༄༅། །ཉི་ཧོང་སྐུ་ཚབ་དོན་གཅོད་ཁང་གིས་ཕྱི་ལོ་ ༢༠༢༢ ཟླ་ ༡༡ ཚེས་ ༢༦ ཉིན་ཟླ་གྲངས་གཉིས་རིང་གི་བོད་ཀྱི་རིག་གཞུང་དང་བོད་ཡིག་སློབ་ཁྲིད་ཀྱི་འཛིན་གྲྭ་མཇུག་སྒྲིལ་གནང་ཡོད།
དེ་ཡང་ཉི་ཧོང་སྐུ་ཚབ་དོན་གཅོད་ཁང་ནས་ལོ་ལྟར་ཟླ་གྲངས་གཉིས་རིང་བོད་ཡིག་འཛིན་གྲྭ་གོ་སྒྲིག་གནང་གི་ཡོད་པ་ལྟར། འདི་ལོའི་ཟླ་གྲངས་གཉིས་རིང་གི་བོད་ཡིག་འཛིན་གྲྭ་དེ་བཞིན་ཕྱི་ལོ་ ༢༠༢༢ ཟླ་ ༡༠ ཚེས་ ༠༡ ཉིན་ནས་འགོ་བཙུགས་ཏེ་ཕྱི་ལོ་ ༢༠༢༢ ཟླ་ ༡༡ ཚེས་ ༢༦ ཉིན་ལེགས་པར་མཇུག་སྒྲིལ་གནང་ཡོད་པ་དང་། ཟླ་གྲངས་གཉིས་རིང་གི་བོད་ཡིག་འཛིན་གྲྭའི་སྐབས་སུ་ཉི་ཧོང་བ་དང་རྒྱལ་སྤྱིའི་སློབ་ཕྲུག་རྣམས་ནས་བོད་ཡིག་འཛིན་གྲྭར་དངོས་སུ་ཕེབས་པ་དང་དྲ་ལམ་བརྒྱུད་མཉམ་ཞུགས་ཀྱིས་བོད་ཀྱི་སྐད་ཡིག་གི་རྨང་གཞི་དང་། འབྲི་ཀློག གླེང་མོལ་གཙོ་བོར་གྱུར་པའི་རྒྱལ་རབས་ལོ་རྒྱུས་དང་རིག་གཞུང་སོགས་སྦྱངས་ཡོད།
ཉི་ཧོང་སྐུ་ཚབ་དོན་ཨརྱ་ཚེ་དབང་རྒྱལ་པོ་ལགས་ཀྱིས། ཉི་ཧོང་སྐུ་ཚབ་དོན་གཅོད་ཁང་དུ་བོད་ཡིག་འཛིན་གྲྭར་དངོས་སུ་བཅར་མཁན་དང་དྲ་རྒྱ་བརྒྱུད་མཉམ་ཞུགས་གནང་མཁན་རྣམས་ཀྱིས་བོད་ཀྱི་སྐད་ཡིག་ལ་དགའ་མོས་དང་ཐུགས་སྣང་གནང་བར་ཐུགས་རྗེ་ཆེ་ཞུས་གནང་བ་དང་འབྲེལ་བོད་བརྒྱུད་ནང་བསྟན་བསླབ་པར་བོད་ཀྱི་སྐད་ཡིག་མུ་མཐུད་སྦྱང་བརྩོན་གནང་དགོས་པའི་གལ་གནད་སྐོར་ལམ་སྟོན་གནང་ཡོད་པ་མ་ཟད། བོད་ཡིག་འཛིན་གྲྭར་བརྒྱ་ཆ་ ༨༠ ལྷག་བཅར་མཁན་རྣམས་ལ་ཕྱག་འཁྱེར་གནང་རྒྱུ་ཡིན་སྐོར་གསུངས་ཡོད། སློབ་ཕྲུག་ཚོས་བོད་ཡིག་སྦྱངས་པའི་ཉམས་མྱོང་བརྗོད་སྐབས་འདོད་བློ་ཁེངས་ཡོད་པའི་སྐོར་གསུངས།
ཟླ་གྲངས་གཉིས་རིང་གི་བོད་ཡིག་འཛིན་གྲྭ་མཇུག་སྡོམ་མཛད་སྒོ་ཞིག་ཉི་ཧོང་སྐུ་ཚབ་དོན་གཅོད་ཁང་དུ་ཚོགས་ཡོད་པ་དང་། སྐབས་དེར་ཉི་ཧོང་སྐུ་ཚབ་དོན་ཨརྱ་ཚེ་དབང་རྒྱལ་པོ་ལགས་ཀྱིས་ཟླ་གྲངས་གཉིས་རིང་གི་བོད་ཡིག་འཛིན་གྲྭ་ཆ་ཚང་ལ་བཅར་མཁན་གྱི་སློབ་ཕྲུག་རྣམས་ལ་ཁ་བཏགས་རེ་ཕུལ་གནང་ཡོད། ཉི་ཧོང་སྐུ་ཚབ་དོན་ཁང་གི་འབྲེལ་ཡོད་ལས་བྱེད་བཀྲ་ཤིས་དབྱངས་འཛོམས་ལགས་དང་ཚེ་ལྷ་ལགས་ཀྱིས་སློབ་ཁྲིད་གནང་བ་དང་། ཧ་སེ་གྷ་ཝ་ (Hasegawa) ལགས་ཀྱིས་ཕྱག་རོགས་གནང་ཡོད་པ་བཅས།།
