༄༅། །འདི་གར་ཐའེ་ཝན་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༡༡ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་ལས་བྱེད་རྣམ་པས་སྐྱབས་རྗེ་ཀིརྟི་རིན་པོ་ཆེ་མཆོག་ཐའེ་ཝན་དུ་ཕེབས་བསུའི་མཇལ་བཅར་ཞུས་ཡོད་པ་རེད།
མཇལ་བཅར་སྐབས་སུ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་དོན་གཅོད་ལས་ཁུངས་ཀྱི་ལྟ་གྲུབ་དགེ་རྒན་དང་ལས་བྱེད་རྣམས་རིན་པོ་ཆེ་མཆོག་ལ་ངོ་སྤྲོད་ཞུས་པ་དང་། རིན་པོ་ཆེ་མཆོག་གིས་ཐའེ་ཝན་དུ་ཕེབས་དོན་གཙོ་བོ་ཇི་ཡིན་སྐོར་དང་། ཐའེ་ཝན་རྒྱལ་ཁབ་དེ་བཞིན་ད་ལྟ་འཛམ་གླིང་ནང་དོ་སྣང་ཆེ་ཤོས་བྱེད་སའི་རྒྱལ་ཁབ་ཅིག་ཆགས་པའི་སྐབས་ཀྱི་གོ་སྐབས་དང་བསྟུན་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་གཙོས་ལས་བྱེད་རྣམས་ནས་རྒྱལ་སྤྱིའི་ནང་བོད་དོན་དྲིལ་བསྒྲགས་ཀྱི་ལས་དོན་སོགས་གང་ལེགས་འབད་བརྩོན་གནང་གི་ཡོད་པ་ཉིན་ལྟར་རླུང་འཕྲིན་སོགས་ནས་གོ་ཐོས་འབྱུང་བཞིན་འདུག་ཅེས་བསྔགས་བརྗོད་གནང་ཡོད།
དེ་ནས་རིན་པོ་ཆེ་མཆོག་དེ་སྔ་བོད་མདོ་སྨད་ནས་ལྷ་སར་ཐོག་མར་ཕེབས་སྐབས་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་དགེ་བཤེས་ལྷ་རམས་པའི་དམ་འཇོག་གི་མཛད་སྒོ་ཆེན་པོའི་དུས་སྐབས་དང་ཁེལ་འདུག་པར་མཛད་སྒོར་མཉམ་ཞུགས་བྱེད་རྒྱུའི་སྐལ་བཟང་གི་གོ་སྐབས་བྱུང་སྐོར་སོགས་ཀྱི་ཐད་ཕན་ཚུན་བཀའ་མོལ་ལྷུག་པོ་གནང་ཡོད། སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་རིན་པོ་ཆེ་མཆོག་ཐའེ་ཝན་དུ་བཞུགས་རིང་དོན་གཅོད་ལས་ཁུངས་ནས་ཞབས་ཞུ་ཇི་དགོས་གསུང་གནང་ཡོང་བ་ཞུས་པ་དང་། འདི་ལོའི་ཕྱི་ཟླ་ ༡༢ ཚེས་ ༡༠ འཛམ་གླིང་འགྲོ་བ་མིའི་ཐོབ་ཐང་གི་ཉིན་མོ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེང་རྟགས་འབུལ་བཞེས་མཛད་ནས་ལོ་ངོ་ ༣༣ འཁོར་བའི་དགྱེས་སྟོན་མཛད་སྒོར་རིན་པོ་ཆེ་ཕེབས་གནང་ཡོང་བ་ཞུས་པར། རིན་པོ་ཆེ་མཆོག་གིས་ཐུགས་དགྱེས་ཚོར་ཆེན་པོས་ཞལ་བཞེས་གནང་ཡོད་པ་བཅས།།
