༄༅། །ཨོ་གླིང་སྐུ་ཚབ་དོན་གཅོད་ལས་ཁུངས་དང་ཁེན་བྷེ་ར་ས་གནས་བོད་རིགས་མཐུན་ཚོགས་ཐུན་མོང་གི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༡༠ ཚེས་ ༩ ཉིན་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག་དབུ་བཞུགས་ཐོག་ས་གནས་བོད་རིགས་མང་ཚོགས་ནས་ད་ལྟའི་བོད་ནང་ཏོག་དབྱིབས་ནད་ཡམས་ཀྱི་ཛ་དྲག་གནས་སྟངས་ལ་གདུང་སེམས་མཉམ་སྐྱེ་མཚོན་ཆེད་སྨོན་ལམ་གསུང་འདོན་ཚོགས་ཡོད།
དེ་ཡང་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག་ལ་ཇི་ལྟར་གསོལ་བ་བཏབ་པ་བཞིན་ཨོསྟྲེ་ལི་ཡཱའི་རྒྱལ་ས་ཁེན་བྷེ་རེར་ཆིབས་བསྒྱུར་གྱིས་ས་གནས་མང་ཚོགས་ལ་ཆོས་འབྲེལ་དང་སྨོན་ལམ་གསུང་འདོན་གནང་རྒྱུ་ཞལ་བཞེས་བཀའ་དྲིན་བླ་མེད་དུ་ཆེ་ཞུས་པ་དང་འབྲེལ་ཨོ་གླིང་ནང་བོད་རིགས་མང་ཚོགས་ཀྱི་གནས་སྟངས་ངོ་སྤྲོད་སྙིང་བསྡུས་ཤིག་སྙན་སྒྲོན་ཞུས།
དེ་རྗེས་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག་གིས་དད་ལྡན་མང་ཚོགས་ལ་བློ་སྦྱོང་ཚིག་བརྒྱད་མའི་ཆོས་འབྲེལ་དང་བླང་དོར་བཀའ་སློབ། བོད་ནང་ཏོག་དབྱིབས་ནད་ཡམས་ཀྱི་ཛ་དྲག་གནས་སྟངས་གང་མྱུར་ཞི་བའི་ཆེད་དུ་སྨོན་ལམ་གསུང་འདོན་གནང་ཡོད་།
མཇུག་ཏུ་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་སྐལ་བཟང་ཚེ་རིང་ལགས་ཀྱིས་ས་གནས་ཀྱི་ལས་བསྡོམས་སྙིང་བསྡུས་སྙན་སྒྲོན་དང་འབྲེལ་ཐུགས་རྗེ་ཆེ་ཞུའི་གསུང་བཤད་གནང་རྗེས་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག་གིས་མང་ཚོགས་ལ་མཇལ་ཁ་གནང་ཡོད་པ་བཅས།།
