༄༅། །ཕྱི་ལོ་ ༢༠༢༢ ཟླ་བ་ ༡༠ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྭི་ཌན་ (Sweden) གྱི་རྒྱལ་ས་ཨི་སི་ཊོག་ཧོམ་ (Stockholm) དུ་ཕེབས་འབྱོར་གྱིས་གྲོས་ཚོགས་འཐུས་མི་དང་། གཞུང་འཛིན་མི་སྣ། བསམ་མཛོད་བསྟི་གནས་ཁང་། གསར་འགོད་པ། རྒྱལ་སྤྱིའི་ཡར་རྒྱས་ཚོགས་པ། བོད་དོན་རྒྱབ་སྐྱོར་བ་དང་བོད་རིགས་མི་མང་དང་མཇལ་འཕྲད་གནང་ཡོད།

དེ་ཡང་ཐོག་མར་སྭི་ཌན་གྲོས་ཚོགས་སུ་གྲོས་ཚོགས་འཐུས་མི་ལྕམ་མར་གྷེ་ཊ་ཀེ་ཊི་ཕེལཊ་ (Margareta Cederfelt) ལགས་དང་མཇལ་འཕྲད་ཀྱིས་བོད་ནང་རྒྱ་ནག་གཞུང་གིས་དྲག་རྩུབ་ཆེ་བའི་སྲིད་བྱུས་ལག་བསྟར་བྱེད་བཞིན་པའི་སྐབས་སུ་བོད་དོན་ཐོག་ལས་གཞི་གསར་པ་སྤེལ་ཐབས་ཇི་དགེའི་སྐོར་གྲོས་བསྡུར་ལྷུག་པོ་གནང་ཡོད། ཐེངས་འདིའི་མཇལ་འཕྲད་ཐད་དཔལ་ལྡན་སྲིད་སྐྱོང་མཆོག་གིས་ཊུ་ཝི་ཊར་བརྒྱུད་གསུང་དོན། དེ་རིང་སྭི་ཌན་གྲོས་ཚོགས་སུ་གྲོས་ཚོགས་འཐུས་མི་ལྕམ་མར་གྷེ་ཊ་ཀེ་ཊི་ཕེལཊ་ལགས་དང་མཇལ་མོལ་སྐབས་རྒྱ་ནག་གཞུང་གིས་བོད་ནང་དྲག་གནོན་ཆེ་བའི་མི་སེར་སྤེལ་ཡུལ་གཏན་འཇགས་སློབ་གྲྭ་འཛུགས་སྐྲུན་དང་བོད་མིའི་རིགས་རྫས་དཔེ་མཚོན་བསྡུ་རུབ་བྱེད་བཞིན་པ་མཚོན་བོད་ནང་གི་ཛ་དྲག་གནས་སྟངས་ཐད་ཡུ་རོབ་མཐུན་ཚོགས་ནས་བཞེངས་ཕྱོགས་བརྟན་པོ་བཟུང་རྒྱུར་སྭི་ཌན་གཞུང་གིས་ནུས་པ་བཏོན་ཐུབ་སྐོར་གསལ་བཤད་ཞུ་རྒྱུ་བྱུང་། ཞེས་གསུངས་འདུག སྲིད་བློན་གྱི་འོས་བསྡུ་སླེབས་ལ་ཉེ་མཚམས་སུ་ལྕམ་མར་གྷེ་ཊི་ལགས་ཀྱིས་འཛེམ་ཟོན་མེད་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་སེལ་ཐབས་སུ་སྭི་ཌན་གཞུང་དང་ཡུ་རོབ་མཐུན་ཚོགས་ཐུན་མོང་གིས་ལས་དོན་སྤེལ་ཕྱོགས་ཐད་གྲོས་བསྡུར་གནང་བ་མ་ཟད། གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་འཛུགས་གནང་རྒྱུའི་ཞལ་བཞེས་ཀྱང་གནང་ཡོད་པ་རེད།

ཚོགས་འདུའི་ཐོག་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། སྭི་ཌན་བོད་ཀྱི་ཚོགས་པའི་ (Swedish Tibet Committee) ཚོགས་གཙོ་མ་ཊི་ཧ་(Mattias Bjornerstedt) ལགས། སྭི་ཌན་བོད་རིགས་ཚོགས་པའི་ཚོགས་གཙོ་རིན་ཆེན་མཚོ་མོ་ལགས་མཉམ་ཞུགས་གནང་ཡོད། དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་སྭི་ཌན་བོད་ཀྱི་ཚོགས་པའི་ཚོགས་གཞོན་ཉི་མ་ལགས་ཀྱིས་ (Sweden Organization for Individual Relieve, SOIR-IM) ཞེས་པའི་ཨོ་ལེ་ན་ (Olena Rogozina) ལགས་ལྷན་ཆུ་ཚོད་གཅིག་ལྷག་རིང་ཚོགས་འདུ་ཚོགས་གནང་ཡོད་པ་རེད། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་སྭི་ཌན་ནང་གི་གྲགས་ཆེ་བའི་རླུང་འཕྲིན་ཁང་གི་བཅར་འདྲིར་དང་ལེན་གནང་ཡོད་པ་མ་ཟད། ཕྱི་དྲོར་སྭི་ཌན་བོད་ཀྱི་ཚོགས་པའི་ཚོགས་མི་དང་། བོད་ཀྱི་གྲོགས་པོ་རྣམ་པ། བོད་རིགས་མི་མང་དང་མཇལ་འཕྲད་གནང་། ཕྱི་ཚེས་ ༡༧ ཉིན་དཔལ་ལྡན་སྲིད་སྐྱོང་མཆོག་གིས་སྭི་ཌན་གྲོས་ཚོགས་དང་ཨི་སི་ཊོག་ཧོམ་ནང་ཡོད་པའི་གྲགས་ཆེ་བའི་བསམ་མཛོད་བསྟི་གནས་ཁང་དུ་གསུང་བཤད་གནང་སྟེ་ཐེངས་འདིའི་གཞུང་འབྲེལ་ཕྱོགས་ཕེབས་ལེགས་པར་མཇུག་སྒྲིལ་གྱི་ཡོད་པ་བཅས།།