༄༅། །འདི་གར་ལུགས་བསམ་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༡ ཚེས་ ༢ དང་ ༣ བཅས་ཉིན་གྲངས་གཉིས་རིང་ལུགས་བསམ་ས་གནས་འགོ་འཛིན་ལས་ཚབ་སྡེ་འགན་ཕུར་བུ་ཚེ་རིང་ལགས་དང་། ཚབ་གསར་ས་གནས་འགོ་འཛིན་གུ་རུ་ཉི་མ་ལགས་རྣམ་གཉིས་དབར་ལས་འགན་རྩིས་སྤྲོད་རྩིས་ལེན་གནང་ཡོད། སྐབས་དེར་རྩིས་སྤྲོད་རྩིས་ལེན་གྱི་ལས་དོན་ཆེད་ནང་སྲིད་སྐུ་ཚབ་ལྷོ་སྤྱི་འཇིགས་མེད་ཚུལ་ཁྲིམས་ལགས་སྤྲོད་དཔང་གི་འགན་ཁུར་བཞེས་པའི་ཐོག་ས་འགོ་ལས་ཚབ་དང་ས་འགོ་གསར་པ་དབར་རྩིས་སྤྲོད་རྩིས་ལེན་ལེགས་གྲུབ་བྱུང་རྗེས་ཕྱི་ཚེས་ ༣ ཉིན་གྱི་སྔ་དྲོ་ཚོུད་ ༡༠།༣༠ ཐོག་ས་གནས་རང་བདེན་ཚོགས་ཆུང་གི་ཚོགས་གཙོ་དང་། མཉམ་འབྲེལ་ཚོགས་པའི་དྲུང་ཆེ། དགོན་སྡེ་ཁག་གི་སྐུ་ཚབ། གྲོང་སྡེ་ཁག་གི་སྤྱི་མི། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་ལྷན་འཛོམས་ཐོག་ཞབས་ཀྱག་བརྗེ་ལེན་གྱི་མཛད་སྒོ་སྟབས་བདེ་ཞིག་དང་། དེ་རྗེས་མི་མང་ཚོགས་ཆེན་ཞིག་འདུ་བསྐོང་གནང་ཡོད།ཉིན་རྒྱབ་མེ་སོར་རྫོང་དཔོན་གསར་པ་སྐུ་ཞབས་ཀེ་ཝི་རཇེནྡྲ་ (Dr. K.V. Rajendra) ལགས་དང་ཧོན་སུར་ས་གནས་ཀྱི་རྫོང་དཔོན་གཞོན་པ་རྣམ་གཉིས་ལ་ངོ་སྤྲོད་འཚམས་འདྲི་དང་སྦྲགས། མ་འོངས་པར་ས་གནས་ཀྱི་གནད་དོན་ཐོག་མཐུན་འགྱུར་རོགས་རམ་ཡོང་བའི་རེ་འདུན་ཞུས་ཡོད། གུ་རུ་ཉི་མ་ལགས་ནི་ལུགས་བསམ་ས་གནས་འགོ་འཛིན་ཐེངས་ ༣༣ པ་དེ་ཆགས་ཡོད།།