༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༡ དང་ ༠༢ ཉིན་ཨི་ཊ་ལཱིའི་མི་ལན་དུ་ཡུ་རོབ་སྤྱི་མཐུན་ཚོགས་པའི་ལོ་འཁོར་ཚོགས་ཆེན་ཐེངས་གསུམ་པ་བསྐོང་ཚོགས་གནང་ཡོད། ཐེངས་འདིའི་ཚོགས་འདུ་དེ་བཞིན་སུད་སི་སྐུ་ཚབ་དོན་ཁང་དང་། ཡུ་རོབ་ཁུལ་གྱི་བོད་མི་མང་སྤྱི་འཐུས་རྣམ་པ། ཨིན་ཡུལ་སྐུ་ཚབ་དོན་ཁང་། བེལ་ཇམ་སྐུ་ཚབ་དོན་ཁང་། པེ་རི་སིའི་འབྲེལ་མཐུད་པ། ཨི་ཊ་ལཱི་ཁུལ་གྱི་བོད་རིགས་བཅས་ནས་མཉམ་སྦྲེལ་ཐོག་གོ་སྒྲིག་ཞུས་ཡོད་པ་རེད།

ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཆེད་ཕེབས་ཀྱིས་བོད་དོན་ལ་ནུབ་ཕྱོགས་སྲིད་གཞུང་ཁག་གིས་རྒྱབ་སྐྱོར་གནང་བ་དེ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཡིན་པ་དང་། དེ་ལ་བརྟེན་ནས་ད་བར་བོད་དོན་གསོན་པོར་གནས་ཐུབ་པ་བྱུང་ཡོད་ཅེས་དང་། མ་འོངས་བོད་ཀྱི་སོན་རྩ་རྣམས་ལ་བོད་ཀྱི་ཆོས་དང་རིག་གཞུང་། ད་ལྟའི་བོད་ནང་གི་གནས་སྟངས་སོགས་ཀྱི་གོ་རྟོགས་སྤེལ་ཏེ་བོད་རིགས་གཞོན་སྐྱེས་རྣམས་བོད་ཀྱི་འཐབ་རྩོད་དང་ཐག་ཇེ་ཉེར་གཏོང་རྒྱུ་གལ་ཆེན་པོ་ཡིན་པའི་སྐོར། ཡུ་རོབ་མཐུན་ཚོགས་གཙོས་པའི་རྒྱལ་ཁབ་ཁག་ཏུ་བོད་དོན་ཞུ་གཏུག་གནང་སྐབས་སྤྱི་མཐུན་གྱི་འབད་རྩོལ་ནི་ཐབས་ལམ་གལ་ཆེ་ཤོས་ཡིན་སྐོར། དེ་བཞིན་བོད་མི་རྣམས་ནས་གནས་ཡུལ་མི་མང་དང་ལྷན་དུ་མཐུན་ལམ་གང་ལེགས་དགོས་གལ་ཆེ་བ་སོགས་ཀྱི་སྐོར་གསུངས། དེ་རྗེས་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཚོགས་འདུའི་ཐོག་ཕེབས་བསུའི་གསུང་བཤད་དང་གྲོས་གཞི་ཁག་ངོ་སྤྲོད་གནང་རྗེས་ཚོགས་འདུ་དངོས་སུ་དབུ་འཛུགས་གནང་ཡོད། ཉིན་གཉིས་ཀྱི་ཚོགས་འདུའི་ཐོག་ཡུ་རོབ་ཁུལ་གྱི་ས་གནས་དགུ་ནས་ཚོགས་བཅར་བ་ ༢༧ མཉམ་ཞུགས་ཀྱིས་གྲོས་གཞི་ལྔའི་ཐོག་བགྲོ་གླེང་གནང་ཡོད་ཅིང་། ཚོགས་འདུའི་གཙོ་སྐྱོང་ཡུ་རོབ་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་དང་། ཐུབ་བསྟན་རྒྱ་མཚོ་ལགས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། བེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་གནང་ཡོད།

ཐེངས་འདིའི་ཚོགས་འདུའི་ཟུར་ཉན་དུ་ཡུ་རོབ་ཁུལ་གྱི་བོད་དོན་རྒྱབ་སྐྱོར་ཚོགས་པ་ཁག་འགའ་ཤས་ཀྱི་སྐུ་ཚབ་ཕེབས་ཡོད་པ་བཅས།།