༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་ཁྲིད་འོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་གསེར་རྟ་ཚུལ་ཁྲིམས་ལགས་དང་། སྤྱི་འཐུས་དཀོན་མཆོག་ཡང་འཕེལ་ལགས། སྤྱི་འཐུས་དབྲ་རྩ་བསོད་ནམས་ནོར་བུ་ལགས། སྤྱི་འཐུས་དངོས་གྲུབ་རྡོ་རྗེ་ལགས། སྤྱི་འཐུས་ཚེ་རིང་དབྱངས་ཅན་ལགས། དེ་བཞིན་དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༢ ཟླ་ ༡༠ ཚེས་ ༩ ནས་ ༡༢ བར་ཡུ་རོབ་རྒྱལ་ཁབ་འཇར་མན་གྲོང་ཁྱེར་མུ་ནིག་དང་། རྒྱལ་ས་བྷར་ལིན། གྲོང་ཁྱེར་ཧྥ་རིན་ཀི་ཧྥོར་ཊི་བཅས་ཀྱི་ནང་འཇར་མན་གྲོས་ཚོགས་འཐུས་མི་དང་། གནད་ཡོད་མི་སྣ་སོགས་མཇལ་འཕྲད་ཀྱིས་འཇར་མན་ནང་གི་ལས་རིམ་ཁག་ལེགས་པར་གྲུབ་སྟེ། ཕྱི་ཚེས་ ༡༣ ཉིན་གྱི་སྔ་དྲོ་ཡུ་རོབ་རྒྱལ་ཁབ་སྦེལ་ཇམ་ལ་ཕེབས་ཐོན་གནང་ཡོད།དེ་ཡང་ཕྱི་ཚེས་ ༡༡ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༡༠ པའི་ཐོག་འཇར་མན་རོགས་ཚོགས་ (FNF) ཀྱིས་གོ་སྒྲིག་འོག འཇར་མན་རྒྱལ་ས་བྷར་ལིན་དུ་ (AXICA Kongress Hall) ཞེས་པའི་ཚོགས་ཁང་ནང་ཡུ་རོབ་སྤྱི་མཐུན་གྱི་གནས་སྟངས་བསྐྱར་ཞིབ་ (FNF Conference “Reshape Europe-but how?) ཅེས་པའི་ཚོགས་ཆེན་ཐོག་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམ་པ་མཉམ་ཞུགས་གནང་བ་མ་ཟད། ཉིན་གུང་གསོལ་སྟོན་སྐབས་གནད་ཡོད་མི་སྣ་མང་པོ་ཞིག་དང་ལྷན་བོད་དོན་སྐོར་གླེང་སློང་གནང་ཡོད་པ་དང་། གཞན་ཡང་དེ་ཉིན་སྔ་དྲོ་ཆུ་ཚོད་ ༡༡།༣༠ ནས་ ༡༢།༣༠ བར་འཇར་མ་ནཱི་ནང་རྟེན་གཞི་བྱས་པའི་ཐའེ་ཝན་གཞུང་ཚབ་ཆེན་མོ་སློབ་དཔོན་ཇེ་ཝེ་ཞེ་ (Prof. Jhy-Wey Shieh, Taiwanese Ambassador to Germany) མཆོག་དང་ལྷན་མཇལ་འཕྲད་ཀྱིས་མ་འོངས་པར་ལས་དོན་ཐོག་མཉམ་འབྲེལ་གནང་ཕྱོགས་སྐོར་བཀའ་བསྡུར་གནང་ཡོད་འདུགཉིན་རྒྱབ་རྒྱལ་སྤྱིའི་བོད་དོན་ལས་འགུལ་ཁང་ (ICT) གི་འཇར་མན་ཡན་ལག་ལས་ཁུངས་ཀྱི་འབྲེལ་ཡོད་དང་། འཇར་མན་བོད་དོན་རྒྱབ་སྐྱོར་ཚོགས་པ་ (Tibet Initiative) བཅས་གཉིས་ཀྱི་འབྲེལ་ཡོད་ལས་སྣེ་རྣམ་པས་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམ་པར་ཚོགས་པ་སོ་སོའི་ལས་དོན་སྐོར་ངོ་སྤྲོད་དང་། དེ་བཞིན་འཇར་མ་ནཱིའི་བོད་ཀྱི་ཁང་པའི་དབུ་འཛིན་བྲག་གཡབ་༧སྐྱབས་མགོན་རིན་པོ་ཆེ་མཆོག་གིས་བོད་ཁང་གི་ཐོག་མའི་འབྱུང་རིམ་དང་། ད་ལྟའི་གནས་སྟངས་བཅས་ངོ་སྤྲོད་གནང་བ་དང་། གཞན་ཡང་གལ་ཆེའི་མི་སྣ་ཁག་ཅིག་དང་མཉམ་དུ་ཚོང་དོན་སྐོར་བཀའ་བསྡུར་གནང་རྗེས་ཚོགས་འདུ་གྲུབ་པ་དང་། དེ་ནས་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམ་པ་འཇར་མན་རྒྱལ་ས་བྷར་ལིན་ནས་གྲོང་ཁྱེར་ཧྥ་རིན་ཀི་ཧྥོར་ཊི་ (Frankfurt) ལ་ཕེབས་ཐོན་གྱིས་མཚན་མོ་ཆུ་ཚོད་ ༡༡ ཐོག་མེ་འཁོར་འབབ་ཚུགས་སུ་འབྱོར་རྗེས། ས་གནས་བོད་མི་རྣམ་པས་ཕེབས་བསུ་ཞུས་གནང་འདུགཕྱི་ཚེས་ ༡༢ རེས་གཟའ་ལྷག་པའི་ཉིན་གྱི་སྔ་དྲོ་ཆུ་ཚོད་ ༧ པའི་ཐོག་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ནས་འཇར་མན་ཕྱོགས་འགལ་ཚོགས་པའི་ (CDU) གྲོས་ཚོགས་འཐུས་མི་དང་། གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མེ་ཀལ་བྷ་རན་ཌི་ (Mr. Michael Brand) མཆོག གྲོས་ཚོགས་འཐུས་མི་སྐུ་ཞབས་ཀ་ལོ་སི་པི་ཊར་ཝིལ་ཤི་ (Mr. Klaus-Peter Willsch) མཆོག་རྣམ་གཉིས་དང་ལྷན་མཇལ་འཕྲད་གནང་བ་དང་། དེ་རྗེས་སྔ་དྲོ་ཆུ་ཚོད་ ༡༠ ཐོག་ཧྥ་རིན་ཀི་ཧྥོར་ཊི་ (Frankfurt) མངའ་སྡེའི་སློབ་གྲྭ་ (Goethe-Gymnasium School) རུ་གཟིགས་སྐོར་ཕེབས་པ་དང་། སྐབས་དེར་སློབ་གྲྭའི་དབུ་འཛིན་དང་འབྲེལ་ཡོད་ལས་བྱེད་རྣམ་པས་ཕེབས་བསུ་སྣེ་ལེན་དང་། ཤེས་ཡོན་དང་འབྲེལ་བའི་གནས་སྟངས་སྐོར་ཕན་ཚུན་རྒྱུས་ལོན་དང་བཀའ་བསྡུར་ཞུས་རྗེས། སློབ་ཕྲུག་རྣམས་དང་ལྷན་བོད་དོན་སྐོར་གྱི་དྲི་བ་དྲིས་ལན་གནང་ཡོད་འདུགཉིན་རྒྱབ་ཆུ་ཚོད་ ༢ པའི་ཐོག་ཧྥ་རིན་ཀི་ཧྥོར་ཊི་ (Frankfurt) གྲོང་སྡེ་ལས་ཁུངས་ཀྱི་གུ་ཡངས་ཚོགས་པའི་ཆབ་སྲིད་མི་སྣ་མཇལ་འཕྲད་དང་། དེ་བཞིན་ཡེ་ཤུའི་གྲགས་ཆེན་ལྷ་ཁང་། ལས་ཁུངས་ཁག་ལ་གཟིགས་སྐོར་དང་། ཕྱི་དྲོ་ཆུ་ཚོད་ ༣།༣༠ ནས་འཇར་མན་དངུལ་ཁང་ཆེན་མོའི་ཡིག་ཚང་དུ་ཆེད་བཅར་གྱིས་དངུལ་ཁང་ཆེན་མོའི་གནད་ཡོད་མི་སྣ་གསུམ་དང་ལྷན། འཇར་མན་རྒྱལ་ཁབ་ཀྱི་སྤྱི་ཡོངས་དཔལ་འབྱོར་གྱི་གནས་སྟངས་དང་། བཙན་བྱོལ་བོད་མིའི་གནས་སྟངས་དང་དགོས་མཁོ་བཅས་ཀྱི་སྐོར་ཕན་ཚུན་ངོ་སྤྲོད་དང་། མ་འོངས་པར་མུ་མཐུད་ལས་དོན་ཐོག་འབྲེལ་བ་དང་རོགས་རམ་གནང་ཕྱོགས་སྐོར་ལ་བཀའ་བསྡུར་གནང་།དེ་ནས་འཇར་མན་བོད་ཀྱི་ཁང་པར་ཕེབས་ཏེ་ཕྱི་ནང་གི་གནས་སྟངས་ཀུན་ལ་གཟིགས་སྐོར་དང་། དགོང་མོ་ཆུ་ཚོད་ ༦ ནས་ ༨ བར་བོད་ཁང་གི་ལས་དོན་སྐོར་ངོ་སྤྲོད་ཞིབ་ཕྲ་དང་། སྐབས་དེར་བོད་པའི་ཕྱི་རྒྱལ་གྱི་གནད་ཡོད་རྣམས་ཀྱིས་དྲི་བ་དྲིས་ལན་བཅས་སྐབས་དེའི་འཇར་མ་ནཱི་རྒྱལ་ཁབ་ཀྱི་ལས་རིམ་ཁག་ལེགས་པར་གྲུབ་སྟེ། ཕྱི་ཚེས་ ༡༣ ཉིན་གྱི་སྔ་དྲོ་མེ་འཁོར་བརྒྱུད་ཡུ་རོབ་རྒྱལ་ཁབ་སྦེལ་ཇམ་ལ་ཕེབས་ཐོན་གནང་ཡོད་པ་བཅས། །