༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༡༤ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གུ་ཝཱ་ཧཱ་ཊི་ནས་དིམཱཔུར་དུ་ཕེབས་ཐོན་གནང་ཡོད་པ་དང་། གནམ་ཐང་དུ་ཕེབས་འབྱོར་སྐབས་ས་གནས་འོས་བསྡུའི་འགན་འཛིན་དང་། ས་གནས་རང་བདེན་ཚོགས་ཆུང་གི་ཚོགས་གཙོ། དིམཱཔུར་དང་ཀོ་ཧི་མ་ས་གནས་ཀྱི་གཞུང་དང་གཞུང་ཁོངས་མིན་པའི་ཚོགས་སྐྱིད་ཁག་གི་ཚོགས་གཙོ་དང་སྐུ་ཚབ། དེ་བཞིན་མང་ཚོགས་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དཔལ་ལྡན་སྲིད་སྐྱོང་མཆོག་མི་མང་ཚོགས་ཁང་དུ་ཕེབས་འབྱོར་རྗེས་ས་གནས་ཀྱི་བོད་མི་མང་ཚོགས་ལ་ཐུག་འཕྲད་དང་འབྲེལ། ཚོགས་འདུར་ས་གནས་རང་བདེན་ཚོགས་ཆུང་གི་ཚོགས་གཙོ་ནས་ས་གནས་ཀྱི་གནས་སྟངས་དང་ལས་བསྡོམས་སྙིང་བསྡུས་སྙན་སྒྲོན་ཞུས་ཟིན་རྗེས་དཔལ་ལྡན་སྲིད་སྐྱོང་མཆོག་གིས་མང་ཚོགས་ལ་གསུང་བཤད་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་དཔལ་ལྡན་བཀའ་ཤག་གི་དགོངས་གཞི་དང་ལས་དོན་གནང་ཕྱོགས། དེ་བཞིན་འདས་པའི་ལོ་གཅིག་དང་ཕྱེད་ཀའི་ནང་ལས་དོན་གལ་ཆེ་ཁག་གཅིག་དང་། གཞིས་སྒར་ཁག་ལ་འཚམས་གཟིགས་ཙམ་མིན་པར་ས་གནས་སོ་སོའི་གནས་སྟངས་རྒྱུས་ལོན་དང་། མང་ཚོགས་ཀྱི་དཀའ་ངལ་རྟོགས་ཞིབ་གནང་རྒྱུ་སོགས་ཀྱི་སྐོར་འགྲེལ་བརྗོད་གནང་བ་དང་། རང་རེའི་སློབ་གྲྭ་ཁག་དང་སློབ་ཕྲུག་གི་གནས་སྟངས། ཕྲུག་གུ་སྐྱེས་ཚད་ཉུང་དུ་འགྲོ་བཞིན་པ་དང་དེའི་སྐྱོན་གནད། གཞིས་ཆགས་ཁག་སྲ་བརྟན།  བོད་ཀྱི་རྒྱལ་རབས་ལོ་རྒྱུས་དང་འབྲེལ་བའི་སྐོར་དང་། གཞན་ཡང་རང་རེའི་རྩ་དོན་དང་འབྲེལ་བའི་སྐོར། རྒྱ་གར་དང་ནུབ་ཕྱོགས་རྒྱལ་ཁབ་ནས་རྒྱ་ནག་ཐོག་བལྟ་ཚུལ་དང་སྔར་ལྷག་དོ་སྣང་ཇེ་ཆེར་འགྲོ་བཞིན་པའི་སྐོར། དེ་བཞིན་མང་ཚོགས་ནང་ཁུལ་འཆམ་མཐུན་དགོས་གལ་ཤིན་ཏུ་ཆེ་བ་སོགས་ཀྱི་སྐོར་གསུང་བཤད་གནང་ཡོད།ཉིན་རྒྱབ་དཔལ་ལྡན་སྲིད་སྐྱོང་མཆོག་དིམཱཔུར་ནས་གུ་ཝཱ་ཧཱ་ཊི་བརྒྱུད་རྒྱ་གར་གྱི་རྒྱལ་ས་ལྡི་ལིར་ཕེབས་ཐོན་གནང་སྟེ་ཐེངས་འདིའི་དཔལ་ལྡན་སྲིད་སྐྱོང་མཆོག་གི་རྒྱ་གར་བྱང་ཤར་ཁུལ་གྱི་བོད་མིའི་གཞིས་ཆགས་ཁག་དང་བོད་མིའི་འདུས་སྡོད་ཁག་ལ་གཞུང་འབྲེལ་འཚམས་གཟིགས་ཆ་ཚང་ལེགས་པར་གྲུབ་ཡོད་པ་བཅས།།