༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༡༠ ཉིན་རྒྱ་གར་གྱི་བདེ་སྲུང་བློན་ཆེན་ཟུར་པ་དང་ཨུཏྟར་པྲདེཤ་མངའ་སྡེའི་སྤྱི་ཁྱབ་བློན་ཆེན་གནང་མྱོང་བ་སྐུ་ཞབས་མུ་ལཱ་ཡམ་སིངྒ་ཡཱ་དབ་ (Shri Mulayam Singh Yadav) མཆོག་སྙུང་གཞིའི་རྐྱེན་པས་སྐུ་ཚེའི་འཕེན་པ་རྫོགས་པར་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་དམ་པ་དེ་ཉིད་ཀྱི་བུ་དང་ས་མཱཇ་ཝ་དྷི་ (Samajwadi Party) ཆབ་སྲིད་ཚོགས་པའི་དབུ་ཁྲིད་ཨ་ཁི་ལེཤ་ཡཱ་དབ་(Shri Akhilesh yadav) མཆོག་གིས་གཙོས་པའི་ནང་མི་ཉེ་འབྲེལ་སོགས་ལ་ཐུགས་གསོའི་གསུང་འཕྲིན་ཕུལ་གནང་འདུག

དེ་ཡང་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་རྒྱ་གར་གྱི་བདེ་སྲུང་བློན་ཆེན་ཟུར་པ་དང་ཨུཏྟར་པྲདེཤ་མངའ་སྡེའི་སྤྱི་ཁྱབ་བློན་ཆེན་གནང་མྱོང་བ་སྐུ་ཉིད་ཀྱི་ཡབ་དམ་པ་མུ་ལཱ་ཡམ་སིངྒ་ཡཱ་དབ་མཆོག་སྐུ་ཚེའི་འཕེན་པ་རྫོགས་པར་བསྔོ་བ་སྨོན་ལམ་དང་། སྐུ་ཉིད་ཀྱིས་གཙོས་ནང་མི་ཉེ་འབྲེལ་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན། ཞེས་དང་།

དམ་པ་ཁོང་ནི། ཁྱད་དུ་འཕགས་པའི་རྒྱ་གར་གྱི་སྲིད་དོན་པ་དང་བོད་མིའི་བློ་ཐུབ་ཀྱི་གྲོགས་པོ་ཞིག་ཡིན། དེ་སྔ་སྐུ་འཚོ་བཞུགས་སྐབས་དམ་པ་ཁོང་གིས་བོད་དོན་སླད་རྒྱབ་སྐྱོར་གནང་ཡོད་པ་མ་ཟད། རྒྱ་གར་གྱི་གྲོས་ཚོགས་ནང་བོད་དོན་སྐོར་གླེང་སློང་ཤུགས་ཆེ་གནང་ཡོད་པས། ང་ཚོར་མཚོན་ན་དམ་པ་ཁོང་ནི་ཤིན་ཏུ་བཀའ་དྲིན་ཆེན་པོ་ཡིན། ང་ཚོས་སླར་ཡང་དམ་པ་དེ་ཉིད་ཀྱི་ཆེད་དུ་སྨོན་ལམ་དང་། ནང་མི་ཡོངས་ལ་ཐུགས་གསོ་ཞུ་རྒྱུ་ཡིན། སྐུ་ཉིད་ཀྱིས་ངོས་བཞེས་གནང་རོགས། ཞེས་འཁོད་ཡོད་པ་བཅས།།