༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་ཨི་ཊ་ལི་ཁུལ་གྱི་ལས་འཆར་ཁག་ལེགས་པར་གྲུབ་རྗེས་ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༤ ནས་ ༠༧ བར་སུད་སི་ཁུལ་དུ་ཕྱོགས་ཕེབས་གནང་ཡོད།
དེ་ཡང་སུད་སིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ང་གཅིག་པ་མཇུག་བསྡུ་ལ་ཉེ་བའི་མཚམས་སུ་ཇི་ནི་ཝར་ཡོད་པའི་ཨ་རིའི་གཏན་འཇགས་ཚོགས་ཆུང་གིས་གོ་སྒྲིག་ཞུས་པའི་༧གོང་ས་ཏཱ་ལའི་བླ་མའི་ཡང་སྲིད་ཀྱི་འཛམ་གླིང་ལ་ཤུགས་རྐྱེན་ཞེས་པའི་བརྗོད་གཞིའི་འོག་ཟུར་ཚོགས་ཤིག་ཚོགས་པ་ལྟར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཟུར་ཚོགས་སུ་གསུང་བཤད་གནང་ཡོད། ཟུར་ཚོགས་འདིར་ཁེ་ན་ཊ་དང་ཅེཀ་སྤྱི་མཐུན་རྒྱལ་ཁབ། ལི་ཐུ་ནི་ཡཱ། ཨིན་ཡུལ་བཅས་ཀྱིས་མཐུན་འགྱུར་རམ་འདེགས་གནང་ཡོད་པ་རེད།
ཟུར་ཚོགས་ཀྱི་དམིགས་བསལ་སྐུ་མགྲོན་དུ་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་ (Uzra Zeya) མཆོག་དང་། ཨ་རི་གཞུང་གི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཏན་འཇགས་སྐུ་ཚབ་ལྕམ་སྐུ་མ་ཧི་ཀལ་ཀྲེ་ལོར་(Michele Taylor) མཆོག ཨིན་ཡུལ་གཞུང་གི་ཆོས་དད་རང་དབང་གི་དམིགས་བསལ་སྐུ་ཚབ་བཅས་ཕེབས་ཞུགས་གནང་ཡོད། སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་རྒྱ་ནག་གཞུང་གིས་བོད་ནང་བོད་མིར་སྡུག་སྦྱོང་མནར་གཅོད་གཏོང་བཞིན་པ་མ་ཟད། རྒྱལ་ཞེན་སློབ་གསོ་སོགས་གཞུང་གིས་ཆེད་གཉེར་ལས་འགུལ་སྣ་ཚོགས་བརྩམས་ཏེ་བོད་མིའི་ཐུན་མོང་མ་ཡིན་པའི་ཡང་སྲིད་ཀྱི་ལམ་ལུགས་ལ་ཐེ་གཏོགས་བྱེད་ཀྱི་ཡོད་ཅེས་དང་།
དེ་འབྲེལ་བོད་མིའི་སྒྲིག་འཛུགས་ཀྱི་ལངས་ཕྱོགས་ཇི་ཡིན་ཐད་གསུང་དོན། བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ནི་བོད་ཀྱི་ཐུན་མོང་མ་ཡིན་པའི་ཆོས་ཕྱོགས་ཀྱི་ལམ་སྲོལ་ཞིག་ཡིན་ཞིང་། ཡང་སྲིད་ངོས་འཛིན་གྱི་གཞི་རྩའི་ལྟ་གྲུབ་ནི་སྐྱེ་བ་སྔ་ཕྱི་ཁས་བླངས་པ་ཞིག་ངེས་པར་དུ་དགོས་པ་ཡིན། དེས་ན་ཆོས་ཕྱོགས་ཀྱི་གནད་དོན་དེར་སྲིད་གཞུང་དང་གང་ཟག་སྒེར་སུའང་ཐེ་བྱུས་བྱེད་པའི་དབང་ཆ་མེད། ཅེས་གསུངས།
དེ་བཞིན་ཨ་རི་གཙོས་པའི་རྒྱལ་སྤྱིའི་མང་གཙོའི་སྲིད་གཞུང་ཁག་ནས་བོད་མིར་རང་གི་ཆོས་ཀྱི་དབུ་ཁྲིད་གདམ་རྒྱུའི་ཐོབ་ཐང་སྲུང་སྐྱོབ་གནང་བར་བསྔགས་བརྗོད་དང་། བློ་མཐུན་རྒྱལ་ཁབ་གང་མང་ནས་རྒྱ་ནག་དང་དེའི་དྲག་རྩུབ་ཆེ་བའི་སྲིད་བྱུས་འགོག་ཐབས་སུ་མཉམ་རུབ་གནང་དགོས་པའི་འབོད་སྐུལ་ཞུས་ཡོད།
གཞན་ཡང་སྐབས་དེར་བཀའ་བློན་མཆོག་གིས་སུད་སི་གཞུང་གི་གནད་ཡོད་མི་སྣ་དང་གྲོས་ཚོགས་འཐུས་མི། ཇི་ནི་ཝའི་ཐའེ་ཝན་སྐུ་ཚབ་ཚོགས་ཆུང་གི་ཚོགས་མི་རྣམ་པ་སོགས་དང་མཇལ་མོལ་གནང་ཡོད་པ་མ་ཟད། ཇི་ནི་ཝའི་ཤེས་ཡོན་བསྟི་གནས་ (Graduate Institute) ཀྱི་སློབ་གཉེར་བ་རྣམས་དང་ཐུག་འཕྲད་ཀྱིས་བོད་ཀྱི་གནད་དོན་དང་ཕྱི་སྲིད་ཀྱི་གནས་བབ་སྐོར་གསུང་བཤད་གནང་། སྐབས་དེར་བཀའ་བློན་ནོར་འཛིན་སྒྲོལ་མ་མཆོག་གིས་བོད་ཀྱི་ཕྱི་སྲིད་གནས་སྟངས་སྐོར་སྤྱི་བཤད་དང་། བོད་ཀྱི་ཕྱི་སྲིད་འབྲེལ་ལམ་ནི་བཙན་བྱོལ་དུ་ནང་ཆོས་ཀྱི་ཤུགས་རྐྱེན་འོག་ནས་དར་བ་ཡིན་ཞེས་དང་། བོད་མི་རྣམས་ཀྱིས་འཚེ་མེད་ཞི་བ་དང་གཉིས་ཕན་གྱི་ལམ་ནས་བོད་དོན་བདེན་མཐའ་གསལ་ཐབས་གནང་གི་ཡོད་པ་འགྲེལ་བརྗོད་གནང་།
ཕྱོགས་མཚུངས་བཀའ་བློན་མཆོག་རི་ཀོན་ཆོས་འཁོར་དགོན་དུ་ཆེད་ཕེབས་ཀྱིས་བོད་མིའི་སྤྱི་ཚོགས་སྲ་བརྟན་དང་། བོད་ཀྱི་ཆོས་རིག་འཛིན་སྐྱོང་། ས་གནས་གཞུང་ལ་བོད་དོན་ཞུ་གཏུག་བྱ་བར་ས་གནས་ཀྱི་ཚོགས་པ་ཁག་གལ་གནད་ཆེན་པོ་ཆགས་ཡོད་སྐོར་ནན་བརྗོད་གནང་། སྐབས་དེར་བཀའ་བློན་ནོར་འཛིན་སྒྲོལ་མ་མཆོག་གིས་སུད་སི་དང་ལེཀ་ཊིན་ཚིན་བོད་རིགས་ཚོགས་པའི་སྐུ་ཚབ། སུད་བོད་མཛའ་འབྲེལ་ཚོགས་པའི་སྐུ་ཚབ། ས་གནས་བོད་ཀྱི་བུད་མེད་ལྷན་ཚོགས། ས་གནས་བོད་ཀྱི་གཞོན་ནུ་ལྷན་ཚོགས་ཀྱི་སྐུ་ཚབ་དང་མཇལ་འཕྲད་གནང་ཡོད་པ་རེད།
ཟླ་འདིའི་ཕྱི་ཚེས་ ༠༩ ནས་བཀའ་བློན་ནོར་འཛིན་སྒྲོལ་མ་མཆོག་དང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་གཉིས་ཇར་མ་ནཱིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གཙོས་པའི་བོད་མིའི་སྒྲིག་འཛུགས་ཀྱི་སྐུ་ཚབ་དང་ལྷན་བཅར་ཞུས་ཡོད་པ་བཅས།། 
