༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་ཡོད་པའི་ཀྲུ་ཀྲིང་ཁུལ་གྱི་འཚམས་གཟིགས་ལེགས་པར་གྲུབ་སྟེ་བསྟན་འཛིན་སྒང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་བསྟན་འཛིན་རིན་ཆེན་ལགས་དང་། དཔལ་ལྡན་རྒྱུད་སྟོད་གྲྭ་ཚང་གི་ཕྱག་མཛོད་ངག་དབང་ཐབས་མཁས་ལགས། ས་གནས་འཐུས་ཚོགས་ཀྱི་ཚོགས་གཙོ་ཕུན་ཚོགས་ཚེ་རིང་ལགས། ས་གནས་རང་བདེན་ཚོགས་གཙོ་བཀྲ་ཤིས་ཚེ་རིང་ལགས། ས་གནས་མཉམ་འབྲེལ་ཚོགས་གཙོ་སྲི་ཐར་ཚེ་རིང་ལགས་དང་མཉམ་དྲུང་རིན་ཆེན་དབང་ཕྱུག་ལགས། ས་གནས་བུད་མེད་ལྷན་ཚོགས་ཀྱི་སྐུ་ཚབ་བསྟན་འཛིན་སྒྲོལ་མ་ལགས། ནུབ་ཀ་མེངྒ་རྫོང་དཔོན་གཞོན་པ་ཀརྨ་ལེགས་སྐྱེས་ལགས། ཀ་ལག་ཐང་གི་རྫོང་དཔོན་ལས་འཕར་ཨ་ནུ་བྷ་མིངྒ་ལགས། རུ་པའི་རྫོང་དཔོན་ལས་འཕར་སུ་རཱཇ་གུ་རུང་ལགས། སྤྱི་ཁྱབ་སྐོར་སྲུང་བ་ཀེཀ་ཌེམ་ལིན་གོ་ལགས། མི་མང་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་དཔལ་ལྡན་རྒྱུད་སྟོད་གྲྭ་ཚང་དུ་མཆོད་མཇལ་དང་། དེ་བཞིན་ཀུ་ཤུ་དང་ཀི་ཝི་འདེབས་ལས་ཀྱི་ལས་གཞིར་གཟིགས་ཞིབ་གནང་རྗེས་ས་གནས་ཀྱི་གཞུང་དང་གཞུང་ཁོངས་མིན་པའི་སྒྲིག་འཛུགས་ཁག་གི་སྐུ་ཚབ་དང་མཇལ་མོལ་གནང་ཡོད།
ཕྱི་ཚེས་ ༩ ཉིན་དཔལ་ལྡན་སྲིད་སྐྱོང་མཆོག་གིས་ས་གནས་འགོ་འཛིན་ལས་ཁུངས་དང་། ས་གནས་འཐུས་ཚོགས། ས་གནས་རང་བདེན་ཚོགས་ཆུང་། མཉམ་འབྲེལ་དང་དེའི་སྡེ་ཚན་ཁག སཾ་བྷོ་ཌ་ཉིན་སློབ་བཅས་སུ་འཚམས་གཟིགས་དང་། གཞིས་མི་རྣམས་ལ་གསུང་བཤད་དང་དྲི་བ་དྲིས་ལན་གནང་རྒྱུ་ཡིན་པ་བཅས།།
