༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡༠ ཚེས་ ༢༩ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མ་སུ་རི་བོད་ཕྲུག་ཁྱིམ་སྡེ་སློབ་གྲྭར་འཚམས་གཟིགས་སུ་ཕེབས་འབྱོར་སྐབས་དགེ་ལས་སློབ་ཕྲུག་ཡོངས་ནས་ཕེབས་བསུའི་སྣེ་གཟབ་རྒྱས་ཞུས་ཡོད། དཔལ་ལྡན་སྲིད་སྐྱོང་མཆོག་དང་ལྷན་བཀའ་ཟུར་འབྲོང་ཆུང་དངོས་གྲུབ་མཆོག་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། སྡེ་ར་ལྡུན་ས་གནས་འགོ་འཛིན། མ་སུ་རི་བོད་ཕྲུག་ཁྱིམ་སྡེའི་འགན་འཛིན་ལྷན་ཚོགས་ཀྱི་ཚོགས་མི་བཅས་ལྷན་བཅར་གནང་ཡོད།དེ་ཡང་དཔལ་ལྡན་སྲིད་སྐྱོང་མཆོག་གིས་མ་སུ་རི་བོད་ཕྲུག་ཁྱིམ་སྡེ་སློབ་གྲྭའི་ལས་ཁུངས་དང་། འཛིན་ཁང་ཁག དཔེ་མཛོད་ཁང་སོགས་ལ་གཟིགས་ཞིབ་གནང་གྲུབ་རྗེས་ཚེ་རིང་སྒྲོལ་མ་ཚོགས་ཁང་དུ་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པར་བླ་མ་དང་སློབ་མའི་བར་དམ་ཚིག་གཙང་མ་དགོས་པའི་གལ་གནད་སྐོར་གསུང་བཤད་གནང་རྗེས་སློབ་ཕྲུག་རྣམས་ལ་དྲི་བ་དྲིས་ལན་གྱི་ལམ་ནས་གསུང་བཤད་གནང་ཡོད།དཔལ་ལྡན་སྲིད་སྐྱོང་མཆོག་གིས་སློབ་ཕྲུག་གི་དྲི་བ་ཁག་ལ་ལན་འདེབས་གནང་སྐབས་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་དང་རང་དབང་ཅན་གྱི་སྡེ་ཚན་ཁག་གི་སྒྲོམ་གཞིའི་སྐོར་དང་། བཙན་བྱོལ་བོད་མིའི་སྤྱི་ཚོགས་ཁྲོད་དང་ལྷག་པར་སློབ་གྲྭའི་ནང་ཕྱོགས་རིས་འཐེན་ཁྱེར་རྩ་བ་ཉིད་ནས་གནང་རྒྱུ་མེད་པ། བོད་ཀྱི་ལོ་རྒྱུས་དང་འབྲེལ་བའི་དཔེ་དེབ་གང་མང་ཀློག་དགོས་པའི་གལ་གནད། བོད་མི་མང་ཚོགས་ནས་དྲ་རྒྱའི་བརྒྱུད་ལམ་ཁག་ཏུ་གནས་ཚུལ་འགྲེམས་སྤེལ་གནང་སྐབས་གནས་ཚུལ་དེ་བོད་སྤྱི་པར་ཕན་ཐོགས་ཡོད་མེད་ངེས་པར་བསམ་བློ་གཏོང་དགོས་པ། ཁྲིམས་དང་སྒྲིག་གཞི། སྔོན་རྩིས་འགྲོ་སྟངས་སོགས་ཀྱི་སྐོར་ཤེས་རྟོགས་དགོས་པའི་སྐོར་གསུངས།  ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བཙན་བྱོལ་དུ་བོད་པའི་སློབ་ཕྲུག་གི་གྲངས་འབོར་ཉུང་དུ་འགྲོ་བཞིན་པར་བརྟེན་མ་འོངས་པར་སློབ་གྲྭ་ཁག་གཅིག་ཟླ་སྒྲིལ་དང་སློབ་ཕྲུག་གི་མཐུན་རྐྱེན་བཟང་དུ་གཏང་རྒྱུ་ཡིན་པའི་སྐོར་དང་། བོད་མིའི་སྒྲིག་འཛུགས་ནས་མུ་མཐུད་ནད་པ་དང་རྒན་འཁོགས་རྣམས་ལ་ལྟ་རྟོག་གནང་རྒྱུ་ཡིན་པ་སོགས་ཀྱི་སྐོར་གསུངས་རྗེས་མ་སུ་རི་བོད་ཕྲུག་ཁྱིམ་སྡེའི་དགེ་ལས་ཡོངས་ནས་རང་གི་ལྟོ་གོས་གཏམ་གསུམ་གྱི་ཆེད་དུ་མ་ཡིན་པར་གཙོ་བོ་མ་འོངས་པར་སློབ་ཕྲུག་རྣམས་མི་བཟང་པོ་དང་། བོད་པའི་སྤྱི་ཚོགས་ལ་ཕན་ཐོགས་པ་ཞིག་ཡོང་སླད་ཕྱག་ལས་གནང་གི་ཡོད་སྟབས་དགེ་ལས་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས།ཉིན་རྒྱབ་དཔལ་ལྡན་སྲིད་སྐྱོང་མཆོག་མ་སུ་རི་བོད་ཕྲུག་ཁྱིམ་སྡེའི་འགན་འཛིན་ལྷན་ཚོགས་ཐེངས་ ༤༦ པའི་ཚོགས་འདུའི་སྟེང་མཉམ་ཞུགས་གནང་ཡོད། ཚོགས་འདུ་གྲོལ་རྗེས་དཔལ་ལྡན་སྲིད་སྐྱོང་མཆོག་མ་སུ་རི་སཾ་བྷོ་ཊ་གཏན་སློབ་ཏུ་འཚམས་གཟིགས་སུ་ཕེབས་ཡོད་པ་དང་། སྐབས་དེར་སློབ་གྲྭའི་དགེ་ལས་སློབ་ཕྲུག་ཡོངས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།དཔལ་ལྡན་སྲིད་སྐྱོང་མཆོག་དང་ལྷན་ཤེས་རིག་དྲུང་ཆེ་འཇིགས་མེད་རྣམ་ལགས་དང་སྡེ་ར་ལྡུན་ས་གནས་འགོ་འཛིན་དོན་གྲུབ་རྒྱལ་པོ་ལགས་ལྷན་བཅར་གནང་ཡོད། མ་སུ་རི་སཾ་བྷོ་ཊ་གཏན་སློབ་ཀྱི་སློབ་སྤྱི་ཐག་གཅོད་ཚེ་རིང་ལགས་ཀྱིས་དཔལ་ལྡན་སྲིད་སྐྱོང་མཆོག་དང་མ་སུ་རི་སཾ་བྷོ་ཊ་གཏན་སློབ་ཀྱི་སྐོར་ངོ་སྤྲོད་གསུང་བཤད་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་མ་སུ་རི་སཾ་བྷོ་ཊ་གཏན་སློབ་ཀྱི་དགེ་ལས་སློབ་ཕྲུག་ཡོངས་ལ་གསུང་བཤད་གནང་སྐབས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ལོར་བོད་ནས་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་རྗེས་ཐོག་མར་མ་སུ་རིར་བཞུགས་གནང་མཛད་པ་དང་། དེ་རྗེས་མགོན་པོ་གང་ཉིད་མཆོག་རྡ་སར་ཆིབས་སྒྱུར་བསྐྱངས་ཏེ་བཞུགས་མུས་ཡིན་པ། དེ་བཞིན་འཕགས་བོད་གཉིས་དབར་ཆོས་དང་རིག་གཞུང་། སྐད་ཡིག་སོགས་ཀྱི་འབྲེལ་བ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མི་རབས་རྒན་པ་རྣམས་ཀྱིས་སྐུ་ལས་བསྐྱོན་གནང་བ་ལ་བརྟེན་ནས་བཙན་བྱོལ་བོད་མི་རྣམས་འདྲ་འདྲའི་ནང་ནས་མ་འདྲ་བ་ཆགས་ཡོད་པའི་སྐོར། བཙན་བྱོལ་དུ་བོད་པའི་དགོན་སྡེ་ཁག་ནས་ཧི་མ་ལ་ཡ་རི་རྒྱུད་ཀྱི་གྲྭ་བཙུན་རྣམས་ལ་སློབ་སྦྱོང་གནང་བཞིན་པ་སོགས་ཀྱི་སྐོར་གསུང་རྗེས་སློབ་ཕྲུག་གི་དྲི་བ་ཁག་ལ་ལན་འདེབས་གནང་ཡོད།སྐབས་དེར་དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་ནང་བོད་པའི་སློབ་ཕྲུག་རྣམས་ཕ་མ་དང་ཁ་བྲལ་བཅུག་སྟེ་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་གི་ནང་བཏང་དང་གཏོང་བཞིན་པ། བོད་མཐོ་སྒང་གི་གཙང་པོ་རྣམས་རྒྱ་གར་དང་། པ་ཀི་སི་ཐན། རྒྱ་ནག་སོགས་ཀྱིས་གཙོས་བོད་ཀྱི་ཁྱིམ་མཚེས་རྒྱལ་ཁབ་ཁག་གི་ནང་བཞུར་བཞིན་ཡོད་སྟབས། བོད་ཀྱི་ཁོར་ཡུག་སྲུང་སྐྱོབ་གནང་དགོས་པའི་གལ་གནད་སྐོར་གསུངས་པ་མ་ཟད། རྒྱ་ནག་གཞུང་གིས་བོད་ནང་གི་བོད་མི་རྣམས་ཀྱི་རིགས་རྫས་བསྡུ་རུབ་བྱས་དང་བྱེད་བཞིན་པའི་སྐོར་དང་། ད་བར་བོད་མི་གྲངས་ ༡༥༨ ལྷག་གིས་རང་དབང་གི་ཆེད་དུ་རང་ལུས་མེར་སྲེག་བཏང་ཡོད་པ་སོགས་ཀྱི་སྐོར་གསུངས་ཡོད་པ་བཅས།།