༄༅།།འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན།  བྱང་ཨ་རིའི་ས་གནས་བོད་རིགས་སྤྱི་མཐུན་ཚོགས་པ་ཁག་གཅིག་གིས།  བདུན་ཕྲག་སྔོན་མའི་ནང་ཨ་རིའི་གྲོས་ཚོགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་བཞེས་མཛད་དེ་མི་ལོ་ཧྲིལ་པོ་ ༡༥ འཁོར་བའི་དམིགས་བསལ་གྱི་ཉིན་མོ་རྣམ་པ་སྣ་ཚོགས་ཀྱི་ཐོག་ནས་སྲུང་བརྩི་ཞུས་པའི་སྐོར་དེ་སྔ་གནས་ཚུལ་འགོད་སྤེལ་ཟིན།  ཉེ་ཆར་ཟླ་བ་ ༡༠ ཚེས་ ༢༢ རེས་གཟའ་སྤེན་པའི་གུང་གསེང་དང་སྟབས་བསྟུན་ནས་ནུབ་བྱང་བོད་མིའི་རིག་གཞུང་ཚོགས་པའམ་པོ་ཌི་ལན་ཊི་ས་གནས་བོད་རིགས་སྤྱི་མཐུན་ཚོགས་པས་ (Northwest Tibetan Cultural Association, Portland) སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་བཞེས་མཛད་དེ་ལོ་ ༡༥ འཁོར་བའི་དམིགས་བསལ་གྱི་ཉིན་མོ་སྲུང་བརྩི་ཞུས་ནས་༸གོང་ས་མཆོག་གི་བཀའ་དྲིན་རྗེས་དྲན་ཞུས་པ་མ་ཟད།  མཛད་སྒོའི་སྐབས་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་དང་།  གཟེངས་རྟགས་འབུལ་བཞེས་མཛད་སྒོའི་བརྙན་པར་གཟིགས་འབུལ་ཞུས་ཏེ་ལོ་བཅོ་ལྔའི་གོང་གི་གནས་ཚུལ་དྲན་གསོ་གནང་ཡོད། དེ་བཞིན་བདུན་ཕྲག་སྔོན་མར་ཨི་ཐ་ཀ་ས་གནས་བོད་རིགས་སྤྱི་མཐུན་ཚོགས་པས་ (Ithaca) ཀྱང་རྣམ་པར་རྒྱལ་བའི་ཕན་བདེ་ལེགས་བཤད་གླིང་ཆོས་ཚོགས་དང་མཉམ་དུ་རིག་གཞུང་འཁྲབ་སྟོན་དང་ཆོས་ཕྱོགས་ཀྱི་རྣམ་པའི་ཐོག་ནས་༸གོང་ས་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པའི་ཉིན་མོ་སྲུང་བརྩི་ཞུས་ཏེ་མགོན་པོ་གང་གི་བཀའ་དྲིན་རྗེས་དྲན་ཞུས་ཡོད་པ་དང་།   རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པས་ (Capital-Area) དམིགས་བསལ་གྱི་ཉིན་མོ་སྲུང་བརྩི་མཛད་སྒོའི་སྐབས།  བྱང་ཨ་རི་སྐུ་ཚབ་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་ཀྱིས་སྐུ་ཚབ་དོན་གཅོད་ཀྱི་ཚབ་ཞུས་ཏེ་གསུང་བཤད་མདོར་བསྡུས་ཤིག་གནང་བའི་ནང་།  ནང་ཁུལ་འཆམ་མཐུན་ཐོག་ནུས་པ་མཉམ་སྤུངས་ཐུབ་པ་དང་།  མང་གཙོའི་ཐོབ་ཐང་ལོངས་སྤྱོད་སྐབས་གཞི་མེད་ཀྱི་སྐྱོན་འཛུགས་མ་ཡིན་པར།  ཀུན་སློང་བཟང་པོའི་སྒོ་ནས་རྒྱུ་མཚན་གནས་ལུགས་དྲངས་ཐུབ་པ་བྱུང་ན།  དགོངས་གཞི་དང་མཐུན་པ་དེ་ལྷག་མེད་པའི་སྐོར་གསུང་ཞིང་།  དེ་མིན་ད་དུང་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་།  རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་བུ་ཆུང་ཚེ་རིང་ལགས་ཀྱིས་ཀྱང་དུས་ཆེན་དང་འབྲེལ་བའི་གསུང་བཤད་གནང་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་སོགས་ཆེ་བསྟོད་ངོས་འཛིན་གྱི་མཚན་སྙན་ཆེ་ཆུང་བརྒྱ་ཕྲག་མང་པོ་འབུལ་བཞེས་མཛད་ཡོད་པའི་ཁྲོད་ནས་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ནི་གཟེངས་རྟགས་གལ་ཆེ་ཤོས་ཤིག་ཡིན་པ་རེད།།