༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༨ ཉིན་འདི་ལོའི་ནོ་ཝེལ་ཞི་བདེའི་གཟེངས་རྟགས་བཞེས་མཁན་གྱི་མཚན་ཐོ་གསལ་བསྒྲགས་བསྐྱངས་པ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བེ་ལ་རུ་སིའི་སྐུ་ཞབས་ཨེ་ལི་སི་བྷ་ཧི་ལི་ཧཊ་སི་ཀི་ (Ales Bialiatski) ལགས་དང་། དྲན་རྟེན་ (Memorial) ཞེས་པའི་ཨུ་རུ་སུའི་འགྲོ་བ་མིའི་ཐོབ་ཐང་ཚོགས་པ། དེ་བཞིན་ཡུ་ཀེ་རེན་གྱི་འགྲོ་བ་མིའི་ཐོབ་ཐང་འཐབ་རྩོད་ཚོགས་པ་སྤྱི་དམངས་རང་དབང་གི་ལྟེ་གནས་ (Center for Civil Liberties) ཞེས་པ་བཅས་ལ་འཚམས་འདྲི་མཛད་འདུག  

དེ་ཡང་འཚམས་འཕྲིན་ནང་མགོན་པོ་མཆོག་གིས། ནོ་ཝེལ་ཞི་བདེའི་གཟེངས་རྟགས་འཐོབ་མཁན་རྣམས་ནས་འགྲོ་བ་མི་ཚང་མར་འདོད་པ་དང་འཇིགས་པ་ལས་རང་དབང་ཡོད་པ་མ་ཟད། འགྲོ་བ་མིའི་ཐོབ་ཐང་ནི་འགྲོ་བ་སྤྱི་ཡོངས་ལ་ཁྱབ་པའི་རིན་ཐང་ཞིག་ཏུ་ངོས་འཛིན་གནང་ཡོད། ནོ་ཝེལ་གཟེངས་རྟགས་ཚོགས་པས་ཁོང་ཅག་གི་ཞབས་འདེགས་ལ་ངོས་འཛིན་ཞུས་པ་འདིས་འགྲོ་བ་མིའི་གཞི་རྩའི་རིན་ཐང་ཞི་བདེ་དང་། རང་དབང་། མང་གཙོ་གོང་འཕེལ་གཏོང་བར་མི་སེར་གལ་གནད་ཆེན་པོ་ཡིན་པ་གསལ་སྟོན་གནང་ཡོད་པ་རེད། 

དེང་སྐབས་ཀྱི་དཀའ་ངལ་མང་དག་ཅིག་ལས་འགའ་ཤས་ནི་རང་འབྱུང་གི་གོད་ཆག་ཡིན་པས་དེ་དག་ལ་དང་ལེན་དང་བཏང་སྙོམས་ངང་གདོང་ལེན་བྱེད་དགོས། གཞན་རྣམས་ནི་ང་ཚོའི་ཕྱིན་ཅི་ལོག་གི་ལྟ་བས་བཟོས་པ་ཞིག་ཡིན་པ་དང་དེ་ལ་བཅོས་ཐབས་ཀྱང་ཡོད། དཀའ་ངལ་དེ་དག་ལས་མང་པོ་ཞིག་ང་ཚོ་འགྲོ་བ་མི་རིགས་གཅིག་ཏུ་བསྡུ་བར་བྱེད་མཁན་གྱི་གཞི་རྩའི་འགྲོ་བ་མིའི་རིགས་ཀྱི་རང་གཤིས་བརྗེད་དེ་ལྟ་ཚུལ་མ་མཐུན་པ་དང་། ཆབ་སྲིད་དང་ཆོས་ལུགས་ཀྱི་རྩོད་རྙོག དེ་བཞིན་གནས་ཚུལ་ཆུང་ཙག་ཐོག་ལ་འཁྲུག་པ་ལས་ཡོང་གི་ཡོད་པ་རེད། 

དེང་གི་དུས་སུ་མང་གཙོའི་རིན་ཐང་དང་། གུ་ཡངས་ཀྱི་སྤྱི་ཚོགས། འགྲོ་བ་མིའི་ཐོབ་ཐང་ལ་བརྩི་མཐོང་། འདྲ་མཉམ་ཀྱི་རིན་ཐང་རྣམས་འཇིག་རྟེན་སྤྱི་ཡོངས་ཀྱི་རིན་ཐང་དུ་ངོས་འཛིན་ཞུ་ཡི་ཡོད། མང་གཙོའི་རིན་ཐང་དང་གཞི་རྩའི་འགྲོ་བ་མིའི་བཟང་སྤྱོད་བར་འབྲེལ་བ་དམ་པོ་ཡོད་དེ། གང་ན་མང་གཙོ་ཡོད་ན་དེར་མི་སེར་ལ་གཞི་རྩའི་འགྲོ་བ་མིའི་ཁྱད་ཆོས་བསྟན་རྒྱུའི་གོ་སྐབས་ཆེ་བ་ཡོད། གང་ལ་གཞི་རྩའི་ཁྱད་ཆོས་དེ་དང་ལྡན་ན་དེ་རུ་མང་གཙོ་སྲ་བརྟན་གཏང་རྒྱུའི་གོ་སྐབས་མཐོ་བ་ཡོད་པ་རེད། གལ་གནད་ཆེ་ཤོས་སུ་འཛམ་གླིང་ཞི་བདེའི་ཆེད་མང་གཙོ་དེ་ཉིད་གཞི་རྟེན་ནུས་སྟོབས་ཆེ་ཤོས་ཡིན། 

གོ་ལ་སྤྱི་ཡོངས་སུ་ང་ཚོར་རིག་གཞུང་དང་ཆོས་ལུགས་སྣ་འཛོམས་ཡོད་པ་དེས་སྤྱི་ཚོགས་ཡོངས་ལ་འགྲོ་བ་མིའི་ཐོབ་ཐང་སྲ་བརྟན་གཏོང་བར་ཕན་ཐོགས་དགོས། རིག་གཞུང་དང་ཆོས་ལུགས་སྣ་འཛོམས་དེའི་འོག་ཏུ་འགྲོ་བ་མི་རིགས་གཅིག་གྱུར་དུ་བསྡུ་བར་བྱེད་མཁན་གྱི་གཞི་རྩའི་འགྲོ་བ་མིའི་ཁྱད་ཆོས་ལྡན། འགྲོ་བ་མིའི་ཐོབ་ཐང་གི་གནད་དོན་དེ་ནི་ཧ་ཅང་གལ་གནད་ཆེ་བས་དེར་ལྟ་ཚུལ་མི་མཐུན་པ་ཡོང་དགོས་དོན་མེད། ང་ཚོ་ཚང་མར་འགྲོ་བ་མི་ཐུན་མོང་གི་དགོས་མཁོ་དང་སེམས་ཁུར་ཡོད་ལ། རིགས་རུས་གོ་ཐོབ་དང་ཆོས་ལུགས་དབྱེར་མེད་ཐོག་ང་ཚོས་བདེ་བ་འདོད་ཅིང་སྡུག་བསྔལ་མི་འདོད་པ་ཡིན། ཞེས་དང་། 

མཐར་མགོན་པོ་གང་ཉིད་མཆོག་གིས། ངོས་ཀྱིས་འདི་ལོར་ནོ་ཝེལ་ཞི་བདེའི་གཟེངས་རྟགས་བཞེས་མཁན་གསུམ་ལ་འཚམས་འདྲི་དང་། གཟེངས་རྟགས་འདིས་མི་ཚང་མར་སེམས་སྐུལ་དང་། གྲོས་བསྡུར་དང་འགྲོ་བ་མིའི་བསམ་ཤེས་ཡོད་པའི་ཐོག་ནས་དཀའ་ངལ་སེལ་ན་ཕྱོགས་ཚང་མར་བདེ་སྐྱིད་དང་ཕན་ཐོགས་ཡོད་པ་དྲན་སྐུལ་གཏོང་ཐུབ་པའི་རེ་བ་ཡོད། ཅེས་བཀའ་སྩལ་འདུག །