༄༅།།འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན། ཨ་རིའི་མངའ་སྡེ་ཨིན་དི་ཨན་ནཱའི་མི་རིགས་ལས་དོན་སྡེ་ཚན་གྱིས་གྲ་སྒྲིག་བྱས་པའི་ཕྱི་ལོ་ ༢༠༢༢ ལོའི་རྒྱལ་སྤྱིའི་སྒྱུ་རྩལ་གྱི་དུས་སྟོན་ཐེངས་ ༤༦ པ་དེ།  ཟླ་བ་ ༡༠ ཚེས་ ༡༣ ནས་ ༡༦ བར་ཨིན་དི་ཨན་ནཱའི་འགྲེམས་སྟོན་ལྟེ་གནས་ཁང་དུ་ཚུགས་ཤིང་།  ཨིན་དི་ཨན་ནཱ་དང་།  ཁན་ཌ་ཀི། (Kentucky)  ཨོ་ཧ་ཡོ། (Ohio) བཅས་མངའ་སྡེ་གསུམ་དུ་གནས་འཁོད་བོད་མི་ཚོས་ཨིན་དི་ཨན་ནཱ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཟུར་པའི་རྒྱུས་བབ་རོགས་རམ་འོག་བོད་དོན་དྲིལ་བསྒྲགས་དོན་སྙིང་ལྡན་པ་ཞིག་གནང་ཡོད།  

རྒྱལ་སྤྱིའི་སྒྱུ་རྩལ་གྱི་དུས་སྟོན་ཉིན་མོ་འདི་ནི་ཨིན་དི་ཨན་ནཱའི་གཞུང་འབྲེལ་གྱི་བྱེད་སྒོ་གཞི་རྒྱ་ཆེ་བའི་གྲས་ཤིག་ཡིན་པ་དང་།  འདི་ལོའི་དུས་སྟོན་ཐེངས་ ༤༦ པའི་བརྗོད་བྱ་གཙོ་བོ་ནི་ “འཛམ་གླིང་ས་གནས་ཁག་གི་བཟོ་རིག་སྒྱུ་རྩལ།” ཞེས་པ་དེ་ཡིན་པར་བརྟེན།  གོང་གསལ་མངའ་སྡེ་གསུམ་ནང་གནས་འཁོད་བོད་མི་རྣམས་ཀྱིས་བརྗོད་བྱ་དང་མཐུན་པ་བྱས་ཏེ།  ཁྲོམ་སྟེགས་ཆུང་ཆུང་ཞིག་གི་སྒང་ལ་བོད་ཀྱི་བཟོ་རིག་སྒྱུ་རྩལ་དང་།  

བོད་ཀྱི་སྐོར་དཔར་རིས་དང་ཡིག་ལམ་འདྲེས་མའི་ངོ་སྤྲོད་སྙིང་བསྡུང་བྱས་པ་ཕུད།  ད་དུང་ཤིང་བརྐོས་སྒྱུ་རྩལ་དང་།  སྐུ་ཐང་།  སྐུ་འདྲ།  མ་ཎི་འཁོར་ལོ།  ཕྱག་དཔེ།  ཤིང་བརྐོས་ལས་གྲུབ་པའི་བཀྲ་ཤིས་རྟགས་བརྒྱད།  སྦག་དང་དུང་དཀར།  བོད་ཀྱི་སྔ་མོའི་མེ་ལྕགས།  ཟངས་ཀྱི་ཆུ་སྣོད་སོགས་ཐུན་མོང་མ་ཡིན་པའི་སྒྱུ་རྩལ་དང་རིག་གཞུང་དང་འབྲེལ་བའི་དངོས་རྫས་དང་།  བོད་ཀྱི་རྒྱལ་དར་དང་།  ས་ཁྲ།  དངུལ་ལོར་བཅས་འགྲེམས་སྟོན་གྱི་ལམ་ནས་བོད་ནི་ལོ་རྒྱུས་ཐོག་རྒྱལ་ཁབ་གཞན་དང་ཐ་དད་ཡིན་པའི་རྣམ་པ་གསལ་པོ་མཚོན་པར་བྱས་ཡོད་ལ།  བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་བོད་མིའི་སྒྲིག་འཛུགས་ཀྱི་ད་ལྟའི་སྲིད་བྱུས་དབུ་མའི་ལམ་གྱི་བྱུང་རིམ་ངོ་སྤྲོད་ཀྱི་དཔེ་དེབ་ཨིན་རྒྱ་སྐད་ཡིག་གཉིས་ནང་རིན་མེད་འགྲེམས་སྤེལ་གནང་ཡོད་པ་རེད།  

ཨིན་དི་ཨན་ནཱ་དང་།  ཁན་ཌ་ཀི། (Kentucky)  ཨོ་ཧ་ཡོ། (Ohio) བཅས་མངའ་སྡེ་གསུམ་ནང་གནས་འཁོད་བོད་མི་རྣམས་ཀྱིས་གོ་སྐབས་བཟང་པོ་དམ་འཛིན་གྱིས་རིག་གཞུང་དང་སྒྱུ་རྩལ་འགྲེམས་སྟོན་གནང་བའི་ལམ་ནས་བོད་དྲིལ་བསྒྲགས་གནང་བ་འདིས་དུས་སྟོན་ལ་ཡོང་མཁན་ཕྱི་རྒྱལ་བ་དང་།  ལྷག་པར་གཞོན་སྐྱེས་སློབ་ཕྲུག་རྣམས་ལ་བོད་ངོ་སྤྲོད་ཡོང་རྒྱུར་ཕན་ཐོགས་ངེས་ཅན་ཞིག་བྱུང་ཡོད་པ་སྨོས་མེད་ཡིན། ཐེངས་འདིའི་བོད་དོན་དྲིལ་བསྒྲགས་ཀྱི་བྱེད་སྒོའི་སྐབས་ (IU Bloomington) མཐོ་སློབ་ཀྱི་བོད་རིགས་སློབ་ཕྲུག་ནས་སེམས་རྩ་འཁོལ་པོའི་ངང་ནས་དང་བླངས་རོགས་རམ་གནང་འདུག་པ་ནི་དམིགས་བསལ་གྱི་བསྔགས་བརྗོད་འོས་པ་ཞིག་ཡིན་པ་བཅས།  །