༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༨ ཉིན་བོད་ཀྱི་ཟློས་གར་ཚོགས་པས་རྡ་ས་ཧཻ་ཊི་མགྲོན་ཁང་ (Hyatt Regency) དུ་བྱམས་བརྩེ་ལྡན་པའི་དབུ་ཁྲིད་ཚོགས་འདུའི་ཚོགས་བཅར་བ་རྣམས་ལ་ཕེབས་བསུའི་གཞས་སྣ་ཁག་གཅིག་གཟིགས་འབུལ་ཞུས་ཡོད།

དེ་ཡང་ཕེབས་བསུའི་ལས་རིམ་གྱི་ཐོག་མར་བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་ཀྱིས་ཟློས་གར་ཚོགས་པའི་ངོ་སྤྲོད་སྙིང་བསྡུས་དང་། ཚོགས་འདུ་གོ་སྒྲིག་གནང་མཁན་ཀེ་ཊི་སེ་གར་ (Katy Seager) ལགས་དང་། དགེ་བཤེས་ཐུབ་བསྟན་སྦྱིན་པ་ལགས། དགེ་བཤེས་རྡོ་རྗེ་རྒྱལ་མཚན་ལགས་བཅས་ལ་བཀྲ་ཤིས་རྟེན་འབྲེལ་མཚོན་ཆེད་རྔོན་པའི་འབག་རེ་ཕུལ་རྗེས་བསམ་གཏན་དོན་གྲུབ་ལགས་ཀྱིས་ནང་མ་བསྟོད་གཞས་སྐོར་ངོ་སྤྲོད་མདོར་བསྡུས་དང་དེ་རྗེས་གཞས་སྣ་གཟིགས་འབུལ་ཞུས་ཡོད།

གཟིགས་མོ་རྣམས་ཀྱིས་གཞས་སྣ་འཁྲབ་སྟོན་ལ་དགའ་ཚོར་ཆེན་པོ་གནང་བ་མ་ཟད་སླད་མར་བོད་ཀྱི་རིག་གཞུང་རྒྱུན་གནས་ཐད་རྒྱབ་སྐྱོར་གནང་རྒྱུའི་ཞལ་བཞེས་ཀྱང་གནང་ཡོད་པ་རེད། ཐེངས་འདིའི་ཚོགས་འདུའི་ཐོག་འཛམ་གླིང་རྒྱལ་ཁབ་འདྲ་མིན་ནས་ཁྱད་མཁས་མི་སྣ་ ༤༠ ཙམ་མཉམ་ཞུགས་གནང་གི་ཡོད་པ་བཅས།།