༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༧ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀྲུ་ཀྲིང་ངེས་གསང་མདོ་སྔགས་བྱང་ཆུབ་དར་རྒྱས་གླིང་དགོན་གྱི་མདུན་དུ་ས་གནས་མང་ཚོགས་ལ་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་བའི་སྙིང་པོར། དེང་སང་མི་མང་པོར་དེང་དུས་དང་མཐུན་པའི་ལག་ཐོག་ཁ་པར་ཡོད་སྟབས། ལག་ཐོག་ཁ་པར་བརྒྱུད་བླ་མ་རྣམ་པའི་གསུང་ཆོས་ཡང་ཡང་ཉན་པ་ཡིན་ན་སོ་སོའི་ཚེ་འདི་ཕྱི་གཉིས་ལ་ཕན་ཐོགས་ཡོང་གི་རེད། དེ་བཞིན་སྔ་དྲོ་ཡོན་ཆབ་འབུལ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བསྟན་བདག་བླ་ཆེན་རྣམ་པ་སྐུ་ཚེ་བརྟན་སླད་སྨོན་ལམ་རྒྱག་དགོས་པ་ཧ་ཅང་གལ་ཆེན་པོ་རེད། རྒྱ་གར་གཞུང་གིས་བཙན་བྱོལ་བོད་མི་རྣམས་ལ་རོགས་རམ་ཧ་ཅང་ཆེན་པོ་གནང་དང་གནང་བཞིན་ཡོད། རྒྱ་གར་གཞུང་མེད་ན་བོད་མིའི་སྒྲིག་འཛུགས་དང་བཙན་བྱོལ་བོད་མིའི་གཞིས་ཆགས་ཁག་ད་ལྟ་ནང་བཞིན་གནས་སྟངས་ཡག་པོ་ཡོང་རྒྱུ་ཧ་ཅང་ཁག་པོ་རེད། དེར་བརྟེན་རྒྱ་གར་གཞུང་མང་གཉིས་ནི་ང་ཚོ་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་རེད། ལྷག་པར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་རབ་དང་རིམ་པས་ས་གནས་བོད་མི་རྣམས་ལ་མཐུན་འགྱུར་རོགས་རམ་གནང་ཡོད་པས། ང་ཚོས་ཁོང་རྣམ་པའི་བཀའ་དྲིན་དྲན་དགོས་རྒྱུ་ཤིན་ཏུ་གལ་ཆེན་པོ་རེད། ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་གསུམ་བཅས་ཀྱི་སྐོར་ཤེས་རྟོགས་དགོས་པ་དང་། ཆོས་རིག་ལྷན་ཁང་འོག་དེབ་སྐྱེལ་ཡོད་པའི་རྒྱ་བལ་འབྲུག་གསུམ་ནང་དགོན་སྡེ་གྲངས་ ༢༨༨ ཡོད་པའི་ཁྲོད་ནས་གྲྭ་བཙུན་དང་སྔགས་པ་ཁྱོན་བསྡོམས་ ༤༢༠༠༠ ཡོད། གྲྭ་བཙུན་སྔགས་གསུམ་ ༤༢༠༠༠ ཡོད་པའི་ནང་ནས་ ༢༨༠༠༠ ཧི་མ་ལ་ཡ་རི་རྒྱུད་ནས་ཡིན་པ། བརྒྱ་ཆ་གཅིག་ཙམ་སོག་རིགས་ཡིན་པ། དེ་བཞིན་བཙན་བྱོལ་བོད་མིའི་སློབ་གྲྭ་ཁག་ཏུ་ཧི་མ་ལ་ཡ་རི་རྒྱུད་ཀྱི་སློབ་མ་ཕལ་ཆེར་ ༦༠༠༠ ཙམ་ཡོད་པ་དང་། ཧི་མ་ལ་ཡ་རི་རྒྱུད་ཀྱི་མི་རིགས་དང་ང་ཚོའི་ཆོས་དང་རིག་གཞུང་སོགས་གཅིག་པ་ཡིན་པ། ང་ཚོ་ཕན་ཚུན་གཅིག་གིས་གཅིག་ལ་རོགས་རམ་བྱེད་ཀྱི་ཡོད་པ། ནང་སྲིད་ལས་ཁུངས་ཀྱི་ཁྱབ་ཁོངས་སུ་རྒྱ་གར་གྱི་མངའ་སྡེ་ཁག་བཅུའི་ནང་བཙན་བྱོལ་བོད་མིའི་གཞིས་ཆགས་ཁག་གནས་ཡོད་པ་སོགས་ཀྱི་སྐོར་གསུངས་ཡོད་པ་བཅས།། 
