༄༅།།འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༢ ཟླ་བ་ ༡༡ ཚེས་ ༥ རེས་གཟའ་སྤེན་པའི་ཉིན་བྱང་ཨ་རིའི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་དང་།  གཟའ་མཇུག་སློབ་གྲྭར་འབྲེལ་མཐུད་གནང་མཁན་རྒྱུན་ལས་ཚེ་རིང་བཀྲ་ཤིས་ལགས་གཉིས་ཀྱི་ཕེབས་རོགས་འོག་ << བློ་གསལ་སྐྱེད་ཚལ།  བོད་ཀྱི་སྐད་ཡིག་དང་རིག་གཞུང་སློབ་གྲྭ་ >> ལ་གཟིགས་སྐོར་གནང་ཡོད།  སློབ་གྲྭ་དེ་ནི་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཁྱབ་ཁོངས་ཀྱི་གཟའ་མཇུག་སློབ་གྲྭ་ཡིན་པ་དང་།  རྣ་བར་སྙན་ཞིང་གོ་དོན་ཟབ་པའི་ << བློ་གསལ་སྐྱེད་ཚལ། >> ཞེས་པའི་མཚན་བྱང་དེ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་སྐྱབས་འཇུག་ཞུས་པ་བཞིན་གསོལ་སྩལ་གནང་བ་ཞིག་རེད་འདུག

ཐེངས་འདིའི་ལྟ་སྐོར་ནི།  བོད་རིགས་འབྲེལ་མཐུད་པས་ལས་འགན་བླངས་རྗེས་ཀྱི་གཞུང་འབྲེལ་ལྟ་སྐོར་དང་པོ་དེ་ཡིན་པ་དང་།  ལྟ་སྐོར་གྱི་དམིགས་ཡུལ་གཙོ་བོ་ནི།  གལ་གནད་ཆེ་བའི་གཟའ་མཇུག་སློབ་གྲྭའི་གནས་སྟངས་རྒྱུས་ལོན་བྱེད་རྒྱུ་དང་།  བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༠ པས་ཐག་གཅོད་གཏན་འབེབས་གནང་པའི་གཟའ་མཇུག་སློབ་གྲྭ་དང་འབྲེལ་བའི་གྲོས་ཆོད་ཁག་ལག་བསྟར་མཇུག་སྣོན་ཡོང་ཆེད་དུ་རེད།   ལྟ་སྐོར་རིང་ << བློ་གསལ་སྐྱེད་ཚལ།  བོད་ཀྱི་སྐད་ཡིག་དང་རིག་གཞུང་སློབ་གྲྭའི་ >> སློབ་སྤྱི་རྒན་པ་ཚེ་རིང་སྟོབས་ལྡན་ལགས་ཀྱིས་སློབ་གྲྭ་དང་འབྲེལ་བའི་གནས་ཚུལ་རྣམས་ངོ་སྤྲོད་འགྲེལ་བརྗོད་ཞིབ་ཕྲ་གནང་བ་སྙིང་པོར་བསྡུས་ན།

༡།  སློབ་གྲྭའི་རེས་གཟའ་སྤེན་པའི་འཛིན་གྲྭར་སློབ་ཕྲུག་ ༢༡༦ དང་འཛིན་ཁག་བཅུ་བཞི།  རེས་གཟའ་ཉི་མའི་འཛིན་གྲྭར་སློབ་ཕྲུག་ ༢༡༥ དང་བཅས་བསྡོམས་སློབ་ཕྲུག་ ༤༣༡ དང་འཛིན་ཁག་ ༢༨   

༢།  གཟའ་སྤེན་པ་དང་ཉི་མའི་འཛིན་གྲྭ་གཉིས་ལ་སློབ་སྤྱི་དང་།  རོལ་དགེ  ཟློས་དགེ་བཅས་ཐེ་བའི་ཁྱོན་བསྡོམས་དགེ་རྒན་ ༣༣ 

༣།  སློབ་ཚན་ཐད།  བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་ནུབ་ཕྱོགས་ཡུལ་གྲུ་ཁག་གི་ཕྲུ་གུའི་གནས་སྟངས་ལ་གཞིགས་ནས་རྩོམ་སྒྲིག་འགྲེམས་སྤེལ་གནང་བའི་སློབ་དེབ་གཞི་རྩར་བཟུང་བའི་ཐོག  དགེ་རྒན་ནང་ཁུལ་གོ་བསྡུར་གྱིས་འཛིན་ཁག་ཉེར་བརྒྱད་ཀྱི་སློབ་མའི་གནས་སྟངས་ལ་གཞིགས་ནས་མགྱོགས་ཚད་གཅིག་གྱུར་ངང་སློབ་ཁྲིད་གནང་གི་ཡོད་འདུག  

༤།  བོད་རིགས་སྤྱི་མཐུན་ཚོགས་པའི་ཐད་ཀའི་ལྟ་རྟོགས་འོག་ཡོད་པའི་བློ་གསལ་སྐྱེད་ཚལ།  བོད་ཀྱི་སྐད་ཡིག་དང་རིག་གཞུང་སློབ་གྲྭར་སློབ་སྤྱི་རྒན་པ་གཅིག་དང་།  གཞོན་པ་གཉིས་བཅས་སློབ་སྤྱི་གསུམ་ཡོད་པ་དེ་དག་གི་སྣེ་འཁྲིད་འོག་དང་།  ཕ་མའི་ཚོགས་ཆུང་གི་གཞོགས་འདེགས་རོགས་རམ་བཅས་ནུས་པ་མཉམ་སྤུངས་ཀྱི་ཐོག་ནས་སློབ་གྲྭའི་ལས་དོན་འགན་ཁུར་གནང་གི་ཡོད་པ་རེད་འདུག   

སློབ་སྦྱི་རྒན་པས་ངོ་སྤྲོད་གནང་བར་གཞིགས་ན།  དགེ་རྒན་གྱི་ཁོངས་སུ་དེ་སྔ་རྒྱ་གར་དང་བལ་ཡུལ་ནང་ཡོད་པའི་སློབ་གྲྭ་ཁག་ནང་ཡུན་རིང་དགེ་རྒན་གནང་པའི་ཉམས་མྱོང་ཡོད་མཁན་འདུག་ལ།  དེ་བས་སེམས་འགུལ་ཐེབས་དགོས་པ་ཞིག་ནི།   སྔོན་འགྲོ་འཛིན་གྲྭའི་བུད་མེད་དགེ་རྒན་གཞོན་པ་ཁ་ཤས་ནི་བློ་གསལ་སྐྱེད་ཚལ་སློབ་གྲྭ་དེ་རང་ནས་མཐར་ཕྱིན་པའི་སློབ་ཕྲུག་གྲས་རེད་འདུག ལྟ་སྐོར་གྲུབ་རྗེས་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་དགེ་རྣམ་པར་འཚམས་འདྲིའི་གསུང་བཤད་མདོར་བསྡུས་ཤིག་གནང་སྐབས།  གཟའ་འཇུག་སློབ་གྲྭའི་གལ་ཆེའི་རང་བཞིན་དང་།  སྐུ་ཚབ་དོན་གཅོད་ཁང་ནས་བྱང་ཨ་རིའི་ཁྱབ་ཁོངས་གཟའ་མཇུག་སློབ་གྲྭ་ཁག་ཧ་ཅང་གལ་ཆེར་བརྩི་གི་ཡོད་པའི་སྐོར་གསུང་པ་མ་ཟད།  བྱང་ཨ་རི་ལྟ་བུའི་བྲེལ་ལ་ཆེ་བའི་སྤྱི་ཚོགས་ནང་རེས་གཟའ་སྤེན་པ་དང་ཉི་མའི་དུས་ཚོད་བཏང་ནས་དགེ་རྒན་གནང་མཁན་དང་།  ལྷག་པར་གཞོན་པ་ཚོས་རེས་གཟའ་སྤེན་པ་དང་ཉི་མའི་གུང་གསེང་གི་དུས་ཚོད་རྣམས་རང་ཉིད་སྒེར་གྱི་སྐྱིད་སྐྱིད་གཏོང་རྒྱུའི་ཐོག་མ་བཏང་བར།  མ་འོངས་སོན་རྩ་ཡིན་པའི་བོད་ཕྲུག་རྣམས་ལ་ཤེས་ཡོན་སློབ་ཁྲིད་ཀྱི་ཆེད་དུ་བཏང་བ་དེ་ནི་༧རྒྱལ་བའི་དགོངས་གཞི་དང་མཐུན་ཞིང་།  དོན་སྙིང་ལྡན་པ་ཞིག་ཡིན་པས་སྐུ་ཚབ་དོན་ཁང་གི་ངོས་ནས་བསྔགས་བརྗོད་ཀྱི་མེ་ཏོག་འཐོར་རྒྱུ་དང་།  བློ་གསལ་སྐྱེད་ཚལ།  བོད་ཀྱི་སྐད་ཡིག་དང་རིག་གཞུང་སློབ་གྲྭའི་དཀྱིལ་འཁོར་ནང་མུ་མཐུད་ཞབས་ཞུ་སྒྲུབ་ཐུབ་པའི་རེ་སྐུལ་གནང་ཡོད།  

ཤེས་རྟོགས་བྱུང་བར་གཞིགས་ན།  བློ་གསལ་སྐྱེད་ཚལ།  བོད་ཀྱི་སྐད་ཡིག་དང་རིག་གཞུང་སློབ་གྲྭ་ནི་ཕྱི་ལོ་ ༡༩༩༦ ལོར་དབུ་བརྙེས་ཤིང་།  ད་བར་མི་ལོ་ཉེར་དྲུག་རིང་རང་རིགས་གཞོན་སྐྱེས་མང་པོར་ཕན་ཐོགས་བྱུང་ཡོད།  སློབ་སྤྱི་རྒན་པས་གསུང་དོན་ལྟར་ན།  ད་དུང་སློབ་གྲྭར་གསར་ཞུགས་བྱེད་འདོད་ཀྱིས་ཐོ་འགོད་བྱེད་མཁན་ཡོང་བཞིན་པར་བརྟེན།  འཛིན་གྲྭ་ཚུགས་ཡུལ་དང་།  དགེ་རྒན་གྱི་དཀའ་ངལ་མ་འཕྲད་པ་དང་།  འཛིན་གྲྭ་གཅིག་གི་སློབ་མའི་གྲངས་ཚད་ལོངས་མཚམས་སློབ་ཕྲུག་གསར་པ་བསྡུ་འཆར་ཡོད་པ་རེད་འདུག  

ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་སྤྱི་ཁང་ཕུན་ཚོགས་སྡེ་བཞི་སྤུས་གཟིགས་བཟོ་བཅོས་ལེགས་གྲུབ་མ་ཟིན་སྔོན།  བློ་གསལ་སྐྱེད་ཚལ་སློབ་གྲྭ་དེ་བཞིན་དཀའ་ངལ་སྣ་ཚོགས་འོག་ཕྱི་ལ་ཁང་པ་གཡར་ནས་འཛིན་གྲྭ་ཚོགས་དགོས་ཀྱི་ཡོད་ཀྱང་།  སྤྱི་མཐུན་ཚོགས་པའི་ཁྱབ་ཁོངས་མི་མང་རྣམས་ཀྱི་རྒྱབ་སྐྱོར་དང་།  སྦྱིན་བདག་རྣམ་པའི་བཀའ་དྲིན་ལ་བརྟེན་ནས་ད་ཆ་རང་བདག་སྤྱི་ཁང་ཡོད་སྟབས།  ཕྱི་ལོག་ནས་ཁང་པ་གཡར་ཏེ་འཛིན་གྲྭ་ཚོགས་དགོས་པའི་དེ་སྔའི་དཀའ་ངལ་མེད་པར་གྱུར་ཡོད་པ་བཅས། །