༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༤ ཉིན་བོད་ཀྱི་ཟློས་གར་ཚོགས་ཁང་དུ་བདེ་ལེགས་སྨན་ཁང་དབུ་བརྙེས་ནས་ལོ་ངོ་ལྔ་བཅུ་འཁོར་བའི་དུས་དྲན་སྲུང་བརྩིའི་མཛད་སྒོ་ཚོགས་སོང་། དེ་ཡང་གོང་ཚེས་ཉིན་གྱི་སྔ་དྲོ་ ༡༠ ཙམ་ལ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དམིགས་བསལ་སྐུ་མགྲོན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག སྤྱི་ཁྱབ་རྩིས་ཞིབ་ཁང་གི་འགན་འཛིན་ཨརྱ་པདྨ་དགྲ་འདུལ་མཆོག བོད་མི་མང་སྤྱི་འཐུས་ཁག་གཅིག བཀའ་ཟུར་དང་སྤྱི་ཟུར་རྣམ་པ། དགའ་ལྡན་ཕོ་བྲང་གི་དྲུང་ཆེ་རྣམ་པ། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ། དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས། དེ་བཞིན་རྡ་ས་ཁུལ་གྱི་སློབ་གྲྭ་དང་ཚོགས་སྡེ་ཁག་གི་འགན་འཛིན་སོགས་ཚང་འཛོམས་ཐོག་མཛད་སྒོ་དངོས་སུ་དབུ་འཛུགས་གནང་སོང་།
མཛད་སྒོའི་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། སྤྱིར་ང་ཚོ་བཙན་བྱོལ་དུ་གྱར་རྗེས་བོད་མི་བཙན་བྱོལ་བ་རྣམས་ཀྱིས་ཤིང་ནགས་གཅོད་འབྲེག་བྱས་ནས་གཞིས་ཆགས་འཛུགས་རྒྱུ་དང་། ལམ་བཟོ་རྒྱུག་རྒྱུ་སོགས་དཀའ་ངལ་ཆེ་བའི་སྐབས་ང་ཚོས་མཐུན་རྐྱེན་གང་ཡོད་སྦྱར་ཏེ་བསྡད་པ་རེད། འཕྲོད་བསྟེན་ཐོག་སྐབས་དེ་དུས་ཀྱི་སྤྱི་ཚོགས་ཀྱི་དགོས་མཁོ་གཞིར་བཟུང་སྨན་བཅོས་མཐུན་རྐྱེན་སྦྱོར་རྒྱུ་ཁག་པོ་ཆགས་ཡོད། འོན་ཀྱང་སྐབས་དེ་དུས་ཀྱི་གནས་སྟངས་དང་བསྟུན་ཏེ་བོད་མིའི་འདུས་སྡོད་ས་གནས་གསར་འཛུགས་ཞུ་བཞིན་པའི་ངང་ས་གནས་སོ་སོར་གཞི་རིམ་འཕྲོད་བསྟེན་སྨན་བཅོས་ཀྱི་མཐུན་རྐྱེན་སྦྱོར་རྒྱུ་དང་། ལྟ་རྟོག་བྱ་རྒྱུ་རིམ་པས་བྱུང་ཡོད། བདེ་ལེགས་སྨན་ཁང་གཅིག་པུའི་ལོ་རྒྱུས་ནང་ལ་གཟིགས་པ་ཡིན་ནའང་ཕྱི་ལོ་ ༡༩༦༩ ཙམ་ནས་རྒྱལ་རྩེ་རི་ཞིང་རྩ་ཕུ་ཚེ་དབང་རིན་ཆེན་ལགས་ཀྱིས་ཐུགས་འགན་བཞེས་ཏེ་སྐུ་སྒེར་ངོས་ནས་འགྲོ་གྲོན་ཆེད་སོ་སོའི་བཟའ་ཟླའི་རྒྱན་ཆའི་རིགས་གཏའ་མར་བཞག་པ་དང་། ཕྱི་རྒྱལ་དུ་ཡོད་པའི་བོད་རིགས་ནས་རོགས་རམ་ཕྲན་བུ་ཞུས་ཏེ། གང་ལྟར་ཕྱི་ལོ་ ༡༩༦༩ ནས་ ༡༩༧༡ བར་དུ་ལོ་གཉིས་ལྷག་རིང་གཞི་རིམ་ཁང་པ་འཛུགས་སྐྲུན་བྱ་རྒྱུའི་ལས་ཀ་དགག་བསྡད་པ་གསལ་པོ་རེད་འདུག ཕྱི་ལོ་ ༡༩༧༡ ལ་མ་གཏོགས་བདེ་ལེགས་སྨན་ཁང་འགོ་འབྱེད་ཐུབ་མེད། 
འཕྲོད་བསྟེན་ལས་ཁུངས་ཀྱིས་ཁྱོན་ཡོངས་ནས་བོད་མིའི་གཞིས་ཆགས་ཚང་མར་འཕྲོད་བསྟེན་གྱི་མཐུན་རྐྱེན་སྦྱོར་སྤྲོད་བྱེད་ཀྱི་ཡོད། འོན་ཀྱང་དབུས་ཀྱི་སྒྲིག་འཛུགས་བརྟན་པོ་མེད་པ་དང་། ད་ལྟའི་འཕྲོད་བསྟེན་ལས་ཁུངས་ཀྱིས་དེབ་སྐྱེལ་བྱས་པའི་སྒྲིག་འཛུགས་ (Tibetan Voluntary Health Association) ཞེས་པ་དེ་ཡིན་ནའང་ཕྱིས་སུ་འགོ་བཙུགས་པ་རེད། བདེ་ལེགས་སྨན་ཁང་དེའི་སྔོན་ལ་འགོ་བཙུགས་ནས་སྐུ་ངོ་རི་ཞིང་ལགས་ཀྱིས་ལོ་མང་རིང་སྐུ་ལས་མང་པོ་སྐྱོན་ཡོད། དེ་ནས་རིམ་བཞིན་ཁོང་དགུང་ལོ་བགྲེས་པོ་ཆགས་པ་མ་ཟད། སྨན་ཁང་གང་ལ་གང་འཚམ་ཚགས་ཚུད་པོ་བཟོས་གྲུབ་རྗེས་བོད་མིའི་སྒྲིག་འཛུགས་ལ་རྩིས་སྤྲོད་གནང་ཡོད། ཅེས་དང་།
དེ་བཞིན་བདེ་ལེགས་སྨན་ཁང་གི་འཕེལ་རིམ་ལོ་རྒྱུས་དང་། འཛིན་སྐྱོང་འགན་འཛིན་རིམ་བྱོན་སྐོར་ངོ་སྤྲོད་གནང་རྗེས་བདེ་ལེགས་སྨན་ཁང་གི་སྔ་རྗེས་འགན་འཛིན་གྱིས་གཙོས་སྨན་པ་དང་། སྨན་ཞབས། ལས་བྱེད་སོགས་འབྲེལ་ཡོད་ཡོངས་ཀྱིས་བདེ་ལེགས་སྨན་ཁང་ཚགས་ཚུད་ཡར་རྒྱས་ཆེད་དངོས་སུ་ཞབས་འདེགས་ཞུས་པར་ཐུགས་རྗེ་ཆེ་ཞུས་གནང་སོང་།
དེ་རྗེས་མུ་མཐུད་དཔལ་ལྡན་སྲིད་སྐྱོང་མཆོག་ནས། མིའི་མི་ཚེ་ནང་དཀའ་ངལ་ཆེ་ཤོས་ནི་ན་བའི་སྐབས་དང་རྒས་པའི་སྐབས་རེད། ན་བའི་སྐབས་ལྟ་རྟོག་བྱེད་མཁན་གཙོ་བོ་སྨན་པ་དང་། སྨན་ཞབས། དེ་བཞིན་འཛིན་སྐྱོང་ལས་ཀ་བྱེད་མཁན་རྣམས་ཀྱང་འཚུད་ཀྱི་ཡོད། ཐར་པའི་ལམ་སྟོན་མཁན་གྱི་དགེ་བའི་བཤེས་གཉེན་རྩ་ཆེན་པོ་རིགས་ཕུད་དེ་མིན་འཇིག་རྟེན་འདིའི་ནང་མི་ལ་ཕན་ཐོགས་ཆེ་ཤོས་ནི་སྨན་གྱི་ལས་ཀ་ཡིན་པ་ངས་ངོས་འཛིན་བྱེད་ཀྱི་ཡོད། ཅེས་སོགས་གསུངས་རྗེས་བཙན་བྱོལ་བོད་མིའི་སྤྱི་ཚོགས་འཕྲོད་བསྟེན་དང་བདེ་ལེགས་སྨན་ཁང་དུ་མི་ལོ་ ༤༠ རིང་ཞབས་ཞུ་གནང་མཁན་སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ལ་ལེགས་གསོལ་བསྔགས་བརྗོད་དང་། ཁོང་གིས་འདས་པོའི་ལོ་ངོ་ ༤༠ ནང་སྤྱི་ཚོགས་ལ་སྨན་པའི་ཞབས་འདེགས་ཇི་ཞུས་དང་། ལྷག་པར་འདས་པའི་ལོ་ངོ་ ༢༥ ནས་སྐུའི་བླ་སྨན་པའི་ཕྱག་ལས་གནང་རྒྱུའི་གོ་སྐབས་བྱུང་བ་ནི་ཚེ་སྔོན་གྱི་ལས་བཟང་པོའི་འབྲས་བུ་ཡིན་སྐོར་སོགས་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་མ་འོངས་པར་སྤྱི་ཚོགས་ནང་གཟེངས་སུ་ཐོན་པའི་ལག་རྗེས་འཇོག་མཁན་བོད་མི་རྣམས་ལ་ངོས་འཛིན་དང་གཟེངས་བསྟོད་གནང་འཆར་ཡོད་སྐོར་དང་། སྨན་པ་དཀོན་མཆོག་རྡོ་རྗེ་ལགས་ཀྱིས་ཨ་རིའི་གྲགས་ཅན་ (Johns Hopkins) སྨན་ཁང་དུ་ཕྱག་ལས་གནང་བཞིན་བོད་མིའི་སྤྱི་ཚོགས་སུ་གློ་ནད་ཊི་བི་རྩ་འགོག་བཟོ་རྒྱུ་སོགས་སྤྱི་ཚོགས་ཁྲོད་དངོས་ཡོད་ཞབས་ཞུ་སྒྲུབ་བཞིན་པར་བསྔགས་བརྗོད་དང་། དེ་བཞིན་བོད་རིགས་སྨན་པ་དང་སྨན་ཞབས་པ་ཚོས་རྒྱལ་སྤྱིའི་ནང་དུ་སྨན་བཅོས་ཆོ་གའི་སྟེང་དུ་བྱམས་སྙིང་རྗེའི་ལག་ལེན་དར་འཕེལ་གཏང་རྒྱུར་འབད་རྩོལ་གནང་དགོས་སྐོར་གསུངས།
མཐའ་དོན་དཔལ་ལྡན་སྲིད་སྐྱོང་མཆོག་གིས་བདེ་སྨན་གྱི་སྦྱིན་བདག་དང་གྲོགས་པོ་རྣམ་པའི་སྐུ་ཚབ་སྨན་པ་ཛོར་བ་པེ་སི་ཊར་ (Zorba Paster) ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིར་ཆིབས་སྒྱུར་སྐབས་སྐུའི་སྨན་བཅོས་བརྟག་དཔྱད་གནང་རྒྱུའི་ཐད་འབྲེལ་མཐུད་རོགས་སྐྱོར་གནང་བར་ཐུགས་རྗེ་ལེགས་འབུལ་ཞུས་སོང་བ་མ་ཟད། དེ་བཞིན་རོ་ཊ་རི་ཚོགས་པ་ (Rotary Club) དང་། བདེ་སྨན་གྱི་སྦྱིན་བདག་དང་རྒྱབ་སྐྱོར་བ། སྨན་ཁང་གི་འགན་འཛིན་གྱིས་གཙོས་སྨན་པ་དང་། སྨན་ཞབས། ལས་བྱེད་ཡོངས་ལ་ཐུགས་རྗེ་ལེགས་འབུལ་གནང་སོང་།
གཞན་ཡང་མཛད་སྒོའི་ཐོག་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། སྤྱི་ཁྱབ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས། བདེ་ལེགས་སྨན་ཁང་གི་སྦྱིན་བདག་དང་གྲོགས་པོ་རྣམ་པའི་སྐུ་ཚབ་སྨན་པ་ཛོར་བ་པེ་སི་ཊར་ལགས། རྡ་ས་ཡུལ་མིའི་སྐུ་ཚབ་རོ་ཊ་རི་ཚོགས་པའི་ཚོགས་གཙོ་བཅས་ནས་གསུང་བཤད་གནང་སོང་།
བདེ་ལེགས་སྨན་ཁང་གི་ལྔ་བཅུའི་དུས་སྟོན་དང་སྟབས་བསྟུན་སྨན་ཁང་གི་སྨན་པ་དང་ལས་བྱེད་རྒན་པ་ཁག་གཅིག་ལ་ལེགས་གསོལ་དང་གཟེངས་བསྟོད་གནང་བའི་ཁོངས་ནས་སྐུའི་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་མི་ལོ་ ༤༠ ལྷག་བཙན་བྱོལ་བོད་མིའི་སྤྱི་ཚོགས་འཕྲོད་བསྟེན་དང་། བདེ་ལེགས་སྨན་ཁང་གི་སྤྱི་ཁྱབ་སྨན་པའི་མཛད་འགན་གཟེངས་སུ་ཐོན་པ་གནང་དང་གནང་མུས་ལ་ལེགས་གསོལ་བསྔགས་བརྗོད་མཚོན་ཕྱིར་འཇམ་དཔལ་དབྱངས་ཀྱི་སྐུ་བརྙན་ཞིག་དང་། དེ་བཞིན་བདེ་ལེགས་སྨན་ཁང་གི་ལས་བྱེད་ཞབས་ལོ་ ༢༠ འཁོར་ཟིན་པ་རྣམས་ལ་ལེགས་མཚོན་བྱ་དགའ་དང་སངས་རྒྱས་སྨན་ལྷའི་སྐུ་བརྙན་ཕུལ་གནང་སོང་། མཛད་སྒོ་གྲུབ་མཚམས་སྐུ་མགྲོན་རྣམས་ལ་ཉིན་དགུང་གསོལ་ཚིགས་འདེགས་འབུལ་དང་། ཉིན་རྒྱབ་ནས་རིག་གཞུང་འཁྲབ་སྟོན་གཟིགས་འབུལ་ཞུས་སོང་བ་བཅས།།
