༄༅། །རྒྱ་ནག་གཞུང་གིས་ལོ་ངོ་དྲུག་རིང་བཙོན་འཇུག་ཁྲིམས་ཐག་བཅད་པའི་བྲག་མགོ་དགོན་པའི་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་ནད་མནར་རྐྱེན་པས་འདས་གྲོངས་སུ་གྱུར་འདུག

དེ་ཡང་ཕྱི་ལོ་ ༢༠༡༢ ཟླ་བ་ ༤  ཚེས་  ༢ ཉིན་བྲག་མགོ་རྫོང་དུ་ཚོགས་འདུ་ཞིག་ལ་རྒྱ་ནག་གཞུང་གི་ཉེན་རྟོག་པ་ཡོང་ནས་གསལ་བཤད་དང་འགྲེལ་བརྗོད་གང་ཡང་མེད་པར་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་བཙན་ཁྲིད་བྱས་ཏེ་ཟླ་བ་བཅུ་ལྷག་རིང་གོ་ཐོས་མེད་པར་གྱུར་ཡོད་པ་དང་། ཟླ་གྲངས་བཅུ་ལྷག་རྗེས་ཆབ་སྲིད་ཀྱི་ནག་ཉེས་ཡོད་ལུགས་བརྗོད་ནས་རྒྱ་ནག་གི་གྲོང་ཁྱེར་ཁྲིན་ཏུ་ནས་བསྟན་དགའ་ལགས་དང་། གཞན་ཡང་བྲག་མགོ་དགོན་པའི་སློབ་གྲྭའི་དགེ་རྒན་དང་སྤྲུལ་སྐུ་ཞིག་བཅས་མི་བཞི་ལ་ལོ་དྲུག་གི་བཙོན་འཇུག་དང་། དགོན་པའི་གྲྭ་པ་གཞན་ཞིག་ལ་ལོ་ལྔའི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད། དེ་དང་དུས་མཚུངས་བྲག་མགོ་ནས་སྐྱ་སེར་བསྡོམས་བོད་མི་སོ་དྲུག་ཙམ་ལ་ཆབ་སྲིད་ཀྱི་ནག་ཉེས་འདྲ་མིན་གཡོག་སྟེ་ལོ་གཅིག་ནས་གཉིས་ཀྱི་བར་དུས་བཀག་བཙོན་འཇུག་བྱས་ཡོད།

བསྟན་དགའ་ལགས་ནི་སྐབས་དེར་བྲག་མགོ་དགོན་པའི་ཕྱག་མཛོད་རྒན་པ་ཡིན་ཞིང་གཟུགས་གཞི་བདེ་ཐང་ཡིན། འོན་ཀྱང་བཙོན་འཇུག་སྐབས་མི་སྤྱོད་ལས་འདས་པའི་སྡུག་སྦྱོང་མནར་གཅོད་དང་་རྡུང་རྡེག་ཚབས་ཆེན་ཡང་ཡང་བྱས་རྐྱེན་བཙོན་ཁང་ནང་ལོ་གསུམ་མ་ཟིན་ཙམ་ནས་ནད་པར་གྱུར་ཡོད་པ་མ་ཟད། དུས་ཐོག་སྨན་པར་བསྟེན་གཏུགས་བྱེད་མ་ཐུབ་པ་དང་། ཟས་གོས་གནས་མལ་ཧ་ཅང་སྐྱོ་བ། འཕྲོད་བསྟེན་ཞན་པའི་དབང་གིས་ན་ཚ་ཇེ་སྡུག་ཏུ་གྱུར་པ་སོགས་ཀྱི་དཀའ་ངལ་རབ་དང་རིམ་པ་འཕྲད་དེ་མཐར་ཕྱི་ལོ་ ༢༠༡༨ ཟླ་བ་བཞི་པའི་ནང་གློད་གྲོལ་ཐོབ་སྐབས་ཐ་ན་ཆབ་བསིལ་བ་སོགས་ལའང་ཁྱིམ་མི་སྤུན་མཆེད་དང་གཞན་གྱིས་སྐྱོར་ན་མ་གཏོགས་འགྲོ་མི་ཐུབ་པ་གྱུར་ཡོད་པ་དང་། དགོན་པའི་ནང་ཕེབས་མི་ཆོག་པ་དང་གནད་ཡོད་མི་སྣར་ཐུག་འཕྲད་མི་ཆོག་ཅེས་སོགས་བཤད་དེ་ཉིན་ལྟར་ལྟ་རྟོག་པ་ཁྱིམ་དུ་ཡོང་ནས་མི་ཆོག་པ་དང་མི་འཐུས་རབས་མང་པོ་བཤད་དེ་ལུས་སེམས་གཉིས་ཀར་དཀའ་ངལ་ཚད་མེད་བཟོས་ཡོད། འོན་ཀྱང་ཆོས་གྲོགས་དང་སྤུན་མཆེད་ཀྱིས་ཐུགས་ཁུར་དང་རོགས་མགོན་ལ་བརྟེན་ནས་དགོན་པའི་སྨན་པ་སོགས་ལ་བསྟེན་གཏུགས་ཀྱིས་དྲག་སྐྱེད་ཕྲན་བུ་བྱུང་ཡོད་ནའང་འདི་ལོར་ནད་ལོག་བརྒྱབ་པ་དང་། ཆབ་སྲིད་ཀྱི་གནོན་ཤུགས་འོག་སྨན་བཅོས་ཚད་ལྡན་མ་ཐོབ་པའི་དབང་གིས་ཕྱི་ལོ་ ༢༠༢༢ ཟླ་བ་ ༡༡ པའི་ཚེས་མགོར་འདས་གྲོངས་སུ་གྱུར་ཡོད།།