༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༦ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་བོད་རྒྱལ་ཡོངས་རྩེད་རིགས་ཚོགས་པའི་འགན་འཛིན་བསྟན་འཛིན་རིན་ཆེན་ལགས་རྣམ་གཉིས་ཨ་རིར་ཕེབས་འབྱོར་སྐབས་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཕེབས་བསུའི་སྣེ་ལེན་ཞུས་ཡོད།
དེ་ཡང་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་བསྟན་འཛིན་རིན་ཆེན་ལགས་རྣམ་གཉིས་ཨ་རི་ནིའུ་ཡོག་དང་ཝ་ཤིང་ཀྲོན་ཁུལ་དུ་བོད་རྒྱལ་ཡོངས་རྩེད་རིགས་ཚོགས་པའི་ཆེད་ཞལ་འདེབས་བསྡུ་རུབ་དང་གོ་རྟོགས་སྤེལ་བར་ཕེབས་ཡོད་པ་རེད།
ཨ་རིར་ཁོང་གཉིས་ནས་ཨེ་ཤི་ཡ་རང་དབང་རླུང་འཕྲིན་ཁང་གི་གླེང་མོལ་ལེ་ཚན་དང་ཨ་རིའི་རླུང་འཕྲིན་ཁང་གི་ཀུན་གླེང་ལེ་ཚན་གཉིས་སུ་མཉམ་ཞུགས་ཀྱིས་བོད་རྒྱལ་ཡོངས་རྩེད་རིགས་ཚོགས་པའི་སྐོར་གོ་རྟོགས་སྤེལ་ཡོད་པ་དང་། ཕྱི་ཚེས་ ༠༦ ཉིན་རྒྱལ་ས་ཁུལ་གྱི་བོད་རིགས་ཚོགས་པས་ཁོང་རྣམ་གཉིས་ལ་དགོང་ཚིགས་འདེགས་འབུལ་དང་ཞལ་འདེབས་བསྡུ་རོགས་གནང་ཡོད། སྐབས་དེར་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སྤྱི་ཡོངས་གནས་སྟངས་དང་། གྲུབ་འབྲས་ཇི་སོན། ད་ལྟའི་རྒྱ་བལ་འབྲུག་གསུམ་ནང་ཡོད་པའི་བོད་མིའི་སྤྱི་ཚོགས་ཀྱི་འཕྲོད་བསྟེན་གནས་སྟངས་སྐོར་འགྲེལ་བརྗོད་གནང་ཡོད།
དེ་ནས་ཕྱི་ཚེས་ ༠༧ ཉིན་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་རྒྱལ་སྤྱིའི་བོད་དོན་ལས་འགུལ་ཁང་དུ་ཕེབས་ཡོད་པ་དང་། དེར་ཉིན་གུང་ཞལ་ལག་འདེགས་འབུལ་ཞུས་ཤིང་། ཕྱི་དྲོ་ནིའུ་ཡོག་ལ་ཕེབས་ཐོན་གནང་ཡོད།
སྤྱིར་བོད་རྒྱལ་ཡོངས་རྩེད་རིགས་ཚོགས་པ་ནི་བོད་མིའི་སྒྲིག་འཛུགས་ཁྱབ་ཁོངས་རྩེད་རིགས་ཚོགས་པ་ཞིག་ཡིན་པ་དང་། དེ་ཉིད་ཕྱི་ལོ་ ༢༠༢༢ ཟླ་བ་ ༠༥ ནང་འཛམ་གླིང་གང་སར་གནས་པའི་བོད་རིགས་རྣམས་ལ་རྩེད་མོའི་འདུ་ཤེས་གོང་མཐོར་གཏང་རྒྱུ་དང་། གཟེངས་སུ་ཐོན་པའི་རྩེད་འགྲན་པ་སྐྱེད་སྲིང་སླད་ཆེད་འཛུགས་གནང་བ་ཞིག་ཡིན། །
