༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། འདི་ལོར་ཐའེ་ཝན་དུ་དགུ་གཅིག་འོས་བསྡུ་ཆེན་མོའི་སྐབས་སུ་ཐའེ་ཝན་གྱི་ཡང་དག་པའི་མང་གཙོ་འདི་བཞིན་རྒྱལ་སྤྱིའི་ནང་གོ་རྟོགས་གོང་སྤེལ་ཆེད་ཨ་རི་གཙོས་པའི་ཀ་ནཱ་ཌཱ་དང་། ཡུ་རོབ། ཨོ་གླིང་རྒྱལ་ཁབ་ཁག་ནས་རྒྱ་རིགས་མང་གཙོ་དོན་གཉེར་བ་དང་རྒྱ་ནག་ཉམས་ཞིབ་པ་ཁག་གཅིག་འོས་བསྡུ་ཆེན་མོར་འཚམས་གཟིགས་ཕེབས་ཡོད་པ་དང་སྟབས་བསྟུན། ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་ལམ་སྟོན་འོག་ཐའེ་སྡོད་བོད་རིགས་ཚོགས་པ་ནས་ཐུན་མོང་གི་གཞི་རྟེན་འཚོལ་བ་ཞེས་པའི་བགྲོ་གླིང་ཆེན་མོ་ལོ་ལྟར་བསྐོང་འཚོགས་ཞུ་བཞིན་ཡོད་པ་དེ་བཞིན་འདི་ལོ་ཐའེ་བོད་ཀྱིས་མང་གཙོ་ཡང་དག་པ་ལག་བསྟར་བྱེད་བཞིན་པ་དེས་མ་འོངས་རྒྱ་ནག་མང་གཙོ་ཅན་དུ་འགྱུར་བར་ཤུགས་རྐྱེན་ཐེབས་ཐབས། ཞེས་པའི་བརྗོད་གཞིའི་ཐོག་རྒྱལ་སྤྱིའི་བགྲོ་གླེང་ཆེན་མོ་ཞིག་ཐའེ་སྡོད་བོད་རིགས་ཚོགས་པ་དང་ཐའེ་ཝན་གྱི་ཚོགས་པ་ཁག་གཅིག་ཐུན་མོང་གིས་ཕྱི་ལོ་ ༢༠༢༢ ཟླ་ ༡༡ ཚེས་ ༢༧ ཉིན་ཐའེ་པེ་ཧྤུ་ཧཱ་མགྲོན་ཁང་དུ་བསྐོང་ཚོགས་གནང་ཡོད་པ་རེད། 
ཚོགས་འདུ་དེ་བཞིན་ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་དུས་དེབ་ཀུན་གསལ་འོད་སྣང་གི་ཙོམ་སྒྲིག་པ་ལྕམ་ལོབ་ཧེའུ་ཇོན་ལགས་ཀྱིས་གཙོ་སྐྱོང་གནང་བ་དང་། ཐོག་མ་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་བགྲོ་གླེང་ཆེན་མོ་འདི་ཉིད་བསྐོང་འཚོགས་དགོས་པའི་དམིགས་ཡུལ་དང་། ཚོགས་འདུའི་བརྩི་སྲུང་དགོས་པའི་སྒྲིག་ལམ་ཁག་ནན་བཤད་བྱས་རྗེས། ཚོགས་འདུ་གོ་སྒྲིག་པའི་མིང་ཐོག་ཐའེ་སྡོད་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་དང་། སློབ་དཔོན་ཆེན་མོ་སྐུ་ཞབས་ཙིམ་ཅན་ཡོན་ལགས་ཀྱིས་དབུ་འཛུགས་ཀྱི་གཏམ་བཤད་གནང་ཡོད། དེ་ནས་ཚོགས་ཐུན་དང་པོ་མང་གཙོའི་གོ་རྟོགས་དང་ཉམས་མྱོང་སྤེལ་རེས་ཞེས་པའི་འོག་ཁྱོན་ཁྱད་ལས་མཁས་དབང་དྲུག་གི་གསུང་བཤད་གནང་རྒྱུའི་ནང་ཨ་རི་ནིའུ་ཡོག་གྲོང་ཁྱེར་གཙུག་ལག་སློབ་གཉེར་ཁང་གི་སློབ་དཔོན་ཆེ་མོ་ཞྭ་མིང་ལགས་ཀྱིས་རྒྱ་ནག་རང་དབང་ཤེས་ཡོན་ཅན་གྱི་མིང་ཐོག་མང་གཙོའི་ཤེས་བྱ་དང་། བཞུགས་སྒར་རྡ་རམ་ས་ལར་ཐེངས་བརྒྱད་ཙམ་བསྐྱོད་པའི་ཉམས་མྱོང་ལ་སྤྱི་ནོར་༸གོང་ས་༸སྐྱབས་མགོན་ཆེ་མོ་མཆོག་གི་རླབས་ཆེན་དགོངས་གཞི་དང་། བཙན་བྱོལ་བོད་མིའི་མང་གཙོ་དང་འབྲེལ་བའི་སྐོར་གསུང་བཤད་གནང་བ་དང་། 
དེ་ནས་ཐའེ་ཝན་ཆབ་སྲིད་གཙུག་ལག་སློབ་གཉེར་ཁང་གི་སློབ་དཔོན་ཆེ་མོ་ལི་ཡུ་ཏི་ལགས་ཀྱིས་ད་ཐེངས་ཐའེ་ཝན་གྱི་ས་གནས་འོས་བསྡུ་ཆེན་མོའི་མཇུག་འབྲས་ལས་མ་འོངས་རྒྱ་ནག་དང་ཐའེ་ཝན་གཉིས་དབར་གྱིས་འབྲེལ་ལམ་ཕེབས་ཕྱོགས། ཐའེ་ཝན་གཞུང་གི་སྲིད་བྱུས་འཛིན་སྟངས་དང་རྒྱལ་སྤྱིའི་གནས་བབ་ཐོག་གཏམ་བཤད་གནང་བ་དང་། ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་བོད་མི་རྣམས་བཙན་བྱོལ་དུ་འབྱོར་མ་ཐག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་མང་གཙོའི་ཕེབས་རིམ་དང་འབྲེལ། བཙན་བྱོལ་ཁ་འཐོར་གྱི་གནས་བབ་འོག་འཛམ་གླིང་ཡུལ་གྲུ་ཁག་ཏུ་ཉིན་བརྒྱ་དུས་གཅིག་འོས་བསྡུ་ཇི་ལྟར་བྱས་ཐུབ་པའི་ཉམས་མྱོང་གསུང་བཤད་གནང་ཡོད་པ་རེད། དེ་ནས་ཉི་འོང་གི་གྲགས་ཅན་གསར་འགོད་པ་དང་རྒྱ་ནག་ཉམས་ཞིབ་པ་སྐུ་ཞབས་ཧྲི་པང་མིང་ཧྲུ་ལགས་ཀྱིས་ཡུན་རིང་ཐའེ་ཝན་དུ་བཞུགས་པའི་ཕྱི་མི་ཞིག་གིས་ཐའེ་ཝན་གི་མང་གཙོར་བལྟ་སྟངས་སྐོར་གསུང་བཤད་གནང་བ་དང་། དེ་སྔ་ཧོང་ཀོང་ས་གནས་ཀྱི་གྲོས་ཚོགས་འཐུས་མི་དང་། དེང་སང་ཐའེ་ཝན་དུ་གནས་བཞུགས་སྐུ་ཞབས་ཞོས་པེ་ཏིལ་ལགས་ཀྱིས་ཧོང་ཀོང་དང་འབྲེལ་བའི་གཏམ་བཤད་གནང་ཡོད་པ་རེད། གཞན་ཡང་གཏམ་བཤད་གནང་མཁན་གཙོ་བོ་མཁས་དབང་མིང་ཇུས་ཀྲིན་ལགས་དུས་ཐོག་ཕེབས་མ་ཐུབ་ཀྱང་། ཚོགས་འདུར་རྒྱབ་སྐྱོར་མཚོན་ཆེ་དགོང་མོ་ཞལ་ལག་ཐོག་ཕེབས་ཏེ་ཚོགས་ཞུགས་པ་ཚང་མར་ངོ་སྤྲོད་ཀྱི་གཏམ་བཤད་ཡང་གནང་ཡོད། བགྲོ་གླེང་ཚོགས་ཐུན་གཉིས་པ་དེ་བཞིན་དུས་ཐུང་སྐར་མ་གསུམ་རེའི་རང་དབང་གསུང་གླེང་གི་དུས་སྐབས་ཡིན་ཞིང་། ཚོགས་ཞུགས་པ་ཚང་མས་འཚང་ག་ཤིག་ཤིག་ངང་ད་ཐེངས་འོས་བསྡུའི་མྱོང་ཚོར་སྐོར་དང་འོས་བསྡུའི་རྗེས་སུ་བགྲོ་གླེང་ཚོགས་འདུ་གོ་སྒྲིག་གནང་ཐུབ་པར་བསྔགསབརྗོད་ཀྱི་མེ་ཏོག་ཕུལ། 
བགྲོ་གླེང་ཚོགས་ཐུན་གསུམ་པ་ནི་བསྒྲགས་གཏམ་གྱི་རགས་ཟིན་ལ་བགྲོ་གླེང་བྱ་རྒྱུ་ཡིན་ཅིང་། བསྒྲགས་གཏམ་གྱི་རགས་ཟིན་ལ་སྔོན་གླེང་དང་། ཐའེ་ཝན་དང་བོད་ཀྱིས་མང་གཙོ་ཡང་དག་པ་ལག་བསྟར་བྱེད་བཞིན་པ་དེས་མ་འོངས་རྒྱ་ནག་མང་གཙོ་ཅན་དུ་འགྱུར་ཐབས་ལ་ཐུན་མོང་གི་ཤུགས་བརྒྱབ་སྟེ་འཛམ་གླིང་ཞི་བདེར་ལེགས་སྐྱེས་འབུལ་དགོས་པའི་དོན་གནད་ཁག་བཀོད་རྗེས་མཐའ་མ་དོན་ཚན་བཞི་ཅན་གྱི་སྒྲགས་གཏམ་དོན་ཚན་རེ་རེར་ཚོགས་ཞུགས་པ་ཚོས་སྣོན་འཕྲི་སྤོར་འཇོག་དང་ལེགས་བཅོས་ཀྱི་དགོངས་འཆར་ཧ་ལས་པ་གནང་ཡོད།
བགྲོ་གླེང་ཚོགས་ཐུན་བཞི་པ་ནི་བསྒྲགས་གཏམ་སྤེལ་རྒྱུའི་དུས་ཚོད་ཡིན་ཞིང་། ཚོགས་ཐུན་འདིའི་གཙོ་སྐྱོང་བ་ནི་རྒྱ་ནག་མང་གཙོ་དོན་གཉེར་བ་མིན་ཀྲིན་ཚོགས་པའི་ཚོགས་གཞོན་ལྕམ་ཧྲིན་ཤོད་ལགས་ཡིན་པ་དང་། བསྒྲགས་གཏམ་སྒྲོགས་སྦྱང་གནང་མཁན་ནི་རྒྱ་ནག་མང་གཙོ་དོན་གཉེར་བ་མིང་ལན་ཚོགས་པའི་ཚོགས་གཙོ་འབུམ་རམས་པ་ཀྲུང་ཅིང་ཅང་ལགས་ཡིན། དེ་རྗེས་སྐུ་ཚབ་དོན་གཅོད་འབའ་སྐལ་བཟང་རྒྱལ་མཚན་ལགས་ཀྱིས་མཇུག་བསྡོམས་གཏམ་བཤད་གནང་རྗེས་ཚོགས་འདུ་རྒྱལ་ཁའི་ངང་གྲོལ་ཡོད།
ད་ཐེངས་ཀྱི་བགྲོ་གླེང་ཆེན་མོ་དེ་བཞིན་ཀུན་གསལ་འོད་སྣང་ངོ་དེབ་ཐོག་ཆ་ཚང་ཐད་གཏོང་ཞུས་ཡོད་པ་དང་། གཞན་ཡང་ལས་རིགས་འདྲ་མིན་དང་། གསར་འགྱུར་བརྒྱུད་ལམ་ཁག་ནས་མི་གྲངས་ ༧༠ ལྷག་ཕེབས་ཡོད་པ་མ་ཟད། སྐུ་ཚབ་དོན་གཅོད་ལས་ཁུངས་ནས་ཚོགས་ཞུགས་པ་ཚང་མར་དགོང་མོའི་གསོལ་སྟོན་ཡང་ཕུལ་ཡོད། ། 
