༄༅། །འདི་གར་ཐའེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༧ ཉིན་ཐའེ་ཝན་དུ་སྙན་གྲགས་ཆེ་བའི་ཆབ་སྲིད་སློབ་ཆེན་ནས་ཐའེ་ཝན་དོན་ཁང་གི་ལྟ་གྲུབ་སློབ་དཔོན་དགེ་བཤེས་བསྟན་འཛིན་རྣམ་གྲོལ་རིན་པོ་ཆེ་ལ་བོད་བརྒྱུད་ནང་བསྟན་དང་འབྲེལ་བའི་སྤྲུལ་སྐུའི་ཡང་སྲིད་སྐོར་ལ་དོན་གཉེར་ཅན་གྱི་སློབ་མ་རྣམས་ལ་ངོ་སྤྲོད་གནང་བའི་གདན་འདྲེན་ཞུས་པ་བཞིན། རིན་པོ་ཆེ་མཆོག་གིས་ཀྱང་དུས་ཁོམས་ཡོད་མེད་ལ་མ་ལྟོས་པར་དགའ་ཚོར་ངང་དང་ལེན་ཞུས་ཏེ་ངོ་སྤྲོད་ཀྱི་གསུང་བཤད་གནང་ཡོད་པ་རེད།
སྤྱིར་གསུང་བཤད་ཀྱི་དུས་ཡུན་ཁྱོན་ཆུ་ཚོད་གཉིས་ཡིན་པ་དང་། དེའི་ནང་ནས་གོ་སྒྲིག་པས་ཆུ་ཚོད་ཕྱེད་ཀ་སློབ་ཕྲུག་ཚོར་དྲི་བ་དྲི་ལན་གྱི་གོ་སྐབས་གནང་རོགས་གསུངས་པ་ལྟར། རྣམ་གྲོལ་རིན་པོ་ཆེ་ནས་དང་ཐོག་རང་ཉིད་ཀྱི་རྒྱབ་ལྗོངས་ལོ་རྒྱུས་མདོར་ཙམ་ངོ་སྤྲོད་གནང་རྗེས་གསུང་བཤད་ཀྱི་བརྗོད་གཞི་གཙོ་བོ་དོན་ཚན་ལྔ་སྟེ། དང་པོ། ནང་པས་སྐྱེ་བ་སྔ་ཕྱི་ངོས་འཛིན་བྱེད་སྟངས་ཀྱི་སྐོར། གཉིས་པ། ནང་ཆོས་ཀྱི་སྐུ་བཞིའི་རྣམ་གཞག གསུམ་པ། བོད་ཀྱི་སྤྲུལ་སྐུའི་ཡང་སྲིད་ཀྱི་བྱུང་རིམ། བཞི་པ། དེང་སང་ཡང་སྲིད་ངོས་འཛིན་གྱི་བརྒྱུད་རིམ། ལྔ་པ། ཡང་སྲིད་ངོས་འཛིན་དེ་རྒྱལ་སྤྱིའི་དོན་གནད་ཅན་དུ་གྱུར་ཚུལ་བཅས་རེ་རེ་བཞིན་ངོ་སྤྲོད་གནང་བ་དང་། རིན་པོ་ཆེ་མཆོག་ནས་སློབ་ཕྲུག་ཚོར་ནན་བཤད་ངང་གསུང་དོན། ཡང་སྲིད་ཐད་གོ་བ་ལེགས་པོ་ཆགས་པ་ལ་ཐོག་མར་ནང་ཆོས་ནས་བཤད་པའི་སྐྱེ་བ་སྔ་ཕྱིའི་ཐད་ལ་རྒྱུས་ལོན་ཡག་པོ་དགོས་སྐོར་དང་། ཚེ་འདི་ཕྱི་གཉིས་དང་ཚེ་སྔ་མ་བཅས་ལ་ཁྱབ་པའི་རིགས་འདྲའི་རྒྱུན་གྱི་རྣམ་ཤེས་ཟེར་བ་ཞིག་དགོས་མིན་གྱི་འགྲེལ་བརྗོད་དང་།
དེ་བཞིན་ཐའེ་ཝན་གྱི་ལྟ་གྲུབ་སློབ་དཔོན་དམ་པ་དགེ་བཤེས་བྱམས་པ་རྒྱ་མཚོ་ལགས་ཕྱི་ལོ་ ༢༠༢༠ ལོར་དགོངས་པ་རྫོགས་སྐབས་ཉིན་གྲངས་ཉི་ཤུ་རྩ་བརྒྱད་ཐུགས་དམ་དུ་བཞུགས་རིང་། ཐའེ་ཝན་ཞིབ་འཇུག་ལྟེ་གནས་ཁང་གི་མི་སྣ་གཙོ་བོ་ལི་ཏིང་གོ་ལགས་སོགས་དངོས་ཁམས་ཚན་རིག་མི་སྣ་དྲུག་ནས་དེང་དུས་འཕྲུལ་ཆས་བེད་སྤྱད་དེ་དགེ་བཤེས་ལགས་ཀྱི་ཕུང་པོར་ཞིབ་འཇུག་གནང་བའི་བརྙན་པར་དང་བཅས་པ་ངོ་སྤྲོད་ཐོག་ནས་རྣམ་ཤེས་ཟེར་བ་ཞིག་ཁས་མ་ལེན་ན་གོང་གསལ་གྱི་གནས་ཚུལ་དེ་རིགས་རྒྱུ་མཚན་གང་གིས་ཐོག་ནས་འགྲེལ་བཤད་བྱ་དགོས་མིན་དང་། དེ་བཞིན་བདེན་བཞི་ངོ་སྤྲོད་དང་འབྲེལ་རྟེན་འབྲེལ་ཡན་ལག་བཅུ་གཉིས། འཕགས་ལམ་ཡན་ལག་བརྒྱད་བཅས་སློབ་ཕྲུག་གི་ཉིན་རེའི་འཚོ་བ་དངོས་དང་སྦྱར་ནས་འགྲེལ་བརྗོད་བྱེད་རྒྱུའི་གོ་སྐབས་བྱུང་ཡོད་པ་རེད།
དེ་རྗེས་སློབ་ཕྲུག་ཚོས་སྤྲུལ་སྐུ་ཡང་སྲིད་ནང་དུ་བུད་མེད་ཡོང་སྲིད་མིན་དང་། མི་འདས་ཚར་རྗེས་བྱ་གཏོར་བྱེད་དགོས་པའི་རྒྱུ་མཚན། སྤྲུལ་སྐུ་ཡང་སྲིད་དུ་ངོས་འཛིན་བྱུང་བ་ཞིག་གིས་སྐུ་གོང་མའི་རྒྱུ་ནོར་ཤུལ་བཞག་རྒྱུད་འཛིན་བྱེད་སྟངས། ཐུགས་དམ་གྱི་དོན་སྙིང་སོགས་དྲི་བ་མང་པོ་ཕེབས་པར་རིན་པོ་ཆེ་མཆོག་ནས་ལན་འདེབས་གསལ་ཞིང་ཕྲ་བ་གནང་སྟེ། སྙན་གྲགས་ཅན་གྱི་སློབ་གྲྭ་དེའི་སློབ་མ་ཚོས་བོད་ཀྱི་ཆོས་དང་རིག་གཞུང་ལ་ངེས་ཤེས་སྙེད་ཐུབ་པ་ཞིག་བྱུང་ཡོད་པ་བཅས། །
