༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༥ ནས་ ༢༧ བར་ཐའེ་ཝན་གྱི་རྒྱལ་ས་ཐའེ་པེ་ལ་ཡོད་པའི་ (Grand Hyatt)  ཞེས་པའི་མགྲོན་ཁང་དུ་འཛམ་གླིང་མང་གཙོ་འདུ་འཛོམས་ལས་འགུལ་མཐུན་ཚོགས་ཀྱི་གོ་སྒྲིག་འོག་འཛམ་གླིང་མང་གཙོ་ལས་འགུལ་འདུ་འཛོམས་ཐེངས་བཅུ་གཅིག་ཐོག་མགྲོན་འབོད་ལྟར། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་མི་འགྱུར་གཡུ་སྒྲོན་ལགས་མཉམ་ཞུགས་གནང་ཡོད།དེ་ཡང་འདུ་འཛོམས་ཉིན་དང་པོའི་མཛད་སྒོ་ཐོག་ཐའེ་ཝན་གྱི་སྲིད་འཛིན་ལྕམ་སྐུ་ཚའི་ཨིང་ཝིན་ (Tsai Ing-wen) མཆོག་དང་ཐའེ་ཝན་གྲོས་ཚོགས་ཀྱི་ཚོགས་གཙོ་སྐུ་ཞབས་ (You Si- Kun) མཆོག་ཆེད་ཕེབས་ཀྱིས་རྒྱལ་ཁབ་འདྲ་མིན་ནས་ཕེབས་པའི་ཚོགས་བཅར་བ་ཡོངས་ལ་འཚམས་འདྲི་དང་སྦྲགས། སྲིད་འཛིན་མཆོག་གིས་དེང་གི་ཆར་མི་གཅིག་དབང་བསྒྱུར་རིང་ལུགས་པའི་བྱ་སྤྱོད་ལ་བརྟེན་ནས་ང་ཚོ་འཛམ་གླིང་ཡོངས་ནས་མཉམ་རུབ་ཀྱིས་གདོང་ལེན་བྱེད་རྒྱུ་གལ་ཆེན་པོ་ཡིན་སྐོར་འགྲེལ་བརྗོད་གནང་སོང་།འདུ་འཛོམས་དེ་བཞིན་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ཕི་ལི་པིན་རྒྱལ་ཁབ་ནས་ཡིན་པ་ལྕམ་སྐུ་མཱ་རེ་ཡ་རེ་ས་ (Maria Ressa) ལགས་ཀྱིས་གཙོ་སྐྱོང་གནང་ཡོད། འདུ་འཛོམས་ཉིན་གསུམ་པའི་ཐོག་དྲ་ལམ་བརྒྱུད་ནས་གདོང་ལེན་བྱ་ཐབས་ཀྱི་བརྗོད་གཞི་དང་འབྲེལ་བའི་ཐའེ་ཝན་དྲ་རྒྱའི་བཀའ་བློན་ལྕམ་སྐུ་ (Audrey Tang) མཆོག་ཆེད་ཕེབས་གནང་ཡོད། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་དྲུང་ཆེ་མི་འགྱུར་གཡུ་སྒྲོན་ལགས་ཀྱིས་དྲ་རྒྱའི་བཀའ་བློན་མཆོག་དང་མཇལ་འཕྲད་ཀྱིས་བོད་མིའི་སྒྲིག་འཛུགས་ནས་དྲ་ཐོག་ (E-governance) འཛིན་སྐྱོང་ལས་གཞི་འགོ་འཛུགས་བཞིན་པའི་སྐོར་ངོ་སྤྲོད་ཞུས་ཡོད་པ་མ་ཟད། ཚོགས་བཅར་བ་མི་རེ་ངོ་རེར་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གིས་འཛམ་གླིང་ཞི་བདེ་གོང་འཕེལ་མཛད་རྒྱུའི་དགོངས་པ་རླབས་ཆེན་དང་། བོད་ནང་གི་ཛ་དྲག་གནས་སྟངས། བོད་མིའི་སྒྲིག་འཛུགས་ཀྱི་དྲ་རྒྱ་སོགས་ཀྱི་སྐོར་ངོ་སྤྲོད་ཞུས་ཐུབ་པ་བྱུང་ཡོད། འདུ་འཛོམས་ཐོག་བོད་རང་བཙན་སློབ་ཕྲུག་ཚོགས་པའི་པདྨ་སྒྲོལ་མ་ལགས་ཀྱང་ཕེབས་ཡོད། 

ཕྱོགས་མཚུངས་འཛམ་གླིང་མང་གཙོའི་ལས་འགུལ་འདུ་འཛོམས་ཀྱི་འགན་འཛིན་མཆོག་དང་མཇལ་འཕྲད་ཀྱིས་མ་འོངས་པར་མུ་མཐུད་བོད་པའི་གནད་དོན་ཐོག་བསམ་ཞིབ་ཡོང་བའི་འབོད་སྐུལ་ཞུས་ཡོད་པ་བཅས། །