༄༅། །བོད་ཀྱི་སྲིད་བྱུས་ཉམས་ཞིབ་ཁང་གིས་ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༧ ནས་ ༡༩ བར་ཉིན་གྲངས་གསུམ་རིང་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་རྒྱ་གར་ན་གཞོན་ཉམས་ཞིབ་པའི་ཚོགས་འདུ་ཐེངས་བཞི་པ་གོ་སྒྲིག་གནང་ཡོད། ཐེངས་འདིའི་ཚོགས་འདུའི་བརྗོད་སྙིང་བོད་དང་ཧི་མ་ལ་ཡ་ཡིན་ཞིང་། བརྗོད་གཞི་དེ་དང་འབྲེལ་ནས་རྒྱ་གར་ནང་གི་ན་གཞོན་ཉམས་ཞིབ་པ་རྣམས་ཀྱིས་དཔྱད་རྩོམ་སྒྲོགས་སྦྱང་གནང་ཡོད་པ་རེད།

ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ཆེད་ཕེབས་ཀྱིས་རྒྱལ་སྤྱིའི་ཐོག་བོད་ཀྱི་གལ་གནད་སྐོར་གསུང་བཤད་གནང་ཞིང་། དེ་རྗེས་འབྲས་ལྗོངས་གཙུག་ལག་སློབ་ཁང་གི་ཉེ་བའི་རིགས་བདག་ཟུར་པ་གཙུག་ལག་སློབ་དཔོན་ཊཾཀཱ་བཧཱ་དུར་སུབྦ་ལགས་ཀྱིས་ན་གཞོན་རྣམས་ནས་བོད་ཀྱི་གནད་དོན་ཐད་དོ་སྣང་དང་འགན་ཁུར་དགོས་པའི་འབོད་སྐུལ་དང་སྦྲགས། བོད་རིགས་མི་རབས་རྒན་པ་རྣམས་ཀྱི་གཏམ་རྒྱུད་ནི་ལོ་རྒྱུས་ཀྱི་གཞི་རྟེན་དང་ཕྱི་རབས་པ་རྣམས་ལ་རྩིས་སྤྲོད་བྱ་རྒྱུའི་དྲན་ཐོ་ཡིན་སྟབས་དེ་དག་ལ་གུས་བརྩི་དང་བདག་པོ་རྒྱག་དགོས་པ་གལ་ཆེན་པོ་ཡིན་ཞེས་གསུངས།

ཚོགས་འདུའི་ཐོག་ཉམས་ཞིབ་པ་ ༣༥ ནས་བརྗོད་གཞི་རྒྱལ་ཁབ་དང་བདེ་འཇགས། བོད་དང་ནུབ་ཧི་མ་ལ་ཡའི་འབྲེལ་བ། ཧི་མ་ལ་ཡའི་ཤར་ཕྱོགས་སུ་དར་བའི་ནང་ཆོས་དང་རིག་གཞུང་། བཙན་བྱོལ་བོད་མིའི་རང་དབང་འཐབ་རྩོད། ཧི་མ་ལ་ཡའི་སྣོད་བཅུད། ཡར་རྒྱས། གནམ་གཤིས་འགྱུར་ལྡོག་གི་ངན་འབྲས། ཚོང་འབྲེལ་སོགས་ཀྱི་སྐོར་གསུང་བཤད་གནང་ཡོད། གཞན་ཡང་ཚོགས་འདུའི་ཐོག་བོད་དང་ཧི་མ་ལ་ཡའི་ཐོག་ཁྱད་མཁས་པ་ཁག་གཅིག་མཉམ་ཞུགས་གནང་ཡོད། ལེ་ཊི་ཤྲི་རམ་མཐོ་སློབ་ (Lady Shri Ram College) ཀྱི་ཉེ་བའི་སློབ་དཔོན་ཆེན་མོ་འབུམ་རམས་པ་ཝ་སུ་ད་པན་ཊེ་ལགས་ཀྱིས་ཧི་མ་ལ་ཡར་གནམ་གཤིས་འགྱུར་ལྡོག་དང་འབྲེལ་ཏེ་ས་གཤིས་རིག་པའི་ལོ་ཚད་ཁྱབ་ཁོངས་ཆ་བགོས་བྱ་རྒྱུའི་གལ་གནད་དང་། འབུམ་རམས་པ་པྲ་ཤན་ནེ་གྷི་ལགས་ཀྱིས་བོད་དང་ཁུ་ནུ་བར་གྱི་འབྲེལ་བའི་སྐོར། འབུམ་རམས་པ་སྭ་ཏི་ཅ་ཧུ་ལ་ལགས་ཀྱིས་ཕྱི་ལོ་ ༡༩༥༠ ཙམ་ནས་བོད་མི་རྒྱ་གར་དུ་བྲོས་བྱོལ་དུ་འབྱོར་ཚུལ་སྐོར་གསུང་བཤད་གནང་ཡོད་པ་རེད།

ཚོགས་འདུ་འདི་ནང་གཙོ་བོ་བརྗོད་སྙིང་དུ་བོད་བཞག་པའི་ཐོག་འཕགས་བོད་ཀྱི་འབྲེལ་བར་དཀའ་ངལ་དང་། ལོ་རྒྱུས་ཐོག་གལ་གནད་ཆེ་ཚུལ། དེ་བཞིན་མདུན་སྐྱོད་བྱེད་ཕྱོགས་ཇི་དགེའི་སྐོར་བགྲོ་གླེང་གནང་ཡོད་པ་བཅས།།