༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༢༣ ཉིན་རྒྱལ་སྤྱིའི་བོད་དོན་འབྲེལ་མཐུད་ཁང་གིས་གོ་སྒྲིག་ཞུས་པའི་ཨེ་ཤི་ཡ་དང་ཨོསྟྲ་ཨེ་ཤི་ཡ་མངའ་ཁུལ་གྱི་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཚོགས་བཅར་བ་རྣམས་ལ་དང་བླངས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་གནང་ཡོད་པ་རེད།
དེ་ཡང་གོང་ཚེས་ཉིན་བཞུགས་སྒར་ནོར་བུ་གསོལ་མགྲོན་ཁང་གི་ཞི་བདེ་ཚོགས་ཁང་དུ་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་ཞུས་པའི་ཨེ་ཤི་ཡ་དང་ཨོསྟྲ་ཨེ་ཤི་ཡ་མངའ་ཁུལ་གྱི་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཚོགས་བཅར་བ་རྣམས་ལ་སྐབས་བཅུ་དྲུག་པའི་བཀའ་ཤག་གི་ལས་གཞི་དང་བླངས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་གནང་ཡོད།
སྐབས་དེར་འབྲུག་བསྟན་སྐྱིད་ལགས་ཀྱིས་དང་བླངས་བོད་དོན་ཞུ་གཏུག་ལས་འགུལ་གྱི་རྒྱབ་ལྗོངས་གནས་ཚུལ་དང་། གལ་གནད། དེ་བཞིན་གྲུབ་འབྲས་བཟང་པོ་ཐོན་པར་བློ་མཐུན་ཚོགས་སྒེར་ཁག་དང་མཉམ་ལས་ཐོག་བོད་དོན་ཞུ་གཏུག་ཚགས་ཚུད་གཏོང་དགོས་སྐོར། གཞན་ཡང་བོད་དོན་རྒྱབ་སྐྱོར་ཚོགས་པ་ཁག་གིས་དང་བླངས་བོད་དོན་ཞུ་གཏུག་ལས་འགུལ་བརྒྱུད་རྒྱལ་སྤྱིའི་སྟེང་བོད་དོན་ཞུ་གཏུག་སྔར་ལྷག་གོང་སྤེལ་གཏོང་ཐུབ་སྐོར་འགྲེལ་བརྗོད་གནང་།
ཐེངས་འདིའི་ཚོགས་འདུའི་ནང་ཨོསྟྲེ་ལི་ཡཱ་དང་། རྒྱ་གར། ཉི་ཧོང་། ཐའེ་ཝན། ཨིན་ཡུལ། ཨ་རི་བཅས་ཀྱི་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་། བཞུགས་སྒར་རྡ་ས་ཁུལ་དུ་ཡོད་པའི་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ། ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་བསྟན་འཛིན་དཔལ་མོ་ལགས་དང་རིན་ཆེན་ལགས་བཅས་མཉམ་ཞུགས་གནང་ཡོད་པ་བཅས།།
