༄༅། ། ཕྱི་ལོ ༢༠༢༢ ཟླ་བ་ ༡༠ ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་དྲ་རྒྱའི་ནང་དོན་བཟོ་སྒྲིག་དང་ཚོང་སྒྱུར་ཐབས་བྱུས་སྐོར་ཚོགས་བཅར་བ་བཅུ་ཙམ་ལ་དྲ་ཐོག་ནས་ཟབ་སྦྱོང་གནང་ཡོད། ཉིན་གཅིག་གི་དྲ་ཐོག་ཟབ་སྦྱོང་གི་ཐོག་མར་ཕྱི་དྲིལ་བོད་ཀྱི་གསར་འགྱུར་ཚན་པའི་འགན་འཛིན་དྲུང་འཕར་རྣམ་རྒྱལ་ཚེ་དབང་ལགས་ཀྱིས་ཟབ་སྦྱོང་གི་གལ་གནད་དང་དམིགས་ཡུལ་ངོ་སྤྲོད་གནང་སྐབས་ཁོང་གིས་དྲ་ཐོག་ཟབ་སྦྱོང་འདི་བརྒྱུད་དྲ་རྒྱའི་ནང་དོན་བཟོ་སྒྲིག་པ་རྣམས་ནས་དཔལ་འབྱོར་ཡོང་འབབ་གསོག་སྟངས་དང་། དེ་བརྒྱུད་བོད་དོན་གོ་རྟོགས་སྤེལ་རྒྱུའི་དམིགས་ཡུལ་བཟུང་ཡོད་སྐོར་ངོ་སྤྲོད་གནང་ཡོད་པ་རེད།
ཟབ་སྦྱོང་ནང་སྤྱི་ཚོགས་དྲ་རྒྱའི་བརྒྱུད་ལམ་སྟངས་འཛིན་དང་། ནང་དོན་འདེམས་ཕྱོགས། ལྟད་མོ་བར་དམིགས་ཏེ་ནང་དོན་བཟོ་སྟངས། ཚོང་སྒྱུར་དང་ཡོང་འབབ་གསོག་སྟངས། སྤྱི་ཚོགས་སུ་ཤུགས་རྐྱེན་སྤྲོད་ཕྱོགས་སོགས་ཀྱི་སྐོར་ཁྱད་མཁས་པ་སོ་ཧི་ནི་བྷ་ཧུ་མིཀ་ལགས་ཀྱིས་སློབ་ཁྲིད་གནང་ཡོད་ཅིང་། ཟབ་སྦྱོང་གི་དཔལ་འབྱོར་མཐུན་འགྱུར་ཧྥི་རེ་ཌིག་ནོ་མཱན་ཚོགས་ (Friedrich Naumann Foundation) པས་གནང་ཡོད་པ་རེད།
དེ་སྔོན་འདི་ཟླའི་ཕྱི་ཚེས་ ༢༤ ནས་ ༢༧ བར་ཕྱི་དྲིལ་ལས་ཁུངས་ཀྱི་འབྲེལ་ཡོད་ལས་བྱེད་ཁག་གཅིག་ལ་དེ་མཚུངས་ཟབ་སྦྱོང་གནང་ཡོད་པ་བཅས།།
