༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༠༣ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨི་ཊ་ལཱིའི་ལྷོ་ཊི་རོལ་ (South Tyrol) རང་སྐྱོང་ས་ཁུལ་གྱི་སྲིད་འཛིན༌སྐུ་ཞབས་ཨར་ནོ་ཀོམ་པ་སི་ཆར་ (Arno Kompatscher) མཆོག་དང་མཇལ་འཕྲད་ཞུས་གནང་ཡོད། སྐབས་དེར་ཕྱི་དྲིལ་བཀའ་བློན་མཆོག་དང་ལྷན་དུ། སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་ཨི་ཊ་ལཱི་བོད་རིགས་ཚོགས་པའི་ཚོགས་གཙོ་ཚེ་བརྟན་ལགས་ལྷན་བཅར་ཞུས་ཡོད།
དེ་ཡང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨི་ཊ་ལཱིའི་ལྷོ་ཊི་རོལ་རང་སྐྱོང་ས་ཁུལ་གྱི་སྲིད་འཛིན༌སྐུ་ཞབས་ཨར་ནོ་ཀོམ་པ་སི་ཆར་མཆོག་དང་ལྷན་ད་ལྟའི་བོད་ནང་གི་ཛ་དྲག་གི་གནས་སྟངས་སྤྱིའི་སྐོར་དང་། ལྷག་པར་རྒྱ་ནག་གཞུང་གིས་སྲིད་བྱུས་མཁྲེགས་པོ་བཟུང་སྟེ་བོད་མིའི་རིག་གཞུང་དང་ངོ་བོ་རྒྱ་ནག་ཅན་དུ་བསྒྱུར་དང་སྒྱུར་བཞིན་ཡོད་པ་མ་ཟད། རྒྱ་ནག་དམར་ཤོག་ཚོགས་པའི་འགོ་ཁྲིད་ཚོས་བོད་མིའི་ཆོས་དད་རང་དབང་ལ་དམ་བསྒྲགས་དང་། བོད་མིའི་དུས་རབས་མང་པོའི་ཡང་སྲིད་ངོས་འཛིན་ལམ་ལུགས་ལ་ཐེ་བྱུས་བྱས་དང་བྱེད་བཞིན་པར་ཧ་ཅང་ཐུགས་འཚབ་གནང་གི་ཡོད་སྐོར་གསུངས་པ་དང་སྦྲགས་ཨི་ཊ་ལཱིའི་གཞུང་སྒེར་ཚོགས་པ་ཁག་གིས་རྒྱ་ནག་གཞུང་གིས་བོད་མིའི་ཆོས་དད་རང་དབང་གི་ཐོག་ཐེ་བྱུས་བྱེད་བཞིན་པ་མཚམས་འཇོག་བྱེད་དགོས་པའི་འབོད་སྐུལ་གནང་རོགས་ཞེས་ཞུས་གནང་ཡོད།
གཞན་ཡང་ཕྱི་དྲིལ་བཀའ་བློན་མཆོག་གིས་བཙན་བྱོལ་བོད་མིའི་སྤྱི་ཚོགས་ཡར་རྒྱས་གཏོང་རྒྱུའི་ལས་གཞི་ཁག་གི་ཆེད་དུ་ཨི་ཊ་ལཱིའི་གཞུང་སྒེར་ཚོགས་པ་ཁག་ནས་དཔལ་འབྱོར་གྱི་རྒྱབ་རྟེན་གནང་རོགས་ཞེས་རེ་སྐུལ་ཞུས་གནང་ཡོད། ཨི་ཊ་ལཱིའི་ལྷོ་ཊི་རོལ་རང་སྐྱོང་ས་ཁུལ་གྱི་སྲིད་འཛིན༌སྐུ་ཞབས་ཨར་ནོ་ཀོམ་པ་སི་ཆར་མཆོག་གིས་མུ་མཐུད་བོད་དོན་དང་བོད་མིའི་སླད་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པའི་སྐོར་དང་། རྒྱ་ནག་གཞུང་གིས་བོད་མིའི་ཆོས་དད་རང་དབང་གི་གནད་དོན་ཐད་ཐེ་བྱུས་བྱེད་བཞིན་པར་མཐའ་གཅིག་ཏུ་ངོ་རྒོལ་ཡོད། ཅེས་དང་།
དཔལ་འབྱོར་གྱི་རྒྱབ་རྟེན་དང་འབྲེལ་ནས་སྐུ་ཞབས་ཨར་ནོ་ཀོམ་པ་སི་ཆར་མཆོག་གིས་ཨི་ཊ་ལཱིའི་འབྲེལ་ཡོད་མཉམ་འབྲེལ་ཚོགས་པ་ཁག་དང་མཉམ་འབྲེལ་གྱིས་བོད་མིའི་སྒྲིག་འཛུགས་ཀྱི་ལས་གཞི་ཁག་གི་ཆེད་དུ་རོགས་རམ་གནང་རྒྱུའི་ཞལ་བཞེས་གནང་ཡོད།
ཕྱོགས་མཚུངས་ཕྱི་དྲིལ་བཀའ་བློན་མཆོག་གིས་ཨི་ཊ་ལཱིའི་རྒྱལ་ས་རོམ་དང་། གྲོང་ཁྱེར་མི་ལན། པེ་རུ་ཇཱ་ཁུལ་དུ་ཨི་ཊ་ལཱིའི་གྲོས་ཚོགས་གོང་མའི་འཐུས་མི་ཟུར་པ་རོ་བྷར་ཊོ་རཱམ་པི་ (Roberto Rampi) ལགས་དང་། གསར་དུ་བདམས་ཐོན་བྱུང་བའི་ཨི་ཊ་ལཱིའི་གྲོས་ཚོགས་འཐུས་མི་ཨོ་ག་སི་ཊ་མོན་ཊ་རུ་ལི་ (Augusta Montarulli) ལགས། ཨི་ཊ་ལཱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཟུར་པ་ལུ་སི་ཡ་ནོ་ནོ་བྷི་ལི་ (Luciano Nobili) ལགས། ཨི་ཊ་ལཱིའི་དབུས་ནང་བསྟན་མཐུན་ཚོགས་ (Union Buddhist Associations) ཀྱི་འགན་འཛིན་ཕི་ལི་པོ་ (Filippo Scianna) ལགས། ཡུ་རོབ་ཀྱི་ཤེས་ཡོན་བསྟི་
