཛུགས་ནི་ང་ཚོའི་ནང་ཆེ་ཤོས་དེ་ཡིན་ཞིང་། དེའི་ནང་ང་ཚོ་ཚུད་ཀྱི་ཡོད་སྙམ་པ་ཡིད་ལ་བཅངས་དགོས། རྣམ་པ་ཚོས་བོད་མིའི་སྒྲིག་འཛུགས་ཀྱི་སྐོར་ཤེས་རྟོགས་ཐུབ་པ་ཡིན་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་མིར་བཀའ་དྲིན་ཆེན་པོ་ཡིན་པ་ཤེས་རྟོགས་ཡོང་གི་རེད། བོད་ནས་ཕེབས་པའི་མི་རབས་རྒན་པ་ཚོས་སྐུ་ལས་ཧ་ཅང་བསྐྱོན་གནང་ཡོད། ཅེས་དང་། གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་མང་གཙོའི་འཕེལ་རིམ་སྐོར་གསུངས་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ལོར་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་མཛད་པའི་སྐོར་དང་།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོར་མང་གཙོ་གསོལ་རས་སྩལ་བ་དེ་བོད་མི་རྣམས་ཀྱིས་བདག་པོ་རྒྱག་དགོས་པ་ཧ་ཅང་གལ་ཆེན་པོ་ཡིན་པའི་སྐོར་གསུངས།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་བདུན་གྱི་ལས་དོན་གནང་ཕྱོགས་དང་ཁྱབ་ཁོངས་སྡེ་ཚན་ཁག་གི་སྐོར།  རང་ཁ་རང་གསོ་བྱེད་པར་གཞན་བརྟེན་གྱི་བསམ་བློ་དོར་དགོས་པ། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ནས་རྒན་འཁོགས་རྣམས་ལ་ལྟ་རྟོག་གནང་རྒྱུ་ཡིན་པ།  དེ་བཞིན་འཕྲོད་བསྟེན་ལས་ཁུངས་ནས་དབང་པོ་ཐང་པོ་མེད་པ་དང་སེམས་ཁམས་བདེ་པོ་མེད་མཁན་རྣམས་ལ་ལྟ་རྟོག་གནང་རྒྱུ་ཡིན་པ་སོགས་ཀྱི་སྐོར་དང་། དེ་བཞིན་སློབ་གྲྭ་ཁག་གཅིག་མཁོ་བསྡུ་བྱས་ནས་མཐུན་རྐྱེན་བཟང་དུ་ཕྱི་ལྟར་གཏོང་དགོས་པའི་སྐོར་བསམ་བློ་གཏོང་བཞིན་ཡོད་པ་དང་། ད་ལྟའི་ཆར་དཀའ་ངལ་ཆེ་ཤོས་ཤིག་ནི། བོད་ནས་གསར་དུ་ཕེབས་པ་རྣམས་ཀྱི་དཀའ་ངལ་སྐོར་བསམ་བློ་གཏོང་དགོས་ཀྱི་ཡོད་པ། དེ་དག་གི་ཁོངས་ནས་མང་པོ་ཞིག་རྡ་ས་མེ་གྷན་དང་ནོར་གླིང་། སྡེ་ར་ལྡུན། ལྡི་ལི། བལ་ཡུལ་བཅས་སུ་ཁང་གླ་སྤྲད་ནས་གནས་ཡོད་པ་སོགས་ཀྱི་སྐོར་གསུང་བཤད་གནང་རྗེས་མང་ཚོགས་ཀྱི་དྲི་བ་ཁག་ལ་ལན་འདེབས་གནང་ཡོད། །