༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༠༡ ཉིན་བོད་སྒྱུར་ཞུས་པའི་པཱ་ལགས་ཞེས་པའི་གཏམ་བརྗོད་དེ་ཉིད་འཛམ་གླིང་སྤྱི་ཡོངས་ལ་གཟིགས་འབུལ་ཞུ་འགོ་བཙུགས་པ་ལྟར། ཆེས་ཐོག་མའི་གཟིིགས་ཕུད་ཆེད་སྐུ་མགྲོན་ཁག་གཅིག་ལ་བོད་ཀྱི་ཟློས་གར་ཚོགས་པའི་ཚོགས་ཁང་དུ་གཟིགས་འབུལ་ཞུས་སོང་། སྐབས་དེར་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། དམིགས་བསལ་སྐུ་མགྲོན་དུ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇིཊ་ནེ་རི་ཡ་ལགས། དེ་བཞིན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག དབུས་འོས་བསྡུ་འགན་འཛིན་དང་གཞུང་ཞབས་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། གཞན་ཡང་རྡ་ས་ཁུལ་གྱི་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ཕེབས་འདུག 

དེ་ཡང་ཐོག་མར་བོད་ཀྱི་ཟློས་གར་ཚོགས་པའི་འགན་འཛིན་གྱིས་གཏམ་བརྗོད་དང་འབྲེལ་བའི་ངོ་སྤྲོད་གསུང་བཤད་གནང་རྗེས་སྐུ་མགྲོན་རྣམས་ལ་གཏམ་བརྗོད་དངོས་གཞི་གཟིགས་འབུལ་ཞུས་སོང་བ་དང་། གཟིགས་མོ་གྲུབ་མཚམས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཏམ་བརྗོད་དང་འབྲེལ་བའི་སྐོར་གསུང་བཤད་གནང་སོང་། སྐབས་དེར་ཚོགས་གཞོན་མཆོག་གིས་གཙོ་བོ་བྱེས་འབྱོར་རང་དབང་ལུང་པའི་ནང་ཡོད་པའི་བོད་མི་རྣམས་ཀྱིས་གཞིས་ལུས་རྒྱ་ཆེ་མི་མང་གི་མགྲིན་ཚབ་པ་བྱས་ཏེ་བོད་སྤྱི་དང་ཡང་སྒོས་ཁོང་ཚོའི་དཀའ་ངལ་དང་འབོད་སྒྲ་འཛམ་གླིང་ཡོངས་སུ་དྲིལ་བསྒྲགས་གནང་དགོས་པ་གལ་གནད་ཆེན་པོ་ཡིན་སྐོར་སོགས་ཀྱི་གསུང་བཤད་གནང་རྗེས་བོད་ཀྱི་གཏམ་བརྗོད་ཚན་པའི་འགན་འཛིན་ལྷག་པ་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སོང་། 

སྤྱིར་བོད་ནང་གི་དངོས་ཡོད་གནས་སྟངས་ལ་གཞི་བཞག་པའི་པཱ་ལགས་ཞེས་པའི་གཏམ་བརྗོད་དེ་ཕྱི་ལོ་ ༢༠༡༩ ལོར་ཨ་བི་ཤེཀ་མཱ་ཇུམ་དྷར་ (Abhishek Majumdar) ལགས་ཀྱིས་ཐོག་མར་ཨིན་སྐད་ཐོག་བརྩམས་ཏེ་རྒྱལ་སྤྱིའི་སྟེང་གཟིགས་འབུལ་ཞུས་འདུག་པ་དང་། ཕྱིས་སུ་རྩོམ་པ་པོའི་མངོན་འདོད་གཞིར་བཟུང་གཏམ་བརྗོད་དེ་ཉིད་བོད་སྐད་ཐོག་ལྷག་པ་ཚེ་རིང་ལགས་ཀྱིས་ཕབ་སྒྱུར་དང་འཁྲབ་ཁྲིད་ཀྱི་འགན་བཞེས་འདུག་ཅིང་། འཁྲབ་ཁྲིད་པའི་ལས་རོགས་ཇར་མ་ནཱི་ནས་ཡིན་པའི་ཧེ་རི་ཕུ་ཧར་མན་ (Harry Fuhrmann) ལགས་ཀྱིས་གནང་འདུག

གཏམ་བརྗོད་འཁྲབ་སྟོན་ཆེད་འགྲོ་གྲོན་དགོས་དངུལ་བོད་མིའི་སྒྲིག་འཛུགས་ནས་བརྒྱ་ཆ་ལྔ་བཅུ་མཐུན་འགྱུར་དང་། དེ་འཕྲོས་བོད་ཀྱི་ཟློས་གར་ཚོགས་པ་དང་བོད་ཀྱི་གཏམ་བརྗོད་ཚན་པ་ཐུན་མོང་ནས་ཐབས་འཚོལ་གནང་འདུག གཏམ་བརྗོད་ཀྱི་ཐོག་མའི་གཟིགས་ཕུད་གྲུབ་རྗེས་རྡ་ས་དང་། སྦིར་ཁུལ། ལྡི་ལི། མ་སུ་རི། མུམ་བྷཻ། རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་སོགས་སུ་རྒྱ་ཆེ་མང་ཚོགས་དང་སློབ་ཕྲུག་རྣམས་ལ་གཟིགས་འབུལ་ཞུ་རྒྱུ་དང་། རྗེས་ལོ་ནས་ཡུ་རོབ་ཁུལ་དུ་གཟིགས་འབུལ་ཞུ་འཆར་འདུག་པ་བཅས།།