༄༅། །སྐུ་ཞབས་རི་ཤི་སུ་ནཱག་ (Rishi Sunak) མཆོག་ཨིན་ཡུལ་གྱི་སྲིད་བློན་དུ་བསྐོ་བཞག་བྱུང་བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༢ ཟླ་ ༡༠ ཚེས་ ༢༥ ཉིན་སྐུ་ཞབས་རི་ཤི་སུ་ནཱག་ (Rishi Sunak) མཆོག་ལ་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན། ངོས་རང་འདས་པའི་ལོ་ངོ་བཅུ་ཕྲག་ཁ་ཤས་རིང་འཆར་ཅན་ལྟར་ཨིན་ཡུལ་དུ་བསྐྱོད་པའི་སྐབས་ཨིན་ཡུལ་གྱི་མི་མང་གིས་མཛའ་བརྩེ་དང་གྲོགས་པོའི་འདུ་ཤེས་བསྟན་གནང་བས་སེམས་འགུལ་ཧ་ཅང་ཐེབས་བྱུང་ལ། ངོས་ཀྱིས་འགྲོ་བ་མི་གཅིག་གྱུར་གྱི་འདུ་ཤེས་དང་ཆོས་ལུགས་ནང་ཁུལ་འཆམ་མཐུན་གོང་མཐོར་གཏོང་ཐབས་སུ་འབད་བརྩོན་ཞུ་བཞིན་པར་ཨིན་ཡུལ་གྱི་མི་མང་གིས་དགའ་མོས་གནང་སྟབས་སེམས་ཤུགས་བསྐྱེད་བྱུང་། དེ་དང་ཆབས་ཅིག་ཏུ་ངོས་ཀྱིས་གོ་སྐབས་འདི་བརྒྱུད་ཨིན་ཡུལ་མི་མང་གིས་བོད་མིའི་མངོན་འདོད་རང་དབང་དང་ཆེ་མཐོང་སླད་རྒྱབ་སྐྱོར་གཡོ་བ་མེད་པར་གནང་དང་གནང་བཞིན་པར་བཀའ་དྲིན་ཤིན་ཏུ་ཆེ་ཞེས་ཞུ་རྒྱུ་ཡིན།
ད་ཆ་དཀའ་ངལ་ལ་གདོང་ལེན་གནང་དགོས་པའི་དུས་ཚོད་སླེབས་ཡོད། དེ་རིང་ཁ་སང་འཛམ་གླིང་ཡོངས་ཕན་ཚུན་གཅིག་ལ་གཅིག་བརྟེན་གྱིས་ཤུགས་ཆེ་གནས་ཡོད་སྟབས། འཛམ་གླིང་གི་ཕྱོགས་གཅིག་ལ་རྐྱེན་ངན་ཅི་འདྲ་ཞིག་བྱུང་ཡང་དེས་འཛམ་གླིང་ཡོངས་ལ་ཤུགས་རྐྱེན་ཐེབས་ཀྱི་ཡོད། དེར་བརྟེན་ངོས་ཀྱིས་སྐུ་ཉིད་ཀྱིས་མདུན་དུ་ལྷག་པའི་དཀའ་ངལ་ཁག་ལ་གདོང་ལེན་གནང་སྟེ་ཨིན་ཡུལ་གྱི་མི་མང་གི་མངོན་འདོད་བསྒྲུབ་ཐུབ་པ་དང་། འཛམ་གླིང་འདི་ཉིད་སྔར་ལས་ལྷག་ཞི་བདེ་ལྡན་པ་ཞིག་བསྐྲུན་ཐུབ་པའི་སྨོན་འདུན་ཞུ་རྒྱུ་ཡིན། ཞེས་འཁོད་ཡོད་པ་བཅས།།
