༄༅། །ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ཕྱི་ལོ་ ༢༠༢༢ ཟླ་ ༡༠ ཚེས་ ༢༢ ཉིན་སྦེང་ལོར་གྲོང་ཁྱེར་དུ་ཆགས་པའི་སན་ཊི་ཇོན་སྨན་ཞབས་པའི་མཐོ་སློབ་ (St.John’s College of Nursing) ཏུ་སྦེང་ལོར་གྲོང་ཁྱེར་དུ་གཙུག་ལག་སློབ་གཉེར་ཁང་དང་། མཐོ་སློབ། སློབ་གཉེར་བསྟི་གནས་ཁང་སོགས་ཀྱི་ནང་སྨན་ཞབས་པའི་སློབ་སྦྱོང་བྱེད་བཞིན་པའི་བོད་པའི་སློབ་ཕྲུག་དང་ཐུག་འཕྲད་གནང་ཡོད། ད་ལྟའི་ཆར་སྦེང་ལོར་གྲོང་ཁྱེར་དུ་གཙུག་ལག་སློབ་གཉེར་ཁང་དང་། མཐོ་སློབ། སློབ་གཉེར་བསྟི་གནས་ཁང་སོགས་ཀྱི་ནང་རྒྱ་གར་དང་། བལ་ཡུལ། བོད་བཅས་ནས་ཕེབས་པའི་བོད་པའི་སློབ་ཕྲུག་གྲངས་ ༧༤ ཡིས་སློབ་སྦྱོང་གནང་གི་ཡོད།

དེ་ཡང་སན་ཊི་ཇོན་སྨན་ཞབས་པའི་མཐོ་སློབ་ཀྱི་ཟུར་ཁྲིད་པ་ངག་དབང་གསལ་སྒྲོན་ལགས་ཀྱིས་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱི་འཚམས་གཟིགས་སྐོར་ངོ་སྤྲོད་གནང་གྲུབ་རྗེས་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་སློབ་ཕྲུག་དང་མཉམ་དུ་གླེང་མོལ་གནང་སྐབས་སློབ་ཕྲུག་བརྒྱ་ཆ་ ༩༠ ཡིས་ལྷོ་སྤྱི་ལས་ཁུངས་སྐོར་རྒྱུས་མངའ་མེད་པའི་སྐོར་ཤེས་རྟོགས་བྱུང་ཡོད།

ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ལྷོ་སྤྱི་ལས་ཁུངས་ཀྱི་ཁྱབ་ཁོངས་དང་ལས་འགན། ཕྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མི་རྣམས་རྒྱ་གར་ལ་བཙན་བྱོལ་དུ་ཕེབས་པ། བོད་ནང་གི་བོད་མི་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་དང་དམ་ཚིག་གཡོ་བ་མེད་པར་གནས་བཞིན་ཡོད་པ། བཀའ་ཤག་སྐབས་བཅུ་དྲུག་པས་གཞིས་བྱེས་བོད་མིའི་མངོན་འདོད་བསྒྲུབ་སླད་སྲིད་བྱུས་དང་ལས་གཞི་གང་དང་གང་ལག་བསྟར་གནང་ཡོད་པ། བོད་པའི་སློབ་ཕྲུག་མི་རེ་ངོ་རེར་བོད་མིའི་ངོ་བོ་མི་ཉམས་རྒྱུན་འཛིན་གྱི་ཆེད་དུ་ལས་འགན་འཕར་མ་ཡོད་པ་སོགས་ཀྱི་སྐོར་གསུངས་ཡོད།དྲི་བ་དྲིས་ལན་སྐབས་སློབ་ཕྲུག་ཚོས་ཤེས་རིག་ལས་ཁུངས་ནས་སློབ་ཡོན་གནང་བཞིན་པའི་སྐོར་དང་། སན་ཊི་ཇོན་སྨན་ཞབས་པའི་མཐོ་སློབ་ཀྱི་སྨན་ཞབས་པའི་སློབ་མ་བཀྲ་ཤིས་ཆོས་འཛོམས་ལགས་ཀྱིས་སློབ་ཕྲུག་རྣམས་ཀྱིས་ལོ་རེར་ལས་འགུལ་ཇི་སྤེལ་སྐོར་ངོ་སྤྲོད་གནང་ཡོད། ལྷོ་སྤྱི་འཇིགས་མེད་ཚུལ་ཁྲིམས་ཀྱིས་ལྷོ་སྤྱི་ལས་ཁུངས་ཀྱི་ཚབ་ཞུས་ཏེ་སན་ཊི་ཇོན་སྨན་ཞབས་པའི་མཐོ་སློབ་དང་། ལྷག་པར་ཟུར་ཁྲིད་པ་ངག་དབང་གསལ་སྒྲོན་ལགས་ཀྱིས་ཐུག་འཕྲད་ཀྱི་ལས་རིམ་གོ་སྒྲིག་གནང་བར་ཐུགས་རྗེ་ཞུས་གནང་ཡོད་པ་བཅས།།