༄༅། །འདི་གར་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ལམ་སྟོན་བཞིན། བཙན་བྱོལ་བོད་མིའི་གཞིས་ཆགས་ཁག་ཏུ་ས་གནས་འགོ་འཛིན་ལས་ཁུངས་སམ་ནང་ཆོས་ངོ་སྤྲོད་ཚོགས་ཆུང་ནས་གཙོ་འགན་བཞེས་ཏེ་གཞིས་མི་མང་ཚོགས་ལ་ནང་ཆོས་ངོ་སྤྲོད་ཞུ་དགོས་ལྟར། མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ནས་༸སྐྱབས་རྗེ་ཀུན་བདེ་གླིང་ཚག་སྐུ་ཕྲེང་བཅུ་གསུམ་པ་རྗེ་བཙུན་བསྟན་འཛིན་ཆོས་ཀྱི་རྒྱལ་མཚན་དཔལ་བཟང་པོ་མཆོག་ལ་ཡིག་ངག་གཉིས་ཐོག་ནས་གསོལ་བ་ཕུར་ཚུགས་སུ་བཏབ་པ་ལྟར། ཕྱི་ལོ་ ༢༠༢༢ ཟླ་ ༡༡ ཚེས་ ༢༠ རེས་གཟའ་ཉི་མ་ཉིན་གྱི་སྔ་དྲོ་ཆུ་ཚོད་ ༡༠ ཐོག་གཞིས་སྤྱི་མི་མང་ཚོགས་ཁང་དུ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་གིས་མོན་གྷོ་གཞིས་མི་མང་ཚོགས་ལ་ནང་ཆོས་ངོ་སྤྲོད་དང་། དུས་རབས་ཉེར་གཅིག་པའི་ནང་པ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་བསྐྱངས་གནང་མཛད་ཡོད། སྐབས་དེར་མི་མང་གྲངས་ ༢༠༠ ཙམ་མཉམ་ཞུགས་གནང་ཡོད་པ་བཅས། །