༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༡༠ ཚེས་ ༥ ཉིན་བྱང་ཨ་རི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པའི་གོ་སྒྲིག་འོག་ཨ་རིར་རྟེན་གཞི་བྱས་པའི་རྒྱ་ནག་མི་སེར་ནུས་སྟོབས་ལས་འགུལ་ཁང་གི་འགན་འཛིན་ཡང་ཅན་ལི་ཡིས་སྣེ་ཁྲིད་པའི་ཚོགས་པའི་རྒྱ་ནག་ཉམས་ཞིབ་པ་ཚའི་ཞྭ་ལགས་དང་ཧན་ལེན་ཁྲོའོ་ཡི་ལགས་ཀྱིས་གཙོས་པའི་ཚོགས་མི་ཁག་དང་ལྷན་བོད་རྒྱ་འབྲེལ་མཐུད་ཀྱི་ལས་འཆར་ཡར་རྒྱས་དང་གོང་འཕེལ་གཏོང་ཐབས་སུ་ཚོགས་འདུ་འཚོགས་ཡོད་པ་དང་། རྒྱ་ནག་ནང་དམར་ཤོག་གཞུང་གི་སྐབས་ཉི་ཤུ་པའི་འགོ་ཁྲིད་འཕོ་འགྱུར་གྱི་གནས་ཚུལ་དང་དེ་མིན་བརྗོད་གཞི་མང་པོའི་ཐོག་བཀའ་མོལ་ལྷུག་པོ་བྱུང་ཡོད།

དེ་ཡང་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས། བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་མུ་མཐུད་ལག་བསྟར་གནང་མུས་ཡིན་ཡང་། ད་ལྟ་རྒྱ་ནག་གི་འཆར་གཞི་ལྡན་པའི་དྲག་གནོན་ཅན་གྱི་སྲིད་བྱུས་འོག་བོད་མི་ཚོས་དཀའ་སྡུག་མྱོང་བཞིན་པའི་སྐོར་རྒྱ་ནག་གི་སྲིད་གཞུང་དང་རྒྱལ་སྤྱིའི་ཐོག་ལ་ཞུ་གཏུག་གནང་མུས་ཡིན་སྐོར་དང་།  དེ་བཞིན་མ་འོངས་པར་བོད་རྒྱའི་གྲོས་མོལ་ཡར་རྒྱས་ཡོང་བར་བོད་རྒྱ་མི་རིགས་གཉིས་དབར་འབྲེལ་ལམ་གོང་འཕེལ་གཏོང་ཐབས་སུ་སྐུ་ཚབ་དོན་ཁང་ནས་འབད་བརྩོན་གནང་རྒྱུ་དང་། དེའི་ཐད་ཚོགས་པའི་ངོས་ནས་རོགས་རམ་ཡོང་བའི་འབོད་སྐུལ་གནང་བ་དང་། བོད་རྒྱ་གཉིས་ཀྱི་དཀའ་རྙོག་སེལ་བར་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་སྩལ་བ་ལྟར་བོད་རིགས་དང་རྒྱ་རིགས་གཉིས་སྐད་ཆ་བཤད་ནས་མ་གཏོགས་གཞན་ཐབས་ལམ་མེད་པའི་སྐོར་གསུངས་ཡོད།

ཡང་ཅན་ལི་ལགས་ཀྱིས་ལོ་ངོ་ ༣༠ གོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་པ་དང་། དེ་བཞིན་བོད་རིགས་གྲོགས་པོ་མང་པོ་དང་ལྷན་དུ་ད་བར་འབྲེལ་བ་དམ་ཟབ་འཛིན་ཐུབ་པ་བྱུང་བའི་སྐོར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལས་ཁོང་སྒེར་གྱི་མི་ཚེར་ཧ་ཅང་ཕན་ཐོགས་བྱུང་བ་མ་ཟད། ཚོགས་པའི་ལས་འཆར་ཆེ་ཤོས་ཤིག་སྟེ་མི་རིགས་དང་ཆོས་ལུགས་རིས་མེད་ཀྱི་གཞོན་སྐྱེས་ཚོགས་ཆེན་ལོ་རེ་བཞིན་བསྐོང་ཚོགས་བྱས་པ་དེ་ཡང་༸གོང་ས་མཆོག་གི་བཀའ་སློབ་ལམ་སྟོན་ལ་བརྟེན་ནས་འགོ་ཚུགས་པ་ཡིན་པ། ད་བར་ཚོགས་ཆེན་ཐེངས་ ༡༦ གོ་སྒྲིག་ཞུས་ཟིན་པ་དང་མ་འོངས་པར་མུ་མཐུད་བསྐོང་ཚོགས་གནང་རྒྱུ་ཡིན་སྐོར་གསུངས།

དེ་བཞིན་ཚའི་ཞྭ་ལགས་ཀྱིས། ཁོང་གིས་དེ་སྔ་རྒྱ་ནག་དབུས་དམར་ཤོག་ཚོགས་པའི་སློབ་གྲྭའི་སློབ་དཔོན་གནང་སྐབས་བོད་ཀྱི་གནད་དོན་དང་འབྲེལ་བའི་མཐོང་ཐོས་བྱུང་བའི་གནས་ཚུལ་ཁག་ངོ་སྤྲོད་གནང་བ་དང་། རྒྱ་ནག་གི་མཐོ་རིམ་དཔོན་རིགས་ཁག་གི་ནང་བོད་ཐོག་ལ་བསམ་བློ་གཏོང་ཕྱོགས་ཇི་ལྟར་ཡོད་པ་སོགས་ཀྱི་ཐད་ལ་བཀའ་མོལ་ལྷུག་པོ་གནང་སོང་། ཕྱོགས་མཚུངས་རྒྱ་ནག་གིས་དྲ་རྒྱ་བཀག་བསྡོམས་ལ་གདོང་ལེན་བྱེད་ཐབས་དང་ཚན་རིག་གི་ལམ་ནས་ཕྱག་ལས་གནང་སྟངས་སོགས་ཀྱི་ཐད་ཚོགས་པའི་ཆེད་ལས་པ་ཧན་ལེན་ཁྲོའོ་ལགས་ཀྱིས་དགོངས་ཚུལ་མང་པོ་བཏོན་གནང་སོང་། 

དེ་བཞིན་ཕྱི་ཚེས་ ༦ ཉིན་འོད་གསལ་གསར་ཁང་དང་ཡུ་རོབ་རང་དབང་རླུང་འཕྲིན་ཁང་ཟུང་འབྲེལ་གྱིས་གོ་སྒྲིག་འོག་མ་འོངས་རྒྱ་ནག་གི་ཁ་ཕྱོགས་དང་། ཞི་ཅིན་ཕིང་དང་ཚོགས་ཆེན་ཉི་ཤུ་པ་ཞེས་པའི་བརྗོད་གཞི་གཙོ་བོར་བཟུང་ནས་དྲ་རྒྱ་བརྒྱུད་བགྲོ་གླེང་ཚོགས་ཡོད་པ་དང་། སྐབས་དེར་རྒྱ་རིགས་མཁས་དབང་དང་མང་གཙོ་དོན་གཉེར་བ་གྲགས་ཅན་གང་མང་མཉམ་ཞུགས་གནང་ཡོད་པ་མ་ཟད། སྐུ་ཚབ་དོན་ཁང་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱང་ཚོགས་འདུར་མཉམ་ཞུགས་གནང་ཡོད། ཚོགས་འདུའི་སྟེང་ཚོགས་ཞུགས་པ་ཡོངས་ནས་ཞི་ཅིང་ཕིན་གྱིས་འདས་པའི་ལོ་ངོ་བཅུ་ཙམ་ནང་ཆབ་སྲིད་དང་དཔལ་འབྱོར་གང་ཅིའི་ཐད་ལག་བསྟར་བྱས་པའི་སྲིད་བྱུས་ཁག་ལ་དབྱེ་ཞིབ་ཀྱིས་དགོངས་ཚུལ་གསུངས་པ་དང་། འཚོག་ལ་ཉེ་བའི་ཚོགས་ཆེན་ཉི་ཤུ་པའི་སྟེང་དམར་ཤོག་ཚོགས་པའི་འགོ་ཁྲིད་ལ་འགྱུར་བ་ག་འདྲ་འགྲོ་སྲིད་མིན་སོགས་ཀྱི་ཐད་བསམ་ཚུལ་ལྷུག་པོ་གསུངས་སོང་། 

རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས། ཞི་ཅིན་ཕིང་གིས་འདས་པའི་སྐབས་གཉིས་ཀྱི་སྲིད་འཛིན་གྱི་དུས་ཡུན་རིང་བོད་ནང་དྲག་གནོན་ཅན་གྱི་སྲིད་བྱུས་ཁག་ལག་བསྟར་བྱས་སྟབས། བོད་ནང་གི་གནས་སྟངས་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མ་ཟད། བོད་མི་རྣམས་ལ་ཆོས་དད་རང་མོས་དང་། སྐད་ཡིག་དང་རིག་གཞུང་གཅེས་འཛིན། ཁོར་ཡུག་སྲུང་སྐྱོབ་སོགས་ཀྱི་ཐད་དཀའ་ངལ་སྔར་ལྷག་འཕྲད་བཞིན་ཡོད་པ་འགྲེལ་བརྗོད་དང་། ད་ལྟའི་ཆར་ལྷ་ས་གཙོས་པའི་བོད་ཀྱི་ས་ཁུལ་ཁག་ལ་གཉན་རིམས་ཀླད་ཀོར་ཀྱི་སྲིད་བྱུས་འོག་བོད་མི་རྣམས་ལ་ནད་ཡམས་སྔར་ལས་ལྷག་དཀའ་ངལ་འཕྲད་བཞིན་ཡོད་སྐོར་དང་། རྒྱ་རིགས་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཁག་གསན་དགོས་རྒྱུ་གལ་ཆེན་པོ་ཡིན་པ། ལྷག་པར་༧གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་གོ་ལ་གཅིག་གྱུར་གྱི་དགོངས་གཞིའི་སྐོར་ཤེས་རྟོགས་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་ངོ་སྤྲོད་གནང་ཡོད་པ་བཅས།  །