༄༅། །འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༡༠ ཚེས་ ༢༠ ཉིན་སྦིར་བོད་མིའི་གཞིས་ཆགས་སུ་རྟེན་གཞི་བྱས་པའི་སྔ་འགྱུར་མཐོ་སློབ་དཔལ་ཡུལ་ཆོས་འཁོར་གླིང་གི་མཁན་ཐོག་བཞི་པའི་ཁྲི་འདོན་མངའ་གསོལ་གྱི་མཛད་སྒོར་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་མགྲོན་འབོད་ལྟར་ཆེད་ཕེབས་ཀྱིས་གསུང་བཤད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་མཛད་སྒོའི་སྐུ་མགྲོན་གཙོ་བོ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་༸སྐྱབས་རྗེ་མཁན་ཆེན་པདྨ་ཤེས་རབ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཆོས་རིག་ལས་ཁུངས་ཀྱི་དྲུང་ཆེ་འཆི་མེད་ཚེ་དབྱངས་ལགས། ཕྱོགས་བཞུགས་བོད་མི་མང་སྤྱི་འཐུས་དབང་འདུས་རྡོ་རྗེ་ལགས། གཞན་ཡང་དགོན་སྡེ་ཁག་གི་དབུ་འཛིན་དང་སྐུ་ཚབ། གཞུང་དང་གཞུང་ཁོངས་མ་ཡིན་པའི་ཚོགས་སྡེ་ཁག་ནས་ཕེབས་པའི་སྐུ་མགྲོན་རྣམ་པ་དབུ་བཞུགས་ཐོག སྔ་འགྱུར་དཔལ་ཡུལ་ཆོས་འཁོར་གླིང་གི་མཁན་ཐོག་ཁྲི་རབས་བཞི་པའི་མཚན་གནས་བཞེས་མཁན་གྱི་མཁན་པོ་བཅུ་བཞི་ནས་དགོན་པའི་རིགས་བདག་༸སྐྱབས་རྗེ་རི་མགོ་སྤྲུལ་སྐུ་རིན་པོ་ཆེ་མཆོག་དང་། མཁན་ཆེན་པདྨ་ཤེས་རབ་མཆོག་གི་སྐུ་མདུན་ནས་བསྟན་འགྲོའི་དོན་དུ་དམིགས་པའི་དམ་བཅའ་ཕུལ་བཞེས་རྗེས་མཁན་པོའི་ཕྱག་འཁྱེར་དང་དབུ་ཞྭ་བསྩལ་ཏེ་མཁན་པོའི་ཁྲིར་མངའ་གསོལ་ཞུས།
དེ་ནས་སྐུ་མགྲོན་རྣམ་པས་རིམ་བཞིན་མཁན་ཐོག་བཞི་པ་བཅུ་བཞི་རྣམས་ལ་འཚམས་འདྲིའི་མཇལ་དར་ཕུལ་གྲུབ་བསྟུན་རྟེན་འབྱུང་འབྲས་སིལ་དང་གསོལ་ཇ་འདེགས་འབུལ་ཞུས། དེ་རྗེས་དགོན་པའི་མཁན་པོ་ཨོ་རྒྱན་རིག་འཛིན་མཆོག་གིས་དགོན་པའི་ལོ་རྒྱུས་སྙིང་བསྡུས་སོགས་ངོ་སྤྲོད་གསུང་བཤད་གནང་རྗེས། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དགོན་པའི་རིགས་བདག་༸སྐྱབས་རྗེ་རི་མགོ་སྤྲུལ་སྐུ་རིན་པོ་ཆེ་མཆོག མཁན་ཆེན་པདྨ་ཤེས་རབ་མཆོག་བཅས་ནས་མཛད་སྒོ་དང་འབྲེལ་བའི་གསུང་བཤད་གནང་།
སྐབས་དེར་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་ཀྱིས་མཁན་ཐོག་བཞི་པ་རྣམས་ལ་འཚམས་འདྲི་ཞུས་པ་དང་ཆབས་ཅིག ༸སྐྱབས་རྗེ་རི་མགོ་སྤྲུལ་སྐུ་རིན་པོ་མཆོག་གིས་དཔལ་ཡུལ་ཆོས་འཁོར་གླིང་གསར་འཛུགས་མཛད་པ་ནས་བཟུང་ད་བར་རྒྱལ་བསྟན་སྤྱི་དང་བྱེ་བྲག་སྔ་འགྱུར་རྙིང་མའི་བསྟན་པ་མི་ཉམས་རྒྱུན་འཛིན་གནང་བར་བཀའ་དྲིན་རྗེས་དྲན་དང་། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དགོངས་ལྟར་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གནང་ཕྱོགས་ལ་འབད་འབུངས་ཆེ་བསྐྱེད་ངེས་པར་ཡོང་བའི་འབོད་སྐུལ་སོགས་ཀྱི་གསུང་བཤད་གནང་ཡོད་པ་བཅས།།
