༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གིས་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་ལྡི་ལི་གསར་འགོད་ལས་རིགས་སློབ་གཉེར་ཁང་དུ་གསར་འགོད་ལས་རིགས་སློབ་སྦྱོང་གནང་བཞིན་པའི་སློབ་ཕྲུག་རྣམས་ལ་བོད་དོན་སྐོར་གོ་རྟོགས་སྤེལ་གནང་ཡོད་པ་དང་། ལས་གཞི་དེ་ནི་འཕགས་བོད་འབྲེལ་མཐུད་ལས་ཁང་གི་འགན་འཛིན་ལས་ཚབ་བཀྲ་ཤིས་བདེ་སྐྱིད་ལགས་དང་འབྲེལ་ཡོད་ལས་བྱེད་ཆོས་ཉིད་ཚེ་རིང་ལགས་ཀྱིས་གོ་སྒྲིག་གནང་ཡོད། སྐབས་དེར་ལྡི་ལི་གསར་འགོད་ལས་རིགས་སློབ་གཉེར་ཁང་གི་ངེས་སྟོན་པ་ཇེ་པི་དུ་བྷེ་ (J. P. Dubey) ལགས་ཀྱིས་གཙོས་དགེ་ལས་སློབ་ཕྲུག་རྣམས་མཉམ་ཞུགས་གནང་ཞིང་། ཁོང་ཚོ་ནི། འཕགས་བོད་འབྲེལ་མཐུད་ལས་ཁང་གི་གོ་སྒྲིག་འོག་ཕྱི་ཟླ་ ༡༠ ཚེས་ ༡༩ ནས་ ༢༡ བར་ཤེས་ཡོན་གོ་རྟོགས་སླད་རྡ་སར་གཟིགས་སྐོར་གནང་གཏན་ཁེལ་ཡོད།དེ་ཡང་འཕགས་བོད་འབྲེལ་མཐུད་ལས་ཁང་གི་འགན་འཛིན་ལས་ཚབ་བཀྲ་ཤིས་བདེ་སྐྱིད་ལགས་ཀྱིས་སློབ་ཕྲུག་རྣམས་ལ་འཕགས་བོད་འབྲེལ་མཐུད་ལས་ཁང་གི་ལས་དོན་གནང་ཕྱོགས་དང་། ད་ལྟའི་བོད་ནང་གི་ཛ་དྲག་གི་གནས་སྟངས། འཕགས་བོད་གཉིས་ཀྱི་འབྲེལ་བ་དང་དེའི་གལ་གནད་སོགས་ཀྱི་སྐོར་ངོ་སྤྲོད་གནང་གྲུབ་མཚམས་འཕགས་བོད་འབྲེལ་མཐུད་ལས་ཁང་གི་འབྲེལ་ཡོད་ལས་བྱེད་ཆོས་ཉིད་ཚེ་རིང་ལགས་ཀྱིས་སློབ་ཕྲུག་རྣམས་འབྱུང་འགྱུར་རྡ་སར་གཟིགས་སྐོར་དང་འབྲེལ་བའི་སྐོར་ལམ་སྟོན་གནང་གྲུབ་རྗེས་སློབ་ཕྲུག་གི་དྲི་བར་ལན་འདེབས་གནང་ཡོད།

མཐར་འཕགས་བོད་འབྲེལ་མཐུད་ལས་ཁང་གི་འགན་འཛིན་ལས་ཚབ་བཀྲ་ཤིས་བདེ་སྐྱིད་ལགས་ཀྱིས་ལྡི་ལི་གསར་འགོད་ལས་རིགས་སློབ་གཉེར་ཁང་གི་ངེས་སྟོན་པ་ཇེ་པི་དུ་བྷེ་ལགས་ལ་ཐུགས་རྗེ་ཆེ་ཞུ་མཚོན་ཆེད་དུ་བོད་དོན་སྐོར་གྱི་དཔེ་དེབ་ཕུལ་ཏེ་ཚོགས་འདུ་གྲོལ་ཡོད་པ་བཅས།།