༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༧ ཉིན་གྱི་སྔ་དྲོ་རཱཇ་པུར་དུ་རྟེན་གཞི་བྱས་པའི་དཔལ་ས་སྐྱ་མཐོ་རིམ་སློབ་གྲྭ་ཆེན་མོ་རུ་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ཞབས་པད་བསྐལ་པ་རྒྱ་མཚོར་བརྟན་སླད་བརྟན་བཞུགས་བསྟར་འབུལ་གྱི་མཛད་སྒོ་ཚོགས་ཡོད་པ་དང་། སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བཀའ་ཟུར་ཁག་གཅིག བོད་མི་མང་སྤྱི་འཐུས་ཁག་གཅིག རྒྱ་གར་དབུས་གཞུང་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ཕེབས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དཔལ་ས་སྐྱ་མཐོ་རིམ་སློབ་གྲྭ་ཆེན་མོའི་ཚོགས་ཁང་དུ་སྤོས་སྣེས་མདུན་བསུ་རྗེས་༸སྐྱབས་མགོན་༸གོང་མ་ཁྲི་འཛིན་ཞེ་གཉིས་པ་མཆོག་གིས་མཎྜལ་ལྗགས་བཤད་གནང་གྲུབ་མཚམས་༸སྐྱབས་མགོན་༸གོང་མ་ཁྲི་འཛིན་ཞེ་གསུམ་པ་མཆོག་གིས་སྐུ། གསུང་། ཐུགས། ཡོན་ཏན། འཕྲིན་ལས་ཀྱི་རྟེན་བཅས་ཕུལ།
དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བཀའ་ཟུར་ཁག་གཅིག བོད་མི་མང་སྤྱི་འཐུས་ཁག་གཅིག རྒྱ་གར་དབུས་གཞུང་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། དེ་བཞིན་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་སོགས་ནས་རྟེན་གསུམ་ཕུལ་གྲུབ་མཚམས་༸སྐྱབས་མཆོག་འཁོན་གདུང་ཨ་བི་ཀྲི་ཏ་བཛྲ་མཆོག་གིས་ཞལ་བཞེས་གསོལ་འདེབས་ཞུས་པ་དང་། ༸སྐྱབས་མཆོག་འཁོན་གདུང་ཨ་སངྒ་བཛྲ་མཆོག་གིས་གཏང་རག་གི་མཎྜལ། ༸སྐྱབས་མཆོག་འཁོན་གདུང་ངོར་ཀླུ་ལྡིང་མཁན་རིན་པོ་ཆེ་མཆོག་གིས་རྒྱལ་སྲིད་སྣ་བདུན་ཕུལ།
དེ་ནས་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་བཀའ་སློབ་སྩལ་དོན། སངས་རྒྱས་ཀྱི་བསྟན་པ་རིན་པོ་ཆེ་ཡུན་རིང་གནས་དགོས་པ་གལ་ཆེན་པོ་རེད། སངས་རྒྱས་ཀྱི་བསྟན་པ་རིན་པོ་ཆེ་ཡུན་རིང་གནས་པར་བསྟན་འཛིན་གྱི་སྐྱེས་བུ་ཐམས་ཅད་སྐུ་ཚེ་ཡུན་རིང་བརྟན་དགོས་ཡོད་པས་བརྟན་བཞུགས་གནང་ཡོད། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། སྤྱིར་བསྟན་པ་སྤྱི་དང་ལྷག་པར་ང་ཚོར་བཀའ་དྲིན་ཤིན་ཏུ་ཆེ་བ་ངོར་ཀླུ་ལྡིང་མཁན་ཆེན་རྡོ་རྗེ་འཆང་རྣམ་པ་གཉིས་ཀྱིས་དབུས་པའི་བསྟན་འཛིན་གྱི་སྐྱེས་བུ་ཐམས་ཅད་སྐུ་ཚེ་ཞབས་པད་བསྐལ་བ་རྒྱ་མཚོར་བརྟན་ཅིང་ཐུགས་ཀྱི་བཞེད་དགོངས་མཐའ་དག་འགེགས་མེད་ལྷུན་གྱིས་འགྲུབ་པའི་བསྔོ་བ་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་སྩལ་རྗེས་༸སྐྱབས་མཆོག་བཅོ་བརྒྱད་ཁྲི་ཆེན་མཆོག་གིས་བཀྲ་ཤིས་རྫས་བརྒྱད་ཕུལ་ཏེ་ཉིན་གུང་གསོལ་ཚིགས་བར་མཚམས་བཞག་གནང་སོང་།
ཉིན་རྒྱབ་དཔལ་ལྡན་སྲིད་སྐྱོང་མཆོག་སེ་ལ་ཀུའི་བོད་ཁྱིམ་སློབ་གྲྭར་འཚམས་གཟིགས་སུ་ཕེབས་ཏེ་གསུང་བཤད་གནང་ཡོད་པ་དང་། སྐབས་དེར་དཔལ་ལྡན་སྲིད་སྐྱོང་མཆོག་གིས་སེ་ལ་ཀུའི་བོད་ཁྱིམ་སློབ་གྲྭ་དང་། དེའི་ཁྱབ་ཁོངས་ལས་རིགས་སློབ་གཉེར་ཁང་གི་དགེ་ལས་སློབ་ཕྲུག་ཡོངས་ལ་དྲི་བ་དྲིས་ལན་གྱི་ལམ་ནས་གསུང་བཤད་གནང་སྐབས་གཅོ་བོ་བཙན་བྱོལ་བོད་མིའི་སློབ་གྲྭ་ཁག་ཏུ་སློབ་ཕྲུག་གི་གྲངས་ཀ་ཉུང་དུ་འགྲོ་བཞིན་ཡོད་པ་དང་། ཉུང་དུ་ཕྱིན་པའི་རྒྱུ་རྐྱེན་གཙོ་བོ་ནི་བོད་ནས་རྒྱ་གར་ལ་ཡོང་མཁན་ཉུང་དུ་ཕྱིན་པ་དང་། བོད་མི་ཕྱི་རྒྱལ་ཡུལ་གྲུ་ཁག་ཏུ་གཞིས་སྤོ་བྱས་པ། ཕྲུ་གུའི་སྐྱེས་ཚད་ཉུང་དུ་ཕྱིན་པ་སོགས་ལ་བརྟེན་ནས་བཙན་བྱོལ་དུ་བོད་པའི་སློབ་ཕྲུག་གི་གྲངས་ཚད་ཉུང་དུ་ཕྱིན་ཡོད་སྟབས། བཙན་བྱོལ་བོད་མིའི་སློབ་གྲྭ་ཁག་གཅིག་ཟླ་སྒྲིལ་གཏོང་དགོས་པའི་གལ་གནད་སྐོར་གསུངས་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ནས་བོད་དོན་སྐོར་དོ་སྣང་དང་། བོད་ནང་གི་གནས་ཚུལ་ཤེས་རྟོགས་དགོས་པ། དེ་བཞིན་བོད་ཀྱི་ལོ་རྒྱུས་ཤེས་དགོས་པའི་གལ་གནད་སོགས་ཀྱི་སྐོར་གསུངས། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས། བོད་ནང་རྒྱ་ནག་གཞུང་གིས་བོད་པའི་སློབ་ཕྲུག་རྣམས་ཕ་མ་དང་ཁ་བྲལ་བཅུག་སྟེ་གཏན་འཇགས་སློབ་གྲྭ་ཁག་ཏུ་བཏང་དང་གཏོང་བཞིན་པའི་སྐོར་དང་། སློབ་ཕྲུག་ཚོས་སོ་སོའི་ལས་འགན་གང་ཡིན་ངོ་འཕྲོད་པ་བྱས་ཏེ་སློབ་སྦྱོང་སྦྱང་དགོས་པ་དང་། ཤེས་རིག་ལས་ཁུངས་ནས་སློབ་ཡོན་གནང་ཕྱོགས་ལ་བསྐྱར་ཞིབ་བྱས་ཏེ་དགོས་ངེས་ཅན་གྱི་སློབ་ཕྲུག་ཚོར་སློབ་ཡོན་སྤར་རྒྱུ་ཡིན་པ། དཀའ་ངལ་ཞིག་འཕྲད་སྐབས་དཀའ་ངལ་དེ་གོ་སྐབས་ལ་བསྒྱུར་ཐབས་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད་པ་བཅས། །
