༄༅། །འདི་གར་བྱང་ཨ་རི་སྐུ་ཚབ་དོན་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན།   ལོ་འཆར་ཅན་གྱི་ཕྱི་ཟླ་ ༡༠ ཚེས་ ༡༧ ནི།  ཨ་རིའི་གྲོས་ཚོགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་བཞེས་མཛད་པའི་དམིགས་བསལ་གྱི་ཉིན་མོ་ཞིག་ཡིན།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་དང་།  འཇིག་རྟེན་སྐྱེ་རྒུ་ཀུན་ལ་སྨན་པའི་རླབས་ཆེན་གྱི་མཛད་པ་བསྐྱངས་པ་དང་།  བོད་དོན་འཐབ་རྩོད་འཚེ་མེད་ཞི་བའི་ལམ་དུ་ཁྲིད་པ་གནང་བ་སོགས་ལ་བརྟེན་ནས་ནོ་སྦེལ་ཞི་བདེའི་གཟེངས་རྟགས་སོགས་ཆེ་བསྟོད་ངོས་འཛིན་གྱི་གཟེངས་རྟགས་ཆེ་ཆུང་བརྒྱ་ཕྲག་མང་པོ་འབུལ་བཞེས་མཛད་ཡོད་པའི་ཁྲོད་ནས་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ནི་གལ་གནད་ཆེ་ཤོས་ཤིག་ཡིན།  རྒྱུ་མཚན་དེར་བརྟེན་བཙན་བྱོལ་བོད་མི་གནས་ཡུལ་འཛམ་གླིང་ས་གནས་གང་སར་རྣམ་པ་འདྲ་མིན་དང་།  གཞི་རྒྱ་ཆེ་ཆུང་སྣ་ཚོགས་ཀྱི་ཐོག་ནས་དམིགས་བསལ་གྱི་ཉིན་མོ་འདི་སྲུང་བརྩི་ཞུ་གི་ཡོད་པ་བཞིན་བྱང་ཨ་རིའི་ནང་དུ་ཡང་རྣམ་པ་འདྲ་མིན་གྱི་ཐོག་ནས་སྲུང་བརྩི་ཞུས་ཡོད།  དེ་ཡང་ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཟེངས་རྟགས་འདི་འབུལ་བཞེས་མཛད་ནས་མི་ལོ་ཧྲིལ་པོ་བཅོ་ལྔ་འཁོར་གྱི་ཡོད་པ་དང་།  བྱང་ཨ་རིའི་ནང་བོད་མི་གནས་ཡུལ་ས་གནས་ཁག་ཏུ།  རང་རང་སོ་སོའི་གནས་བབ་ལ་གཞིགས་ནས་ཁག་གཅིག་གིས་སྔ་བསྣུར་དང་།  ཁག་གཅིག་གིས་ཕྲན་བུའི་འཕར་འགྱངས་ཀྱིས་སྲུང་བརྩི་ཞུས་ཡོད་ཅིང་།  དེའི་དགོས་དམིགས་གཙོ་བོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུ་དང་།  བོད་མི་ཡོད་དོ་ཅོག་གིས་ད་ལྟའི་ཆེས་གཉན་འཕྲང་གི་དུས་སྐབས་འདིར།  བཀའ་དྲིན་བཀའ་དྲིན་དུ་བསམ་ཤེས་པ་བྱས་ཏེ་གང་ཉིད་ཀྱི་བྱམས་བརྩེའི་བཀའ་སློབ་དགོངས་དོན་ཁག་ལག་བསྟར་དོན་འཁྱོལ་ཡོང་བ་བྱེད་དགོས་པའི་དྲན་སྐུལ་ཞུ་རྒྱུ་དེ་རེད། འདི་གར་ས་གནས་ནས་གནས་ཚུལ་འབྱོར་བ་དང་།  འདི་ནས་ཤེས་རྟོགས་བྱུང་བར་གཞིགས་ན།  འདི་ཚེས་ ༡༥ རེས་གཟའ་སྤེན་པའི་ཉིན་ཝར་མོཎ་བོད་རིགས་སྤྱི་མཐུན་ཚོགས་པ་ (Vermont) དང་།  ཨིན་དི་ཨན་ནཱ། (Indiana) དང་ཁན་ཌ་ཀི། (Kentucky)  ཨོ་ཧ་ཡོ་ (Ohio) བོད་རིགས་སྤྱི་མཐུན་ཚོགས་པ།  རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པ།  ཝ་ཤིང་ཀྲོན་བོད་རིགས་སྤྱི་མཐུན་ཚོགས་པ།  མི་ནི་སོ་ཌ་བོད་རིགས་སྤྱི་མཐུན་ཚོགས་པ།  ཁེ་ན་ཌ་ཨོན་ཊེ་རི་ཡོ་བོད་རིགས་སྤྱི་མཐུན་ཚོགས་པ།   བྱང་ཀེལ་བོད་རིགས་སྤྱི་མཐུན་ཚོགས་པ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་བཞེས་མཛད་པའི་དམིགས་བསལ་གྱི་ཉིན་མོ་སྲུང་བརྩི་ཞུས་པ་དང་།  ཆི་ཁ་གོ་བོད་རིགས་སྤྱི་མཐུན་ཚོགས་པས་ཚེས་ ༡༤  རེས་གཟའ་པ་སངས་ཉིན་སྲུང་བརྩི་ཞུས་ཡོད། གནས་ཚུལ་འབྱོར་བར་གཞིགས་ན།  ས་གནས་ཁག་གཅིག་གིས་འདི་ཚེས་ ༢༢ གཟའ་སྤེན་པ་དང་།  ས་གནས་ཁ་ཤས་ཀྱིས་དེའི་རྗེས་ཀྱི་གཟའ་ཉི་མ་སྟེ་ཚེས་ ༢༩ ཉིན་སྲུང་བརྩི་ཞུ་གི་ཡོད།  ས་གནས་སོ་སོར་སྲུང་བརྩི་ཞུས་པའི་འདྲ་པར་ཁག་གཅིག་གཟིགས་པ་པོའི་མཁྱེན་རྟོགས་སླད་འདིར་ཆེད་བཀོད་བྱས་ཤིང་།   གོང་ཞུས་ས་གནས་རེ་ཟུང་ནས་ས་གནས་སུ་ཡོད་པའི་ཆོས་ཚོགས་དང་ཟུང་འབྲེལ་མཉམ་རུབ་ཐོག་སྲུང་བརྩི་གནང་ཡོད་པ་བཅས།།