༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༢ ཟླ་ ༡༠ ཚེས་ ༢༣ ཉིན་ཨི་ཊ་ལིའི་སྲིད་བློན་གསར་པ་ལྕམ་སྐུ་ཇོར་ཇི་ཡ་མེ་ལོ་ནི་ (Giorgia Meloni) མཆོག་ལ་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན། ངོས་རང་འདས་པའི་ལོ་མང་པོའི་རིང་ཐེངས་འགའ་ཤས་སྐུ་ཉིད་ཀྱི་ལུང་པའི་ནང་བསྐྱོད་པའི་སྐབས་ཨི་ཊ་ལིའི་མི་མང་གིས་མཛའ་བརྩེ་དང་གྲོགས་པོའི་འདུ་ཤེས་བསྟན་གནང་སྟབས་དགའ་པོ་བྱུང་ལ། སེམས་འགུལ་ཡང་ཐེབས་བྱུང་།
ངོས་ཀྱིས་ཨི་ཊ་ལིའི་མཆེད་གྲོགས་ཕོ་མོ་ཚོས་བོད་མིའི་མངོན་འདོད་རང་དབང་དང་ཆེ་མཐོང་སླད་རྒྱབ་སྐྱོར་གཡོ་བ་མེད་པར་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། བརྗོད་འདོད་པ་ཞིག་ལ་ཨི་ཊ་ལིའི་སྲིད་བློན་གསར་པ་བུད་མེད་ཅིག་ཡིན་པས་ངོས་རང་དགའ་པོ་བྱུང་། རྒྱུ་མཚན་ནི། བུད་མེད་ཚོས་གཞན་གྱི་བདེ་སྡུག་གི་ཚོར་བ་རྣམས་བྱམས་བརྩེ་ལྡན་པའི་ངང་ནས་མང་བ་ཚོར་ཐུབ་ཀྱི་ཡོད་པའི་ཚན་རིག་དང་མཐུན་པའི་དཔང་རྟགས་སྟོན་རྒྱུ་ཡོད་ལ། ངོས་ཀྱིས་ཀྱང་དེ་ལྟར་ཡིད་ཆེས་བྱེད་ཀྱི་ཡོད། དེར་བརྟེན་བུད་མེད་རྣམས་ཀྱིས་གཞན་གྱི་བདེ་སྡུག་ཆེད་ཐུགས་ཁུར་དང་བྱམས་བརྩེ་མང་བ་སྟོན་གནང་གི་ཡོད།
ཨི་ཊ་ལི་དང་འགྲོ་བ་མིའི་རིགས་ཡོངས་ཀྱིས་དཀའ་ངལ་ལ་གདོང་ལེན་གནང་དགོས་པའི་དུས་ཚོད་ཅིག་ལ་སླེབས་ཡོད། དེ་རིང་ཁ་སང་འཛམ་གླིང་ཡོངས་ཕན་ཚུན་གཅིག་ལ་གཅིག་བརྟེན་ཤུགས་ཆེ་གནས་ཡོད་སྟབས། མི་སྒེར་དང་རྒྱལ་ཁབ་གཅིག་པུས་དཀའ་ངལ་རྣམས་སེལ་མི་ཐུབ། ང་ཚོ་སྤྱི་ཚོགས་རྒྱ་ཆེན་པོར་བརྟེན་ནས་འཚོ་བཞིན་ཡོད་པས། ང་ཚོས་གཅིག་གིས་གཅིག་ལ་བྱམས་བརྩེ་དང་སྙིང་རྗེ་མང་ཙམ་སྟོན་དགོས། ཞེས་དང་།
མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ལྕམ་སྐུ་ཇོར་ཇི་ཡ་མེ་ལོ་ནི་མཆོག་གིས་གོ་སྐབས་སྟངས་འཛིན་གྱིས་མདུན་དུ་ལྷག་པའི་དཀའ་ངལ་ལ་གདོང་ལེན་གནང་སྟེ་ཨི་ཊ་ལིའི་མི་མང་དང་། རྒྱ་ཆེ་ས་ནས་འཛམ་གླིང་མི་མང་གི་རེ་བ་བསྐང་ཐུབ་པའི་ཐུགས་སྨོན་མཛད་ཡོད་པ་བཅས།།
