༄༅། ། ཕྱི་ལོ་ ༢༠༢༢ ཟླ་ ༡༠ ཚེས་ ༧ ཉིན་རྡ་སའི་ཉེ་འདབས་སུ་ཆགས་པའི་གོ་པལ་པུར་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་ ༢༥ འཁོར་བའི་དུས་དྲན་དང་འབྲེལ་སློབ་གྲྭའི་ཁང་ཚན་ནང་ཁུལ་རྒྱུག་མཆོང་འཕེན་གསུམ་གྱི་རྩེད་འགྲན་ཐེངས་ ༢༢ ཚོགས་གནང་སོང་།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༥༠ ཙམ་ལ་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག དེ་བཞིན་རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས། རིགས་སློབ་མ་ལག་གི་དབུ་འཛིན་དགེ་བཤེས་བསམ་གཏན་རྒྱ་མཚོ་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས། བོད་ཁྱིམ་སློབ་གྲྭ་ཁག་གཅིག་གི་འགན་འཛིན།  གོ་པལ་པུར་བོད་ཁྱིམ་སློབ་གྲྭའི་དགེ་ལས་དང་། སློབ་ཕྲུག གོ་པལ་པུར་བོད་ཁྱིམ་སློབ་གྲྭའི་སློབ་ཟུར་སོགས་ཚང་འཛོམས་ཀྱིས་ཐོག་མར་འཛིན་གྲྭ་ནང་ཁུལ་གྱི་གུས་འདུད་རུ་སྒྲིག་ཞུས་རྗེས་ཚང་མ་སྐུ་བཞེངས་ཐོག་འཕགས་བོད་གཉིས་ཀྱི་རྒྱལ་གླུ་བཏང་ཡོད། དེ་ནས་རྒྱལ་གཅེས་པ་རྣམས་དང་། གོ་པལ་པུར་བོད་ཁྱིམ་སློབ་གྲྭའི་ངེས་སྟོན་པ་དང་པོ་ཚེ་འདས་དམ་པ་རྒན་ཕུན་ཚོགས་རྣམ་རྒྱལ་ལགས་དང་དགེ་ཆེ་ལས་རོགས་དབང་ཕྱུག་ཚེ་རིང་ལགས། གཞན་ཡང་གོ་པལ་པུར་ལས་སློབ་རྐྱེན་འདས་སུ་སོང་བ་བཅས་ལ་གདུང་སེམས་མཉམ་སྐྱེའི་གུས་འདུད་ངག་བཅད་སྐར་མ་གཅིག་རིང་ཞུས་གྲུབ་མཚམས་གོ་པལ་པུར་བོད་ཁྱིམ་སློབ་གྲྭའི་ངེས་སྟོན་པ་སྐལ་བཟང་ཕུན་ཚོགས་ལགས་ཀྱིས་དགའ་བསུའི་གསུང་བཤད་གནང་གྲུབ་རྗེས་སྐུ་མགྲོན་གཙོ་བོ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་བཀའ་ཟུར་རྗེ་བཙུན་པདྨ་མཆོག་ལ་བཀའ་དྲིན་བསམ་ཤེས་ཀྱི་གཟེངས་རྟགས་དང་སློབ་གྲྭའི་དུས་དེབ་ཆུ་ཐིགས་ཞེས་པ་དབུ་འབྱེད་གནང་སྟེ་གསུང་བཤད་གནང་དོན། ད་ལྟ་རྒྱལ་ཁབ་དང་མི་རིགས་ཤིག་གི་གནས་སྟངས་ཐོག་ནས་གཟིགས་པ་ཡིན་ན་གཉན་འཕྲང་ཅན་གྱི་དུས་ཤིག་ཆགས་ཡོད། བཟང་སྤྱོད་ཀྱི་ཐོག་ནས་གཟིགས་པ་ཡིན་ན་བོད་ཀྱི་བདེན་མཐའ་གསལ་རྒྱུའི་གོ་སྐབས་བཟང་པོ་ཞིག་ཡིན་ལ། ལྷག་པར་ང་ཚོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྟ་བུའི་དབུ་ཁྲིད་བཟང་པོ་ཞིག་ཡོད་པར་བརྟེན་སོ་སོའི་ལག་ཏུ་ནོར་བུ་ཡོད་པ་དེ་ནོར་བུ་ཡིན་པ་ངོ་འཕྲོད་ནས་མགོན་པོ་གང་ཉིད་མཆོག་གི་དགོངས་པ་དང་མཐུན་པ། མདོར་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་བོད་བསྟན་སྲིད་མི་རིགས་སླད་ལམ་སྟོན་མཛད་པ་དེ་དག་ཐོག་ཤར་བསྐྱོད་བྱེད་ཐུབ་ན། ཆོས་དང་འཇིག་རྟེན་གང་གི་ཆ་ནས་བོད་མི་ཡིན་པའི་ལས་འགན་ཞིག་སྒྲུབ་ཐུབ་ཀྱི་ཡོད་པར་བརྒྱ་ཆ་བརྒྱ་ངོས་འཛིན་བྱེད་ཆོགདེ་རིང་འདིར་ཁྱེད་རང་ཚོས་རུ་སྒྲིག་གནང་སྐབས་བོད་རྒྱལ་ཁབ་ཆེན་པོའི་རྒྱལ་དར་གནམ་ལ་འཕྱར་ཏེ་ཕེབས་ཡོང་སྐབས་ང་ཚོ་ཚང་མའི་སེམས་ནང་སྤྲོ་སྣང་དང་སྤོབས་པ་བྱུང་། ལྷག་པར་བོད་ཀྱི་རྩ་དོན་དང་བསྟན་སྲིད་སླད་ང་ཚོའི་སློབ་གྲྭ་ཁག་ནི་ཤེས་ཡོན་གྱི་རྨང་གཞི་གཙོ་བོ་ཆགས་ཀྱི་ཡོད་པ་ར་འཕྲོད་བྱུང་། བོད་ཁྱིམ་སློབ་གྲྭ་ཁག་ནི་བཙན་བྱོལ་བོད་མི་རྣམས་ལ་ཤེས་ཡོན་གཅིག་པུ་མ་ཡིན་པར། བོད་ཁྱིམ་སློབ་གྲྭ་ཁག་ནས་སློབ་མཐར་སོན་རྗེས་སྤྱི་ཚོགས་ནང་འགན་བཞེས་བཞིན་ཡོད་པ་མ་ཟད། རྒྱ་གར་གཞུང་མང་གཉིས་དང་ལྷན་འབྲེལ་ལམ་བཟང་དུ་ཡོང་བར་ཞབས་འདེགས་སྒྲུབ་མུས་ཡིན་པ་དང་། དེ་བཞིན་རྒྱ་གར་གཞུང་གི་མཐུན་འགྱུར་འོག་གསར་བཙུགས་གནང་བའི་བཙན་བྱོལ་བོད་མིའི་སློབ་གྲྭ་དེ་དག་བོད་མིའི་སྒྲིག་འཛུགས་ལ་རྩིས་སྤྲོད་མིན་ཐག་གཅོད་གནང་བའི་སྐབས་སུའང་རྒྱ་གར་གཞུང་གིས་གལ་ཏེ་སློབ་གྲྭ་ཁག་རྩིས་སྤྲད་པ་ཡིན་ན། བོད་མི་ཚོས་སློབ་གྲྭ་ཁག་འཛིན་སྐྱོང་བྱེད་པའི་ནུས་པ་འདུག་ཅེས་གསུངས་ཡོད། ཅེས་སོགས་ཀྱི་གསུང་བཤད་གནང་རྗེས་སློབ་གྲྭའི་བུའི་སྤྱི་ཁྱབ་རྒན་བདག་བསྟན་འཛིན་བཀྲ་ཤིས་ལགས་དང་ཆོས་སྐྱིད་ལགས་ཀྱིས་ཨིན་བོད་བཤེན་སྦྱར་ཐོག་རྩེད་འགྲན་ཐེངས་ ༢༢ ཁས་ལེན་དམ་བཅའ་ཕུལ།

དེ་ནས་སྐུ་མགྲོན་གཙོ་བོ་མཆོག་གིས་ཐེངས་འདིའི་གོ་པལ་པུར་བོད་ཁྱིམ་སློབ་གྲྭའི་ཁང་ཚན་ནང་ཁུལ་རྒྱུག་མཆོང་འཕེན་གསུམ་གྱི་རྩེད་འགྲན་ཐེངས་ ༢༢ དབུ་འཛུགས་གསལ་བསྒྲགས་གནང་སྟེ་ཁང་ཚན་ནང་ཁུལ་རྒྱུག་མཆོང་འཕེན་གསུམ་གྱི་རྩེད་འགྲན་འགོ་བཙུགས་གནང་སོང་བ་བཅས། །