རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ ༦༢ འཁོར་བའི་དུས་དྲན་གྱི་མཛད་སྒོའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་དཔལ་ལྡན་ཚོགས་གཙོ་མཆོག་གི་གསུང་བཤད།

གསར་ལས་ཁང་གི་གསར་འགོད་པས།

༢༠༢༢-༡༠-༢༣

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༣ ཉིན་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ ༦༢ ཧྲིལ་པོ་འཁོར་བའི་དུས་དྲན་སྲུང་བརྩི་དང་འབྲེལ། གངས་ཅན་བོད་ཀྱི་ཨ་མ་བཀའ་ཟུར་ལྷ་སྐུ་རྗེ་བཙུན་པདྨ་མཆོག་ལ་བཀའ་དྲིན་གཏང་རག་གི་མཛད་སྒོ་ཞིག་ཚོགས་གནང་སོང་།

མཛད་སྒོའི་སྐུ་མགྲོན་གཙོ་བོར་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དེ་བཞིན་སྐུ་མགྲོན་དུ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག སྤྱི་འཐུས་རྒྱུན་ལས་དང་ཕྱོགས་བཞུགས་སྤྱི་འཐུས་ཁག་ཅིག གཞན་ཡང་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་སོགས་ཆེད་ཕེབས་གནང་འདུག

མཛད་སྒོའི་ཐོག་དཔལ་ལྡན་ཚོགས་གཙོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་དོན། རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ ༦༢ འཁོར་བའི་དུས་དྲན་གྱི་མཛད་སྒོའི་ཐོག་ཕེབས་པའི་སྐུ་མགྲོན་གཙོ་བོ་༸སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ། བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་རྣམ་པ། དྲུང་ཆེ་དང་འགན་འཛིན་རྣམ་པ། ཕྱི་ནང་གི་སྐུ་མགྲོན་རྣམ་པ། བོད་ཁྱིམ་སྤྱི་ཁྱབ་དབུ་འཛིན་མཆོག་དང་། འགན་འཛིན་སློབ་སྤྱི་དགེ་ལས་རྣམ་པ། བརྩེ་བའི་སློབ་ཕྲུག་རྣམ་པ། རྒྱ་ཆེའི་མང་ཚོགས་བཅས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།

དེ་རིང་ནི་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ཏེ་མི་ལོ་ ༦༢ འཁོར་བའི་དུས་ཚིགས་ཁྱད་པར་ཅན་ཞིག་ཡིན། དེ་ཡང་ཕྱི་ལོ་ ༡༩༥༩ ལོར་རྒྱ་ནག་དམར་པོའི་གཞུང་གིས་བོད་ཀྱི་སྣོད་བཅུད་ཡོངས་རྫོགས་བཙན་བཟུང་བྱས་ཏེ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་མི་ཁྲི་བརྒྱད་ཙམ་བཙན་བྱོལ་དུ་ཕེབས་དགོས་བྱུང་སྟེ་བོད་གཞིས་བྱེས་གཉིས་ཞེས་པའི་གནས་སྟངས་ཆགས། ཡིན་ན་ཡང་བོད་ཀྱི་རང་དབང་བསྐྱར་གསོ་དང་བོད་མི་རིགས་རིག་གཞུང་དང་བཅས་པ་རྒྱུན་གནས་ཐུབ་ཕྱིར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ཟབ་མོའི་འོག་བཙན་བྱོལ་བོད་ཕྲུག་ཚོར་གནའ་དེང་གི་ཤེས་ཡོན་སྤྲོད་རྒྱུའི་ཆེད་སློབ་གྲྭ་ཁག་ཆེད་མངགས་ཟུར་འཛུགས་མཛད་ཡོད།

ད་ལྟ་འདིར་ལོ་འཁོར་དུས་ཚིགས་སྲུང་བརྩི་ཞུ་བཞིན་པའི་བོད་ཕྲུག་ཁྱིམ་སྡེ་འདི་བཞིན་ཕྱི་ལོ་ ༡༩༦༠ ལོར་ཇ་མུ་ཁུལ་གྱི་བོད་རིགས་ལམ་བཟོ་བའི་བུ་ཕྲུག་ ༥༡ ཙམ་ཞིག་ཡོད་པ་ཐོག་མར་གསར་འཛུགས་ཀྱིས་༸སྐུའི་གཅེན་མོ་དམ་པ་ཚེ་རིང་སྒྲོལ་མ་མཆོག་ནས་ཐུགས་འགན་བཞེས་ཡོད་པ་དང་། ཕྱི་ལོ་ ༡༩༦༤ ལོ་ནས་༸སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་གིས་མི་ལོ་ ༤༢ ལྷག་གི་རིང་ཐུགས་འགན་བཞེས་ཤིང་། ད་ཆ་ཡང་བོད་ཁྱིམ་དབུས་སའི་ལས་དོན་རྣམས་ཐུགས་འཁུར་དང་ལམ་སྟོན་མཛད་བཞིན་ཡོད། ཁོང་གི་མཛད་རྗེས་ལ་ཡི་རངས་ཆེ་བསྟོད་མཚོན་ཆེད་རྒྱལ་སྤྱིའི་ཐོག་ནས་བསྔགས་བརྗོད་ཀྱི་གཟེངས་བསྟོད་རིགས་དང་། རང་རིགས་ཚོགས་སྡེ་ཁག་ཅིག་ནས་ཀྱང་བཀའ་དྲིན་རྗེས་དྲན་དང་ཆེ་བསྟོད་ཀྱི་གཟེངས་རྟགས། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཀྱང་གངས་ཅན་བོད་ཀྱི་ཨ་མ་ཞེས་པའི་མཚན་གསོལ་གཟེངས་རྟགས་ཤིག་ཀྱང་ཕུལ་ཡོད།

དེ་བཞིན་བོད་ཁྱིམ་དབུ་འཛིན་རིམ་པས་ཐུགས་འཁུར་ཆེར་བསྐྱེད་ཐོག་དགེ་ལས་རྣམས་ཀྱི་ལྷག་བསམ་འབད་འབུངས་ཁུར་སྐྱེད་ལ་བརྟེན་ནས་འཁོས་ཞན་ཉམ་ཐག་གི་ཕྲུ་གུ་སྤྱི་དང་། ལྷག་པར་དུ་བོད་ནས་གསར་དུ་འབྱོར་བའི་བོད་ཕྲུག་རྣམས་ལ་གཟིགས་སྐྱོང་གནང་ནས་བོད་བསྟན་སྲིད་མི་རིགས་རིག་གཞུང་ལ་སྨན་པའི་བྱས་རྗེས་རླབས་པོ་ཆེ་བཞག་གནང་བར་ཐུགས་རྗེ་ཆེ་ཞུ་རྒྱུ་དང་། དེ་བཞིན་དགོས་གལ་ལ་གཟིགས་ཏེ་ཡན་ལག་སློབ་གྲྭ་ཆུང་འབྲིང་ཆེ་གསུམ་དང་། མཐོ་སློབ། བཟོ་རིག་ཤེས་ཡོན་སྡེ་ཁག་དང་བཅས་པ་གསར་བསྐྲུན་རྒྱ་བསྐྱེད་གནང་ནས་བཙན་བྱོལ་བོད་མིའི་ཤེས་ཡོན་སྡེ་ཁག་གི་ཚོགས་སྡེ་ཆེ་ཤོས་ཤིག་ཏུ་གྱུར་ཡོད་པར་ཡི་རངས་བསྔགས་བརྗོད་ཞུ་རྒྱུ་ཡིན།

དེང་སྐབས་བཙན་བྱོལ་བོད་མིའི་སློབ་གྲྭ་ཁག་ཏུ་སློབ་ཕྲུག་གི་གྲངས་ཚད་ཇེ་ཉུང་དུ་འགྲོ་བཞིན་པའི་གནས་སྟངས་ཆགས་ཡོད་རུང་། སློབ་མའི་གྲངས་འབོར་ལ་མ་བལྟོས་པར། ཐབ་ཆུང་ཆུང་ལ་མེ་ཚ་པོ་ཞེས་པའི་དཔེ་ལྟར། ད་ཡོད་སློབ་མ་རྣམས་ཀྱི་ཤེས་ཡོན་གྱི་སྦྱངས་འབྲས་སྔར་ལས་ལྷག་པ་དང་། འཇོན་ཐང་ཅན། གནའ་དེང་གི་ཤེས་ཡོན་འདབ་ཤོག་ཟུང་ལྡན་ཤ་སྟག་ཡོང་རྒྱུའི་དམིགས་ཚད་བཟུང་སྟེ། འཛིན་སྐྱོང་སྤྱི་དང་ལྷག་པར་དུ་དགེ་རྒན་རྣམས་ཀྱིས་སློབ་ཕྲུག་ཚོར་རང་ཉིད་ཀྱི་བུ་ཕྲུག་ལྟར་བརྩེ་སེམས་བཅངས་ཏེ་ཤེས་ཡོན་གྱི་སྦྱངས་འབྲས་ཡག་ཐོག་ཡག་བརྩེགས་ཐོག ཐུན་མིན་བོད་ཀྱི་ཡ་རབས་ཀུན་སྤྱོད་བཟང་པོ་འཇགས་ཐབས་སུ་སྔར་ལྷག་ཤུགས་སྣོན་རྒྱག་དགོས་པའི་འབོད་བསྐུལ་ཞུ་རྒྱུ་དང་། དེ་བཞིན་སློབ་གྲྭའི་མ་མ་དང་། བུ་ཕྲུག་སོ་སོའི་ཕ་མའི་ངོས་ནས་ཀྱང་བུ་ཕྲུག་ཚོའི་ལུས་སེམས་བདེ་ཐང་ངང་འཚར་ལོངས་ཡོང་རྒྱུར་གཡོ་གཟོལ་མེད་པར་བྱམས་བརྩེས་བསྐྱངས་ཏེ་ཕྲུ་གུའི་འཕྲོད་བསྟེན་སོགས་གང་སྤྱིའི་ཐད་གཞོགས་འདེགས་གནང་དགོས་པའི་བསྐུལ་མ་ནན་ཏན་ཞུ་རྒྱུ་ཡིན།

བོད་ཕྲུག་ཁྱིམ་སྡེའི་ངོས་ནས་ཆོས་དང་རིག་གཞུང་གཅིག་པའི་ཧི་མ་ལ་ཡའི་རི་རྒྱུད་ཀྱི་བུ་ཕྲུག་སློབ་འཇུག་གནང་ནས་ཤེས་ཡོན་གྱི་གཟིགས་རྟོག་གནང་བཞིན་པ་ནི། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་མཐུན་ཅིང་། ཧི་མ་ལ་ཡའི་སྤྱི་ཚོགས་ནང་ཤེས་ཡོན་གོང་འཕེལ་ཡོང་ཐབས་དང་། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཐུབ་རྒྱུའི་ལས་གཞི་བསྐྱངས་དང་སྐྱོང་བཞིན་པ་ནི་རླབས་ཆེན་ཡིན་ལ། ལས་གཞི་འདི་བཞིན་མུ་མཐུད་རྒྱུན་སྐྱོང་ཐུབ་སླད་འབད་བརྩོན་གནང་དགོས་པའི་འབོད་བསྐུལ་ཡང་ཞུ་རྒྱུ་ཡིན།

འདས་མ་ཐག་པའི་ཕྱི་ལོ་ ༢༠༢༠ དང་ ༢༠༢༡ ལོའི་ནང་ནད་ཡམས་དབང་གིས་སློབ་གྲྭ་དངོས་སུ་ཚོགས་ཐུབ་མིན་གྱི་དཀའ་ངལ་འཕྲད་རུང་། འཛིན་སྐྱོང་དང་དགེ་ལས་ཡོངས་ཀྱིས་ཐབས་བརྒྱ་བྱུས་སྟོང་གིས་ཡུལ་ཁྲིམས་དང་མཐུན་པའི་དྲ་ལམ་སོགས་ཐབས་ལམ་སྣ་ཚོགས་བསྟེན་ནས་སློབ་ཕྲུག་ཚོའི་སློབ་སྦྱོང་ལ་འཐུས་ཤོར་མེད་པར་ཧུར་ཐག་གནང་ཡོད་པ་དང་། ནད་ཡམས་ཅུང་ཞི་ནས་འདི་ལོར་སློབ་གྲྭ་དངོས་སུ་ཚོགས་ཐུབ་པར་བརྟེན། སློབ་ཕྲུག་ཚོའི་སྦྱངས་འབྲས་སྤྱི་དང་ལྷག་པར་རྒྱ་གར་རྒྱལ་ཡོངས་ཡིག་རྒྱུགས་ཆེན་མོར་མཉམ་ཞུགས་མཁན་འཛིན་གྲྭ་ ༡༠ པ་དང་ ༡༢ ཀྱི་སློབ་མ་རྣམས་ལ་གཟིགས་སྐྱོང་དམིགས་བསལ་གནང་སྟེ། སྦྱངས་འབྲས་སྔར་ལྷག་ཐོབ་རྒྱུར་སྐུལ་ལྕག་གནང་དགོས་པ་དང་། བཙན་བྱོལ་བོད་མིའི་སྤྱི་ཚོགས་ནང་ཕྲུ་གུ་སྐྱེད་སྲིང་བྱེད་མཁན་ཉུང་དུ་འགྲོ་བཞིན་པ་དང་། དེའི་སྟབས་ཀྱིས་བུ་ཕྲུག་སློབ་འཇུག་བྱེད་མཁན་ཡང་ཉུང་དུ་འགྲོ་བཞིན་པ་དོན་དངོས་སུ་གྱུར་སྟབས་སློབ་གྲྭའི་འཛིན་སྐྱོང་བྱ་ཕྱོགས་དང་། སློབ་ཡོན་གྱི་སྡེ་ཁག་རྣམས་ཚགས་ཚུད་ཡོང་བ་བཅས་ལ་ཐབས་ལམ་གང་ཡོད་བསྟེན་གནང་དགོས་པའི་གཞེན་སྐུལ་ཞུ་རྒྱུ་ཡིན།

དེང་གི་དུས་སུ་བོད་ཀྱི་སྐད་ཡིག་ནི་བཀའ་བསྟན་འགྱུར་པོད་གསུམ་བརྒྱ་ལྷག་ཆ་ཚང་བཞུགས་ཡོད་པའི་ལེགས་སྦྱར་དང་དོ་མཉམ་པའི་ནང་ཆོས་ཀྱི་སྲོག་ཤིང་ལྟ་བུ་འཛམ་གླིང་འདིའི་ནང་གི་སྐད་ཡིག་གཅིག་པུ་དེ་ཆགས་ཡོད། འོན་ཀྱང་རྒྱ་གཞུང་གིས་བོད་མི་རིགས་རིག་གཞུང་དང་བཅས་པ་རྩ་མེད་བཟོ་རྒྱུའི་མཁྲེགས་འཛིན་གྱི་སྲིད་བྱུས་ལག་བསྟར་བྱེད་བཞིན་པར་བརྟེན། བོད་ནང་གི་རང་རིགས་སློབ་ཕྲུག་དང་དོན་གཉེར་ཅན་མང་པོས་སློབ་གྲྭའི་གུང་གསེང་དང་སྟབས་བསྟུན་ནས་བོད་ཀྱི་སྐད་ཡིག་ཟུར་ཁྲིད་བྱས་དང་བྱེད་བཞིན་པ་རྣམས་རྒྱ་གཞུང་གིས་ཁྲིམས་འགལ་ཡིན་པའི་བསྙོན་འཛུགས་བྱས་ཏེ་སྒོ་བརྒྱབས་པ་སོགས་དམ་དྲག་བྱེད་ཤུགས་ཆེ་རུ་གཏོང་བཞིན་ཡོད། དེར་བརྟེན་བཙན་བྱོལ་བོད་མི་རྣམས་ཀྱིས་བོད་ཀྱི་སྐད་ཡིག་ཐད་སྣང་མེད་དུ་མི་ཤོར་བར་རང་དབང་ཆ་ཚང་ཡོད་པའི་གོ་སྐབས་བཟང་པོ་དམ་འཛིན་བྱས་ཏེ་རང་དོན་རང་གཅེས་ཀྱིས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་ཐོག་ཤུགས་སྣོན་རྒྱག་དགོས་པའི་སྐུལ་མ་ཞུ་རྒྱུ་ཡིན།

དེང་གི་ཆར་བོད་ནང་དུ་ནད་ཡམས་ཀྱི་དཀའ་ངལ་ཡོད་མོད། རྒྱ་ནམ་དམར་ཤོག་ཚོགས་ཆེན་ཐེངས་ ༢༠ པ་ཟེར་བ་ལམ་ལྷོངས་ཡོང་ཆེད་བོད་མི་རྣམས་ཕར་འགྲོ་ཚུར་འོང་བྱེད་མི་ཆོག་པ་སོགས་དམ་དྲག་ཤུགས་ཆེ་བྱེད་བཞིན་པའི་གནས་སྟངས་འོག་ཞིང་པ་རྣམས་ཀྱི་སྟོན་འབྲས་བསྡུ་ལེན་བྱ་རྒྱུ་སོགས་ཀྱི་ཐད་དཀའ་ངལ་འཕྲད་བཞིན་པ་ཙམ་དུ་མ་ཟད། ས་གནས་ས་ཐོག་ཀྱི་ཟུར་བཀག་བྱ་ཡུལ་གྱི་མཐུན་རྐྱེན་དང་སྨན་བཅོས་སོགས་ཀྱི་ལས་དོན་ཚགས་ཚུད་མེད་པར་བརྟེན་བོད་མི་འགའ་ཤས་རང་ཤི་བརྒྱབས་པའི་གནས་ཚུལ་ཡང་ཐོན་ཡོད་པ་དང་། དེ་བཞིན་དངོས་ཡོད་ཀྱི་གནས་སྟངས་བཤད་མཁན་བོད་མི་རྣམས་འཛིན་བཟུང་བཀག་ཉར་བྱེད་པ་སོགས་ནི་སེམས་འཚབ་སྐྱེ་གཞི་ཞིག་ཏུ་གྱུར་ཡོད་པས། བོད་ནང་ནད་ཡམས་སོགས་རང་བྱུང་གི་གོད་ཆག་བྱུང་སྐབས་རྒྱ་གཞུང་གིས་ཆབ་སྲིད་ཀྱི་དགོས་མཁོའི་ལག་ཆ་ལྟ་བུ་གཏན་ནས་བྱེད་མི་རུང་བ་ནན་བརྗོད་བྱ་རྒྱུ་ཡིན།

མཐའ་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་བཞེད་མཐའ་དག་ལྷུན་གྱིས་འགྲུབ་ཅིང་བོད་དོན་བདེན་མཐའ་མྱུར་དུ་གསལ་བ་དང་། བོད་ཕྲུག་ཁྱིམ་སྡེའི་ལས་དོན་རྣམས་ཡར་རྒྱས་གོང་འཕེལ་ཡོང་བའི་སྨོན་འདུན་དང་བཅས། བོད་མི་མང་སྤྱི་འཐུས་ལྷན་ཚོགས་ནས། ཕྱི་ལོ་ ༢༠༢༢ ཟླ་ ༡༠ ཚེས་ ༢༣ ལ།།

གསར་གནས།