བལ་ཡུལ་འཇོ་ལ་ཁེལ་བསམ་གྲུབ་གླིང་བཟོ་གཞིས་ལས་ཁུངས་ཀྱི་འགན་འཛིན་གསར་རྙིང་དབར་རྩིས་སྤྲོད་རྩིས་ལེན་ལེགས་པར་གྲུབ་པ།

གསར་ལས་ཁང་གི་གསར་འགོད་པས།

༢༠༢༢-༡༠-༣༡

༄༅། །འདི་གར་བལ་ཡུལ་རྒྱལ་འཕགས་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། བལ་ཡུལ་འཇོ་ལ་ཁེལ་བསམ་གྲུབ་གླིང་བཟོ་གཞིས་ལས་ཁུངས་ཀྱི་འགན་འཛིན་ཟུར་པ་དྲུང་ལས་བཀྲ་ཤིས་ཚེ་བརྟན་ལགས་ཀྱི་ཚབ་གསར་དུ་དྲུང་གཞོན་ཀརྨ་བཟོད་པ་འཕྲིན་ལས་ལགས་བསྐོ་གཞག་གནང་ནས་བལ་ཡུལ་རྒྱལ་འཕགས་ས་གནས་འགོའཛིན་ཀརྨ་རྒྱལ་མཚན་ལགས་ནང་སྲིད་ལས་ཁུངས་ཀྱི་སྐུ་ཚབ་སྤྲོད་དཔང་དུ་བསྐོ་གཞག་གནང་དོན་བཞིན། ཕྱི་ལོ་ ༢༠༢༢ ཟླ་ ༡༠ ཚེས་ ༢༦ རེས་གཟའ་ཟླ་བ་ཉིན་འཇོ་ལ་ཁེལ་བཟོ་གཞིས་ལས་ཁུངས་སུ་བཅར་ནས་རྩིས་སྤྲོད་ལེན་ཀྱི་དངོས་གཞིའི་ལས་དོན་འགོ་འཛུགས་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཡོལ་ཙམ་ལ་བཟོ་གཞིས་ལས་ཁུངས་སུ་འཇོ་ལ་འཁེལ་བསམ་གྲུབ་གླིང་གི་ས་འཐུས་ཚོགས་གཙོ་བགྲེས་གཞོན་གཉིས་དང་། མཉམ་འབྲེལ་འགན་འཛིན། ས་གནས་རང་བདེན་ཚོགས་གཙོ། བཟོ་གྲྭའི་འགན་འཛིན་ལྷན་ཚོགས་ཀྱི་ཚོགས་གཙོ། ནོར་གླིང་རྩེད་ཚོགས་ཀྱི་ཚོགས་གཙོ་དང་ཕ་མའི་ཚོགས་གཙོ། གཞན་ཡང་ལས་བྱེད་འདུ་འཛོམས་ཐོག་རྩིས་སྤྲོད་རྩིས་ལེན་གྱི་ལས་རིམ་གསལ་བཤད་གནང་རྗེས་འགན་འཛིན་གསར་རྙིང་དབར་འགན་འཛིན་གྱི་བདག་ཉར་འོག་ཡོད་པའི་གལ་ཆེའི་ཡིག་སྣོད་ཁག་རེ་རེ་བཞིན་རྩིས་སྤྲོད་གནང་ཡོད།

ཕྱི་ཚེས་ ༢༧ ཉིན་གཞིས་དགོན་ནང་གི་ལྷ་སྐུ་རྟེན་གསུམ་དང་གཞན་ཡང་ཆོས་རྫས་རིགས་། ཉིན་རྒྱབ་ཚན་པ་སོ་སོའི་ཁྱབ་ཁོངས་ལས་བྱེད་རྣམ་པའི་བདག་ཉར་འོག་ཡོད་པའི་ཡིག་སྣོད་དང་འཛིན་ཆས་རྣམས་རྩིས་སྤྲོད་ལེན་གནང་ཡོད། དེ་བཞིན་གཞིས་ཆགས་ཀྱི་སྡོད་ཁང་དང་། སློབ་གྲྭ། རྒན་གསོ་ཁང་། བུ་གསོ་ཁང་དང་བཟོ་གྲྭ་སོགས་ངོ་སྤྲོད་གནང་ཡོད།

རྩོས་སྤྲོད་ལེན་གྱི་ཉིན་མཐའ་མ་ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་འགན་འཛིན་གསར་རྙིང་གཉིས་དབར་ཞབས་སྟེགས་བརྗེ་ལེན་གནང་གྲུབ་མཚམས་ཚོགས་ཁང་དུ་མང་ཚོགས་ལ་ནང་སྲིད་ལས་ཁུངས་ཀྱི་སྐུ་ཚབ་སྤྲོད་དཔང་དང་འགན་འཛིན་གསར་རྙིང་གཉིས་ནས་རྩིས་ལེན་རྩིས་སྤྲོད་ཀྱི་གནས་སྟངས་གསལ་བཤད་དང་ངོ་སྤྲོད་གནང་ཡོད་པ་བཅས།།