༄༅། །སྦེལ་ཀོབ་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་གིས་ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༧ ཉིན་ཀྲཱྀ་ཤི་ཝི་དྱན་ཀེན་དྲ་རུ་ཚན་རིག་དང་མཐུན་པའི་ཤ་མོ་འདེབས་ལས་སྦྱོང་བརྡར་ཞིག་གོ་སྒྲིག་གནང་འདུག སྦྱོང་བརྡར་ནང་སྦེལ་ཀོབ་གཞིས་ཆགས་ཀྱི་ཞིང་པ་གྲངས་ ༡༦ དང་། སོ་ནམ་སློབ་སྟོན་པ་གཉིས། སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་གི་འགན་འཛིན་སོགས་མཉམ་ཞུགས་གནང་འདུག་ཅིང་། སྐབས་དེར་ཞིང་པ་རྣམས་ལ་རྩི་ཤིང་རིག་པའི་སློབ་དཔོན་པྲ་བ་ཀཱར་ལགས་དང་། ཧ་རིཤ་ལགས་གཉིས་ནས་ཚན་རིག་དང་མཐུན་པའི་ཤ་མོ་འདེབས་ལས་ཀྱི་རྣམ་གཞག་དང་ལག་ལེན་ཟུང་སྦྲེལ་གྱིས་སྦྱོང་བརྡར་གནང་འདུག་པ་མ་ཟད། རྗེས་སོར་ཞིང་པ་རྣམས་ཀྱི་དོགས་དྲི་ཁག་ལ་ལན་འདེབས་གསལ་བཤད་གནང་འདུག

ཐེངས་འདིའི་སྦྱོང་བརྡར་གྱི་དམིགས་ཡུལ་གཙོ་བོ་ནི། ཞིང་པ་རྣམས་ཤ་མོ་འདེབས་ལས་ལ་བརྟེན་ནས་འཚོ་བ་རང་སྐྱ་ཕེར་བ་ཡོང་ཆེད་རེད་འདུག སྦྱོང་བརྡར་གྱི་དཔལ་འབྱོར་མཐུན་རྐྱེན་ཨ་རིའི་རོགས་ཚོགས་ཀྱིས་གནང་འདུག་པ་བཅས།།